មេបក្សប្រឆាំងបានសាទរលទ្ធផលចុះឈ្មោះបោះឆ្នោតថ្មីសម្រាប់ឆ្នាំ ២០១៦ថា នឹងបើកផ្លូវឲ្យគណបក្សសង្គ្រោះជាតិទទួលបានជ័យជម្នះសម្រាប់ការបោះឆ្នោតក្រុមប្រឹក្សា/ឃុំសង្កាត់ និងបោះឆ្នោតជ្រើសរើសអ្នកតំណាងរាស្ត្រនៅឆ្នាំ២០១៧និង២០១៨។ តែគណបក្សកាន់អំណាច និងអ្នកវិភាគមានទស្សនៈផ្ទុយពីគណបក្សសង្គ្រោះជាតិ។ កញ្ញា ច្រឹក ស្រីអូន រាយការណ៍ព័ត៌មាននេះ៖
លោក សម រង្ស៊ី លើកឡើងពីក្រៅប្រទេសដូចនេះ បន្ទាប់ពីគណៈកម្មាធិការជាតិរៀបចំការបោះឆ្នោត(គ.ជ.ប) បានប្រកាសអំពីអ្នកបានចុះឈ្មោះបោះឆ្នោតជាង ៧ លាន ៨ សែននាក់នៅត្រឹមថ្ងៃបិទបញ្ចប់កាលពីថ្ងៃទី៣០វិច្ឆិកា។
លោកបន្តថា ទោះបីជាប្រជាពលរដ្ឋខ្មែរជាង ១ លាននាក់ ភាគច្រើនជាពលករចំណាក់ស្រុកទៅធ្វើការនៅក្រៅប្រទេស មិនបានទៅចុះឈ្មោះបោះឆ្នោតក៏ដោយ តែមេបក្សប្រឆាំងប្រកាសសាទរលទ្ធផលចុះឈ្មោះបោះឆ្នោតក្នុងរយៈពេល ៣ ខែ ដែលលោកថា ក៏ជាមោទនភាពមួយដែរ។
លោក សម រង្ស៊ី៖«ខ្ញុំសូមកោតសរសើរអស់ពីដួងចិត្ត ចំពោះពលរដ្ឋខ្មែរគ្រប់រូប ដែលបានខិតខំទៅចុះឈ្មោះឲ្យទាល់តែបាន ដើម្បីរក្សាសិទ្ធិបោះឆ្នោតរបស់ខ្លួន ហើយបំពេញកាតព្វកិច្ចរបស់ខ្លួន ក្នុងនាមជាពលរដ្ឋពេញលក្ខណៈ។ ជាពិសេស ខ្ញុំសូមសម្តែងការកោតសរសើរដ៏លើសលប់ ចំពោះស្ត្រីខ្មែរ ៤.២១៣.៤២៧ នាក់ តំណាងឲ្យ ៥៣,៥ ភាគរយ នៃចំនួនសរុបប្រជាពលរដ្ឋ ៧.៨៧៣.១៩៤ នាក់ ដែលបានទៅចុះឈ្មោះបោះឆ្នោតប្រកបដោយជោគជ័យ»។
លោក សម រង្ស៊ី បានប្រៀបធៀបថា បញ្ជីឈ្មោះអ្នកបោះឆ្នោតថ្មីសម្រាប់ឆ្នាំ ២០១៦នេះគឺ មានលក្ខណៈល្អប្រសើរជាងបញ្ជីឈ្មោះអ្នកបោះឆ្នោតចាស់កាលពីឆ្នាំ ២០១៣ ទាំងបរិមាណ និងគុណភាព។កត្តានេះហើយដែលមេបក្សប្រឆាំងរំពឹងថាគណបក្សរបស់លោក នឹងបានជ័យជម្នះសម្រាប់ការបោះឆ្នោតក្រុមប្រឹក្សាឃុំ សង្កាត់ ឆ្នាំ ២០១៧ និងបោះឆ្នោតជ្រើសរើសតំណាង ឆ្នាំ ២០១៨។
តែយ៉ាងនេះក្ដីអ្នកនាំពាក្យគណបក្សប្រជាជនកម្ពុជា លោក សុខ ឥសាន្ត យល់ថា ការលើកឡើងរបស់លោក សម រង្ស៊ី ប្រធានគណបក្សសង្គ្រោះគឺមិនអាចទៅរួចឡើយ។ លោកបានចំអកឲ្យមេបក្សប្រឆាំងថា ឲ្យលោកក្លាយជាមេបក្សប្រឆាំងដ៏ធំជាងគេបន្តទៀតចុះ។
