ភ្នំពេញ៖ សង្គមស៊ីវិលដែលធ្វើការឃ្លាំមើលការចុះឈ្មោះបោះឆ្នោតអស់រយៈពេល ៣ ខែមកនេះ បានសម្តែងការសោកស្តាយ ដែលគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប សម្រេចពន្យាពេលចុះឈ្មោះបោះឆ្នោតតែ១ថ្ងៃទៀតប៉ុណ្ណោះ ខណៈអ្នកមិនទាន់ចុះឈ្មោះបោះឆ្នោតនៅមានចំនួនច្រើនទៀតនៅទ្បើយ។ ការលើកទ្បើងដូចនេះបន្ទាប់ពីគ.ជ.ប បើកកិច្ចប្រជុំមួយនៅជុំវិញការចុះឈ្មោះបោះឆ្នោត ដោយសម្រេចពន្យាពេលការចុះឈ្មោះបោះឆ្នោត១ថ្ងៃទៀត។
សេចក្ដីជូនដំណឹងរបស់ គ.ជ.ប ដែលបានពន្យារពេលចុះឈ្មោះបោះឆ្នោត គឺធ្វើឡើង បន្ទាប់ពីថ្នាក់ដឹកនាំរបស់ស្ថាប័ននេះបានកិច្ចប្រជុំដើម្បីពិនិត្យមើលលទ្ធភាពការស្នើសុំ របស់សង្គមស៊ីវិលនិងគណបក្សសង្គ្រោះជាតិ។ ដោយពិនិត្យឃើញថា ចំនួនពលរដ្ឋមកកាន់ការិយាល័យមានចំនួននៅច្រើននៅឡើយ ដែល គ.ជ.ប សម្រេចបន្ថែមពេលមួយថ្ងៃទៀតគឺនៅថ្ងៃទី៣០ វិច្ឆិកា។ តែបែបនេះក្ដីមិនបានធ្វើឱ្យមានការគាំទ្រ ពីអង្គការសង្គមស៊ីវិលធ្វើការងារលើការបោះឆ្នោត និងគណបក្សប្រឆាំង។
នាយកប្រតិបត្តិគណៈកម្មាធិការអព្យាក្រឹត្យ និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា លោក សំ គន្ធាមី មានប្រសាសន៍ថារយៈពេលដែល គ.ជ.ប ពន្យាពេលតែ១ថ្ងៃនេះគឺមានរយៈពេលខ្លីនៅទ្បើយ។ លោកថាចំនួនអ្នកដែលមិនទាន់មកចុះឈ្មោះបោះឆ្នោតនៅមានចំនួនច្រើនដែលហេតុនេះ លោកថា គ.ជ.ប គួរតែពន្យាពេល១សប្តាហ៍ទៀតទើបគ្រប់គ្រាន់ក្នុងការចុះឈ្មោះបោះឆ្នោត។
ទោះបីជាយ៉ាងណាក៏ដោយ លោក សំ គន្ធាមី លើកទ្បើងថានៅសល់រយៈពេល១ថ្ងៃទៀតនៃការចុះឈ្មោះបោះឆ្នោតនេះ គ.ជ.ប ត្រូវបង្កើនការផ្សព្វផ្សាយ និងជំរុញទៅដល់ស្ថាប័នពាក់ព័ន្ធអាជ្ញាធរភូម ឃុំ ដើម្បីធ្វើយ៉ាងណាជួយសម្រួលទៅដល់ប្រជាពលរដ្ឋដែលមិនទាន់មកចុះឈ្មោះបោះឆ្នោត ឱ្យពួកគេបានមកចុះឈ្មោះឆ្នោត។
