ភ្នំពេញ៖ ប្រធានគណបក្សសង្គ្រោះជាតិលោក សម រង្ស៊ី ថ្លែងនៅវេទិកាសំណេះសំណាលជាមួយយុវជន កាលថ្ងៃពីអាទិត្យទី២១វិច្ឆិកាថា គណបក្សសង្គ្រោះជាតិនឹងឈ្នះឆ្នោតក្នុងការដឹកនាំប្រទេសនៅឆ្នាំ ២០១៨ ខាងមុខ ក៏ព្រោះលោកមានទំនុកចិត្តលើបញ្ជីចុះឈ្មោះបោះឆ្នោតតាមប្រព័ន្ធថ្មីតាមកុំព្យូទ័រ។
ការអះអាង របស់មេបក្សប្រឆាំងដូចនេះនៅពេលនេះ បក្សកាន់អំណាចអស់កលល្បិចខូច លួចបន្លំសន្លឹកឆ្នោតបានឡើយ ខណៈលោកចោទប្រកាន់គណបក្សកាន់អំណាចបានឈ្នះឆ្នោតដោយសារការលួចបន្លំសន្លឹកឆ្នោតពីអ្នកបោះឆ្នោត និងបញ្ជីឈ្មោះខ្មោច។ តែយ៉ាងនេះក្ដី អ្នកនាំពាក្យគណបក្សកាន់អំណាចបានច្រានចោលកាលចោទប្រកាន់នេះ។ លោក ធូ វិរៈ រាយការណ៍ព័ត៌មាន៖
ប្រធានគណបក្សសង្គ្រោះជាតិ លោក សម រង្ស៊ី ដែលកំពុងរស់នៅនិរទេសខ្លួននៅក្រៅប្រទេសបានថ្លែងតាម រយៈវីឌីអូខន់ហ្វ្រិនថា គណបក្សប្រជាជនកម្ពុជាមិនអាចលួចបន្លំសន្លឹកឆ្នោត ដូចកាលឆ្នាំ ២០១៣ ឬ អាណត្តិមុនៗទៀត ឡើយ ព្រោះប្រព័ន្ធចុះឈ្មោះបោះឆ្នោតថ្មីតាមកុំព្យូទ័រពេលនេះ គឺមានភាពសុក្រឹត្យ។
លោក សម រង្ស៊ី អះអាងបន្តថា គណបក្សកាន់អំណាចដែលធ្លាប់ បន្លំបញ្ជីឈ្មោះ និងបញ្ជីឈ្មោះខ្មោចជាង ១ លាននាក់ កាលពី អាណត្តិមុនៗគឺពេលនេះគ្មានផ្លូវទៀតឡើយ ។ មេបក្សប្រឆាំងរូបនេះអះអាងថា បញ្ជីបោះឆ្នោតថ្មីនឹងនាំឲ្យគណបកសង្គ្រោះជាតិទទួលបានជ័យជំនះក្នុងការបោះឆ្នោត នៅឆ្នាំ ២០១៨។
ជុំវិញការចោទប្រកាន់នេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន្ត បានអះអាងថា គណបក្សកាន់អំណាចមិនបានបន្លំសន្លឹកឆ្នោតឡើយ។ លោក សុខ ឥសាន្ត បានហៅការចង់ឈ្នះឆ្នោតរបស់លោក សម រង្ស៊ី ប្រធានគណបក្សសង្គ្រោះជាតិ គឺជារឿងសុបិនប៉ុណ្ណោះ។
ចំណែកលោក ចាន់ វិបុល អ្នកសិក្សាអំពីអភិបាលកិច្ច និងលទ្ធិប្រជាធិបតេយ្យ បានឲ្យដឹងថា ប្រព័ន្ធបញ្ជីចុះឈ្មោះបោះឆ្នោតថ្មីនេះតាមកុំព្យូទ័រ អាចទុកចិត្តច្រើនជាង ប្រព័ន្ធចុះឈ្មោះចាស់ កាលពីអាណត្តិមុនៗ។ លោកថា លទ្ធផលបោះឆ្នោតយ៉ាងណានោះប្រហែលអាចឲ្យគណបក្សនយោបាយទាំងពីរទទួលយកបាន។
ទោះបីយ៉ាងនេះក្តី លោកសម្តែងការព្រួយបារម្ភអំពីចំនួនអ្នកចុះឈ្មោះបោះឆ្នោត នៅមិនទាន់គ្រប់ចំនួន។ លោកមើលឃើញថា គណបក្សសង្គ្រោះជាតិមានឧបសគ្គច្រើន នៅពេលចេញឃោសនាបោះឆ្នោត ព្រោះលោក កឹម សុខា កំពុងសម្ងំនៅក្នុងទីស្នាក់ការបក្សដោយសាររឿងក្តីនៅតុលាការ។ ចំណែកលោក សម រង្ស៊ី ក៏កំពុងនិរទេសខ្លួននៅក្រៅប្រទេសផងដែរ។
លោក ចាន់ វិបុល៖«សូមឲ្យមេដឹកនាំទាំងអស់ទទួលយកលទ្ធផលនៃការបោះឆ្នោត ហើយទទួលស្គាល់ថា ការបោះឆ្នោតធ្វើឡើងដោយសេរី យុត្តិធម៌ សុក្រឹត្យភាព ដើម្បីជាប្រយោជន៍សម្រាប់ប្រជាពលរដ្ឋ»។
លទ្ធផលបោះឆ្នោត សភា ឆ្នាំ ២០១៣ ត្រូវបានសហគមន៍អន្តរជាតិ ភ្ញាក់ផ្អើលយ៉ាងខ្លាំង ព្រោះ សំឡេងឆ្នោតបក្សប្រឆាំងបានកើនពី ២៩អាសនៈ ទៅ៥៥ អាសនៈ ដែលចំនួននេះ បាននាំឱ្យបក្សកាន់អំណាច របស់គណបក្សប្រជាជនកម្ពុជា បាត់ ២២អាសនៈ។ ការបោះឆ្នោត សភា ឆ្នាំ២០១៨ ខាងមុខនេះ សហគមន៍អន្តរជាតិ ប្រកាសថា ពួកគេនឹងបញ្ចូនអ្នកសង្កេតការណ៍មកយ៉ាងច្រើន ដើម្បីឃ្លាំមើលការបោះឆ្នោត ៕