លោក សុខ ឥសាន្ត៖«យល់សប្តិទាំងថ្ងៃ មិនអាចក្លាយជាការពិតទេ។ យើងចាំមិនភ្លេចទេ គាត់ថា គាត់គណបក្សប្រឆាំងធំជាងគេបង្អស់នៅកម្ពុជា ហើយមិនអាចនរណាមកដណ្តើមតួនាទីជាគណបក្សប្រឆាំងរបស់គាត់បានទេ អញ្ចឹងបានសេចក្តីថាគាត់ទទួលស្គាល់ថា គាត់នៅប្រឆាំងរហូត គ្មាននរណាដណ្តើមតួនាទីបក្សប្រឆាំងគាត់បាន»។
មានទស្សនៈប្រហាក់ប្រហែលនឹងលោក សុខ ឥសាន្ត ដែរ លោក គឹម សុខ អ្នកឃ្លាំមើលការអភិវឌ្ឍន៍សង្គមយល់ថា ការលើកឡើងរបស់មេបក្សប្រឆាំងថា លទ្ធផលចុះឈ្មោះបោះឆ្នោតថ្មីសម្រាប់ឆ្នាំ ២០១៦ នឹងបើកផ្លូវ CNRP ទទួលជ័យជម្នះនោះ ប្រហែលជាមិនអាចទៅរួចឡើយ ដោយលោកលើកហេតុផលថា បើតាមរបាយការណ៍របស់គណៈកម្មធិការជាតិរៀបចំការបោះឆ្នោត(គ.ជ.ប)ចំនួនជាង ៧ លាន ៨ សែននាក់ ខណៈដែលប្រជាពលរដ្ឋជាង ១ លាននាក់ ភាគច្រើនជាពលករចំណាក់ស្រុកទៅធ្វើការនៅក្រៅប្រទេសមិនបានទៅចុះឈ្មោះបោះឆ្នោតគឺ ជាលទ្ធផលជោគជ័យរបស់គណៈបក្សកាន់អំណាចទៅវិញ។
ទោះបីយ៉ាងណា លោកថា គណបក្សសង្គ្រោះជាតិអាចនឹងមានសង្ឃឹមឈ្នះឆ្នោត ប្រសិនបើ គ.ជ.បធ្វើឱ្យមានតម្លាភាព នៅពេលរៀបចំការបោះឆ្នោត និងនៅពេលរាប់សន្លឹងឆ្នោត។
លោក គឹម សុខ៖«ខ្ញុំមើលឃើញដូចជាផ្ទុយពីឯកឧត្តម សម រង្ស៊ី បន្តិច នៅត្រង់ថា លទ្ធផលនិងដូចបង្ហាញថា គណបក្សប្រជាជនបានសម្រេចផែនការឈ្នះ ៧០ ភាគរយទៅហើយ។ វានៅសល់តែម្យ៉ាងដំណាក់កាលទី២ តើការរៀបចំការចុះឆ្មោះបោះឆ្នោតថ្មី យន្តការដំណើរការចុះឈ្មោះបោះឆ្នោតថ្មី បញ្ហានឹងនៅសល់ចន្លោះឲ្យគណបក្សប្រជាជនគេអាចធ្វើអ្វីតាមផែនការរបស់គេទៀតឬអត់»។
នៅក្នុងការបោះឆ្នោតសភាកាលពីឆ្នាំ២០១៣ គណបក្សសង្គ្រោះជាតិ ទទួលបាន៥៥អាសនៈ គឺជិតទាន់ គណក្សប្រជាជនកម្ពុជា ដែលទទួលបាន ៦៨អាសនៈ។ លទ្ធផលបោះឆ្នោត ឆ្នាំ២០១៣ ត្រូវបានលោកសម រង្ស៊ី ចោទ បក្សកាន់អំណាចលួចបន្លំ តែបក្សកាន់អំណាចបដិសេធ៕