«ខ្ញុំគិតថាខ្លីណាស់ការពន្យាមួយថ្ងៃហ្នឹង វាមិនគួរអ្នកដែលនៅសេសសល់ឱ្យគាត់មកចុះឈ្មោះអោយអស់ចិត្តទៅយើងក្រុមសង្គមស៊ីវិលសុំមួយអាទិត្យ ហើយយើងបង្កើនការផ្សព្វផ្សាយទៀតទៅ ហើយមួយអាទិត្យវាល្មមអ្នកដែលនៅរារែកឬក៏អ្នកដែលរវល់អីចុងក្រោយគេហ្នឹង គួរតែបានមកចុះគ្រប់ៗគ្នា មួយថ្ងៃវាខ្លីពេក រយៈពេលវាលឿនពេកតែមួយថ្ងៃទៀតតាស សង្គមស៊ីវិលយើងស្នើ៧ថ្ងៃប៉ុន្តែយើងស្នើសុំហ្នឹងមិនមែនទូទាំងប្រទេសទេ យើងជ្រើសរើសយកតែខេត្តណាដែលមាននៅចំនួនអ្នកសុំចុះឈ្មោះហ្នឹងច្រើន»។
ទាក់ទងការពន្យាពេលនេះ អ្នកនាំពាក្យនៃគណកម្មាធិការជាតិរៀបចំការបោះឆ្នោត ហៅកាត់ គ.ជ..ប លោក ហង្ស ពុទ្ធា បានប្រាប់វិទ្យុស្ត្រីនៅព្រឹកថ្ងៃទី ២៩ ខែ វិច្ឆិកា នេះថា គ.ជ.ប សម្រេចពន្យារពេលការចុះឈ្មោះបោះឆ្នោតចំនួនមួយថ្ងៃទៀត មានន័យថា ប្រជាពលរដ្ឋដែលមិនទាន់បានចុះឈ្មោះបោះឆ្នោត អាចមានពេលត្រឹមថ្ងៃទី៣០ ខែវិច្ឆិកាដើម្បីទៅចុះឈ្មោះបាន។ ការសម្រេចពន្យារពេលនៃការចុះឈ្មោះត្រឹមតែមួយថ្ងៃបែបនេះ លោក ហង្ស ពុទ្ធា ពន្យល់ថា គឺដោយសារប្រតិទិន និងការងារបច្ចេកទេសរបស់ គ.ជ.ប មានភាពចង្អៀត ដែលមិនអាចពន្យារពេលច្រើនថ្ងៃបាន។ មួយវិញទៀតលោកថា ការពន្យារពេលមួយថ្ងៃនេះ ក៏ព្រោះតែ គ.ជ.ប មើលឃើញពីសន្ទុះនៃអ្នកទៅចុះឈ្មោះនាប៉ុន្មានថ្ងៃចុងក្រោយនេះ ហាក់មានសន្ទុះខ្លាំងក្លា ហើយ គ.ជ.ប ទុករយៈមួយថ្ងៃដើម្បីបើកឱកាសឱ្យកាន់តែទូលាយសម្រាប់ពលរដ្ឋដែលមិនទាន់បានចុះឈ្មោះបោះឆ្នោតថ្មី បានទៅចុះឈ្មោះបានកាន់តែច្រើន។
ចំណែកអ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា ការសម្រេចពន្យាពេល១ថ្ងៃទៀតនេះ គឺមិនគ្រប់គ្រាន់នោះទេ ពីព្រោះប្រជាពលរដ្ឋដែលមិនទាន់ទៅចុះឈ្មោះនៅមានចំនួនច្រើនទៀតនៅទ្បើយ ។លោកថាគ.ជ.ប គួរពន្យាពេលលើសពី១ថ្ងៃ ហើយការពន្យាពេលនោះក៏មិនធ្វើឱ្យប៉ះពាល់ដល់នីតិវិនៃការចុះឈ្មោះបោះឆ្នោតដែរ។ លោក យឹម សុវណ្ណ ក៏បានអំពាវនាវឱ្យប្រជាពលរដ្ឋទៅចុះឈ្មោះបោះឆ្នោតឱ្យបានគ្រប់ៗគ្នាខណៈការពន្យាពេលចុះឈ្មោះនៅសល់តែ១ថ្ងៃទៀតប៉ុណ្ណោះ។
