កាលពីថ្ងៃសុក្រទី ១៨ វិច្ឆិកា ក្រសួងសុខាភិបាល បានចេញសេចក្តីប្រកាសព័ត៌មានមួយដោយបញ្ជាក់ថា មានករណីជំងឺហ្ស៊ីកាមួយករណីដំបូងគេសម្រាប់ឆ្នាំ ២០១៦ កើតលើបុរសម្នាក់វ័យ ៤៤ ឆ្នាំ រស់នៅខេត្តកំពង់ចាម។ ប៉ុន្តែសេចក្តីប្រកាសព័ត៌មានចេញនៅថ្ងៃដដែលនេះ បានសុំកែតម្រូវភ្លាមៗវិញ ដោយបញ្ជាក់ថា ពុំមានករណីជំងឺហ្ស៊ីកាកើតលើបុរសវ័យកណ្តាលនៅខេត្តកំពង់ចាមនោះទេ។
ជុំវិញករណីកែតម្រូវអំពីករណីជំងឺហ្ស៊ីកានេះ នាយកដ្ឋានប្រយុទ្ធប្រឆាំងនឹងជំងឺឆ្លងនៃក្រសួងសុខាភិបាល បានស្តីបន្ទោសទៅវិទ្យាស្ថានប៉ាស្ទ័រ ថា ជាការធ្វេសប្រហែសក្នុងការធ្វើតេស្តឈាមរកលទ្ធផលវីរុសហ្ស៊ីកា។ នេះបើតាមទំព័រហ្វេសប៊ុកនាយកដ្ឋានប្រយុទ្ធប្រឆាំងនឹងជំងឺឆ្លង(CDC)។
សារនៅលើទំព័រហ្វេសប៊ុក៖« នេះជាកំហុសរបស់ ប៉ាស្ទ័រ ដែលជាសេវាមន្ទីរពិសោធន៏ ផ្កាយ៥ តែធ្វើការងារធ្វេសប្រហែស ដែលក្រសួងសុខាភិបាល និងអង្គការសុខភាពពិភពលោក ពឹងពាក់ទាំងស្រុង។ យើង នឹងពិចារណា ទៅលើភាពទំនុកចិត្តនេះ ។ មុននឹងចេញសេចក្តីប្រកាសពត៌មាននេះ មន្ត្រីជំនាញទាំងក្រសួង និងអង្គការសុខភាពពិភពលោក បានផ្ទៀងផ្ទាត់ អស់រយៈពេលមួយអាទិត្យ និងបានចាត់វិធានការនៅមូលដ្ឋានជាមុន ដើម្បីទប់ស្កាត់ជំងឺនេះ»។
ការឆ្លើយតបបែបនេះ ធ្វើឡើងបន្ទាប់ពីអ្នកលេងបណ្តាញសង្គមហ្វេសប៊ុក ដែលបានរិះគន់នៅលើទំព័រហ្វេសប៊ុករបស់នាយកដ្ឋានប្រយុទ្ធប្រឆាំងនឹងជំងឺឆ្លង អំពីការចេញសេចក្តីប្រកាសព័ត៌មានសុំកែតម្រូវថាពុំទាន់មានករណីជំងឺហ្ស៊ីកា។
បើតាមលោក Philippe Dussart ប្រធានផ្នែកសិក្សាអំពីមេរោគនៅវិទ្យាស្ថានប៉ាស្ទ័រ បានប្រាប់ការសែតភ្នំពេញប៉ុស្តិ៍ សុំមិនធ្វើអត្ថាធិប្បាយអំពីការស្តីបន្ទោសទៅលើវិទ្យាស្ថានប៉ាស្ទ័រ ប៉ុន្តែបានថ្លែងថា ការធ្វើតេស្តឈាម រកមេរោគស៊ីកា ជាក់លាក់ត្រូវបានធ្វើឡើង ហើយឃើញថាវិជ្ជមាន។
អង្គការសុខភាពពិភពលោករកឃើញថា មនុស្សជាង ១,៥ លាននាក់ក្នុងនោះមានទារកប្រមាណ ១៦០០នាក់ បានឆ្លងមេរោគ Zika នេះ ចាប់តាំងពីការផ្ទុះឡើងនៃវីរុសនេះនៅពាក់កណ្តាលឆ្នាំ ២០១៥។
ក្រុមអ្នកស្រាវជ្រាវបានព្រមានកាលពីដើមឆ្នាំនេះថា យ៉ាងហោចណាស់មនុស្ស ២,៦ ពាន់លាននាក់ ក្នុងនោះមួយភាគបីនៃប្រជាជនទូទាំងពិភពលោក ដែលរស់នៅផ្នែកខ្លះនៃទ្វីបអាហ្វ្រិក តំបន់អាស៊ីនិងប៉ាស៊ីហ្វិកជាកន្លែងដែលមានមេរោគ Zika បានផ្ទុកមេរោកនេះ។
ជំងឺ ហ្ស៊ីកា នេះ ជាប្រភេទជំងឺឆ្លងម្យ៉ាងដែលបង្កដោយពពួកវីរុសហ្ស៊ីកា ហើយភ្នាក់ងារចម្លងជាប្រភេទសត្វមូសខ្លាដែលដូចគ្នាទៅនឹងជំងឺគ្រុនឈាមដែរ។ អ្នកជំងឺប្រមាណ៧០ ទៅ ៨០% ពុំមានលេចចេញជារោគសញ្ញាអ្វីនោះទេ តែអាការៈអាចកើតមានដូចជា ក្ដៅខ្លួន ឈឺសាច់ដុំ និងសន្លាក់ដៃជើង ស្នាមក្រហមអុចលើស្បែក ភ្នែកឡើងក្រហមជាដើម។
មេរោគ Zika នេះ គឺបណ្តាលអោយស្ត្រីមានផ្ទៃពោះអាចមានហានិភ័យខ្ពស់ក្នុងការផ្តល់កំណើតឱ្យទារកមានក្បាលតូច ខូចទ្រង់ទ្រាយដើម និងបង្កឱ្យខួរក្បាលរួមតូច ហើយប្រព័ន្ធប្រសាទក៏ខុសប្រក្រតីផងដែរ។
សូមរម្លឹកថា ក្រសួងសុខាភិបាលធ្លាប់បានណែនាំឲ្យពលរដ្ឋបង្កើនការយកចិត្ដទុកដាក់ និងយល់ដឹងពីជំងឺហ្ស៊ីកានេះ។ ក្រសួងសុខាភិបាលបញ្ជាក់ថា ប្រសិនពលរដ្ឋមានរោគសញ្ញាសង្ស័យ សូមស្វែងរកភ្នាក់ងារសេវាសុខាភិបាលសាធារណៈដែលនៅក្បែរ ឬអាចទាក់ទងតាមទូរស័ព្ទលេខ ០១៥ ៨២៥ ៤២៤ ឬ០១២ ៨២៥ ៤២៤ ដើម្បីសួរនូវរាល់ចម្ងល់ដែលពាក់ព័ន្ធនឹងជំងឺហ្ស៊ីកានេះ និងសម្រាប់ព័ត៌មានបន្ថែមផ្សេងៗស្ដីពីជំងឺឆ្លង៕