ភ្នំពេញ៖ប្រធានគណបក្សសង្គ្រោះជាតិលោក សម រង្ស៊ី ដែលកំពុងតែនិរទេសខ្លួនទៅរស់នៅក្រៅប្រ ទេសបានបង្ហោះនៅលើគេហទំព័រហ្វេសប៊ុករបស់លោកនៅល្ងាចថ្ងៃទី ១៣ ខែវិច្ឆិកា ឆ្នាំ២០១៦ ថា ការបំផ្លិចបំផ្លាញជាតិគឺដោយសារតែអំពើពុករលួយរបស់រដ្ឋាភិបាលកម្ពុជាកំពុងតែដឹកនាំប្រទេសសព្វថ្ងៃ។ តែមន្ត្រីរដ្ឋាភិបាលបដិសេធថា ការលើកទ្បើងនេះមិនបានឆ្លុះបញ្ចាំងពីការពិតនោះទេ។
ករណីអំពើពុករលួយគឺជាប្រធានបទក្តៅដែលមេដឹកនាំគណបក្សប្រឆាំងធំជាងគេនៅក្នុងប្រទេសកម្ពុជាលោក សម រង្ស៊ី រិះគន់ថាក្រោមការដឹកនាំរបស់រដ្ឋាភិបាលកម្ពុជាសព្វថ្ងៃនឹងធ្វើឱ្យជាតិរងការបំផ្លិចបំផ្លាញ ដោយសារការប្រព្រឹត្តិអំពើពុករលួយ។
លោក សម រង្ស៊ី បានសរសេរទៀតថាករណីអំពើពុករលួយនោះលោកលើកយកតែពីរករណីប៉ុណ្ណោះករណីទីមួយជុំវិញការបូមខ្សាច់និងករណីទីពីរការកាប់ព្រៃឈើដោយខុសច្បាប់ដែលមានតួលេខខុសគ្នារវាងតួលេខរបស់រដ្ឋាភិបាលកម្ពុជានិងតួលេខប្រទេសដែលទទួលទិញ។
លោក សម រង្ស៊ី សរសេរថា៖«ក្នុងរយៈពេល០៨ឆ្នាំ គឺពីឆ្នាំ២០០៧ ដល់ឆ្នាំ២០១៥ តាមការអះអាងរបស់រដ្ឋាភិបាលសម្តេច ហ៊ុន សែន ប្រទេសកម្ពុជាបាននាំចេញខ្សាច់ទៅលក់ឱ្យប្រទេសិង្ហបុរីមិនដល់ ៣ លានតោនផង គឺគិតជាទឹកប្រាក់ត្រឹមតែប្រមាណ ៥ លានដុល្លារអាមេរិកប៉ុណ្ណោះ។ ប៉ុន្តែបើពិនិត្យមើលទិន្នន័យពីប្រទេសគេក្នុងរយៈពេលដូចគ្នានោះប្រទេសិង្ហបុរីបាននាំចូលខ្សាច់ពីប្រទេសកម្ពុជារហូតដល់ទៅ ៧៣ លានតោនគិតជាទឹកប្រាក់គឺប្រមាណ ៧៥០ លានដុល្លារអាមេរិក។ បញ្ហានេះលោកសម រង្ស៊ី បានចោទជាសំណួរថាតើលុយនោះបានទៅនរណា»?
ចំណែកប្រាក់ចំណូលពីការកាប់ព្រៃឈើវិញលោក សម រង្ស៊ី បានបំភ្លឺថាក្នុងរយៈពេល១០ឆ្នាំ ពីឆ្នាំ ២០០៥ ដល់ឆ្នាំ២០១៥ តាមការអះអាងរបស់រដ្ឋាភិបាលប្រទេសកម្ពុជាបាននាំចេញឈើទៅលក់នៅក្រៅប្រទេស តម្លៃត្រឹមតែ ៣៣៨ លានដុល្លារអាមេរិកប៉ុណ្ណោះ។ ប៉ុន្តែបើពិនិត្យមើលទិន្នន័យពីប្រទេសអ្នកទិញក្នុងរយៈពេលដូចគ្នានោះប្រទេសទាំងនោះបាននាំចូលឈើពីប្រទេសកម្ពុជាតម្លៃរហូតដល់ទៅ ១លាន ៣០០ដុល្លាសហរដ្ឋអាមេរិក។ ប្រការនេះលោកថា បាត់ប្រាក់ចំណូលចំនួន ៩៦២ លានដុល្លារអាមេរិក។ លោកសម រង្ស៊ី បានលើកឡើងដូចនេះគឺស្របពេលដែលក្រសួងរ៉ែនិងថាមពលបានហៅក្រុមសង្គមស៊ីវិលដែលចេញរបាយការណ៍អំពីការនាំខ្សាច់ទៅសិង្ហបុរីមកបំភ្លឺដោយប្រាប់ឱ្យស្ងប់ស្ងាត់រង់ចាំស៊ើបអង្កេតបន្ត ជុំវិញរឿងតួលេខ នៃតម្លៃនាំចេញសង្ស័យថាពុករលួយច្រើនរយលានដុល្លារ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជាលោក សន ជ័យ បានផ្តល់បទសម្ភាសន៍ឱ្យវិទ្យុស្ត្រីថា កម្ពុជាគឺជាប្រទេសដែលនាំចេញនូវវត្ថុធាតុដើមដែលធនធានមួយចំនួនមានដូចជា ខ្សាច់ និងព្រៃឈើជាដើម។ លោក សន ជ័យ ថា បើពិនិត្យទៅលើតុល្យភាពនៃការនាំចេញដូចជាការនាំឈើចេញដោយខុសច្បាប់គឺនៅតែមានទំហំមួយធំធេងហើយករណីនាំខ្សាច់ចេញក៏នៅតែជាមន្ទិលសង្ស័យថានៅតែមានករ ណីមិនប្រកីនៅទ្បើយ។ លោក សន ជ័យ ផ្តល់ជាអនុសាសន៍ថារដ្ឋាភិបាលត្រូវតែពិនិត្យករណីមួយចំនួន ឲ្យបានច្បាស់។
លោក សន ជ័យ៖« បាទប្រព័ន្ធនៃការទំនាក់ទំនងគ្នានៃចំនួនខ្សាច់ដែលនាំចូលទៅប្រទេសនានាហ្នឹងវាគួរតែជាអ្វីដែលគេត្រូវធ្វើឱ្យមានតម្លាភាពបានន័យថាការទំនាក់ទំនងគ្នា ចែករំលែកគ្នានូវព័ត៌មានខ្សាច់នាំចូលទៅSingapore ហើយនឹងចំនួនខ្សាច់នាំចេញពីកម្ពុជាហ្នឹងត្រូវមានការត្រួតពិនិត្យឱ្យបានម៉ត់ចត់ហើយមានការចែករំលែកព័ត៌មានគ្នារវាងរដ្ឋាភិបាល និងរដ្ឋាភិបាល ខ្ញុំគិតថាជម្រើសមួយដេលនាំឱ្យតម្លាភាព ហើយវានឹងកាត់បន្ថយមន្ទិលនៃការនាំខ្សាច់ចេញទៅប្រទេសគេដែលខុសច្បាប់»។
យ៉ាងណាក៏ដោយចុះអ្នកនាំពាក្យគណបក្សប្រជាជនកម្ពុជាលោក សុខ ឥសាន្ត ច្រានចោលការលើកទ្បើងនេះថាមិនមែនជាការពិតព្រោះរដ្ឋាភិបាលដឹកនាំប្រទេសសព្វថ្ងៃគឺធ្វើការដោយមានការទទួលខុសត្រូវមិនដូចការចោទប្រកាន់នោះទេ។
លោក សុខ ឥសាន្ត មានប្រសាសន៍ថា មិនមែនជារឿងចំលែកចំពោះការរិះគន់របស់លោក សម រង្ស៊ី នោះព្រោះការលើកទ្បើងរបស់លោក សម រង្ស៊ី តែងតែបំផ្លើសពីការពិត។ ករណីនេះលោក សុខ ឥសាន្ត បដិសេធទាំងស្រុងថាការលើកទ្បើងគឺមិនមែនជាការពិតនោះទ្បើយ។
លោក សុខ ឥសាន្ត៖«ជាការពិតហើយគេអ្នកធ្វើការហ្នឹងគេមានស្មារតីទទួលខុសត្រូវ មិនមែនស្នេហហាជាតិតែសម រង្ស៊ីតែម្នាក់ឯងនោះទេ ពីព្រោះតែស្នេហាជាតិហ្នឹងហើយបានរត់ចោលស្រុកហ្នឹងអញ្ចឹងទេអ្នកនៅក្នុងស្រុក ហ្នឹងវាមិនសុទ្ធតែអ្នកក្បត់ជាតិដូចគាត់ថាឯណាគេត្រូវការមានការទទួលខុសត្រូវ មានការត្រួតពិនិត្យ មានការណែនាំពីនាយករដ្ឋមន្ត្រីធ្វើត្រឹមត្រូវតាស មិនមែនចេះតែធ្វើអីផ្តេសផ្តាស់ឯណាក្រសួងនីមួយៗ បដិសេធទាំងស្រុងចំពោះការចោទប្រកាន់ដោយគ្មានមូលដ្ឋានហ្នឹង»។
បើយ៉ាងនេះក្ដីលោក សម រង្ស៊ី បានធ្វើគណនាលើ២បញ្ហានេះដោយបង្ហាញថាការបាត់បង់ប្រាក់ចំណូល ជាតិទាំង២វិស័យគឺចំណូលបានមកពីការបូមខ្សាច់និងព្រៃឈើនៅរយៈពេលមិនដល់១០ឆ្នាំគឺកម្ពុជាបានខាតបង់ ១៧០៧លានដុល្លារអាមេរិក៕