«១ថ្ងៃមិនគ្រប់ទេពីព្រោះបើយើងមើលប្រជាពលរដ្ឋដែលមិនទាន់បានទៅចុះឈ្មោះហើយគាត់អញ្ចើញទៅចុះឈ្មោះគឹច្រើនៗណាស់ក្នុង១ថ្ងៃជាពិសេសនៅទីក្រុងភ្នំពេញសុទ្ធតែជាង១ម៉ឺននាក់ក្នុង១ថ្ងៃ ហើយយើងសល់ប្រហែល២លាននាក់ទៀតដូច្នេះគួរតែយើងមើលការចង់ចុះរបស់ប្រជាពលរដ្ឋហ្នឹងគួរតែពន្យាពេលឱ្យបានច្រើនជាងនេះ ពី ៣ ថ្ងៃទៅ មួយអាទិត្យយ៉ាងតិចព្រោះរឿងប្រជាពលរដ្ឋមិនទៅចុះជារឿងរបស់គាត់តែបើគាត់ចង់ទៅចុះហើយតែគាត់មិនមានពេលវេលាគ្រប់គ្រាន់អាហ្នឹងយើងគួរពិនិត្យយ៉ាងណាឱ្យសិទ្ធិរបស់គាត់អនុវត្តបានទូលំទូលាយ»។
ជុំវិញនឹងការលើកទ្បើងនេះដែរ អ្នកនាំពាក្យគណបក្សប្រជាជនកម្ពុជា លោក សុខ ឥសាន្ត មានប្រសាសន៍ថា លោកគាំទ្រទៅតាមការសម្រេចរបស់ គ.ជ.ប ព្រោះការពន្យាពេលនេះនឹងបង្កើនអ្នកដែលមិនទាន់មកចុះឈ្មោះបោះឆ្នោតឱ្យបានមកចុះឈ្មោះបន្ថែមទៀត។ លោក សុខ ឥសាន្តលើកទ្បើងទៀតថា ចំពោះការសម្រេចរបស់គ.ជ.ប នេះដែរ គេមិនអាចបង្គាប់បញ្ជាគ.ជ.ប គួរតែពន្យាពេលលើសពីនេះឬយ៉ាងណានោះទេព្រោះនេះជាសេចក្តីសម្រេចរបស់គ.ជ.ប។ ទោះបីយ៉ាងនេះក្តីលោក សុខ ឥសាន្ត ទទួលស្គាល់ថារយៈពេលតែ១ថ្ងៃនេះគឺពិតជាមិនអាចគ្រប់គ្រាន់នោះទេ ។
«វាមិនអាចគ្រប់គ្រាន់ទេក៏ប៉ុន្តែយើងយល់ថាគួរឱ្យសោកស្តាយដែលបងបងប្អូនដែលដល់អាយុបោះឆ្នោតហើយមិនព្រមអញ្ចើញរួសរាន់ទៅចុះឈ្មោះបោះឆ្នោតរក្សា៣ខែហើយដល់អញ្ចឹងប្រទ្បាយពេលពីមួយថ្ងៃទៅមួយថ្ងៃវាខកដំណើរ។ វាច្បាស់ហើយបើសិនជាណាបាន គ.ជ.ប គាត់សម្រេចថា ៣ ថ្ងៃទៅ ១សប្តាហ៍ទៀតអាហ្នឹងក៏វាមិនមានបញ្ហាអីទេយើងមិនយល់ទាស់ទេយើងសង្ឃឹមថាប្រជាពលរដ្ឋយើងនឹងបានចុះឈ្មោះកាន់តែច្រើនហើយសន្ទុះភាគរយក៏វាកើនទ្បើងតាមហ្នឹងដែរ»។
សូមជម្រាបថា ដំណើរការចុះឈ្មោះបោះឆ្នោតថ្មី ចាប់ផ្តើមពីថ្ងៃទី០១ ខែកញ្ញា ដល់ ថ្ងៃទី២៩ ខែវិច្ឆិកា ឆ្នាំ២០១៦ ។ គ.ជ.ប បញ្ជាក់ថា ប្រជាពលរដ្ឋដែលមានអាយុ ១៨ ឆ្នាំឡើង ហើយមានសិទ្ធិចុះឈ្មោះបោះឆ្នោត មានចំនួនជាង ៩លាន ៦ សែននាក់៕
