ភ្នំពេញ ៖ សាលាដំបូងរាធានីភ្នំពេញ នៅថ្ងៃអង្គារទី ៨ វិច្ឆិកានេះ បានសម្រេចឱ្យលោក សម រង្ស៊ី ចាញ់ក្តីសម្តេចនាយករដ្ឋមន្ត្រី ហ៊ុន សែន ករណីដែលប្រធានគណបក្សប្រឆាំងរូបនេះ បានចោទសម្ដេចថា បាន ទិញ Like ក្លែងក្លាយ នៅលើបណ្តាញសង្គមហ្វេសប៊ុកដើម្បីបង្កើនប្រជាប្រិយភាព។
តាមសាលក្រម លោក សម រង្ស៉ី ត្រូវបានពិន័យ ១០ លានរៀល និងបង្គាប់ឱ្យសងជម្ងឺចិត្តទៅជនរងគ្រោះ ១៥ លានរៀល។
តែបែបនេះក្ដីលោក អ៊ឹម វណ្ណៈ ជាចៅក្រមជំនុំជម្រះសាលាដំបូងរាធានីភ្នំពេញ មិនបានផ្តន្ទាទោសលោក សម រង្ស៊ី ប្រធានគណបក្សប្រឆាំងឱ្យជាប់ពន្ធនាគារនោះទេ គឺត្រឹមតែចោទប្រកាន់ពីបទបរិហារកេរ្តិ៍ជាសាធារណៈតែប៉ុណ្ណោះ ។
លោក សំ សុគង់ មេធាវីការពារក្តីលោក សម រង្ស៊ី បានឱ្យប្រាប់វិទ្យុស្ត្រីនៅរសៀលថ្ងៃទី០៨ វិច្ឆិកានេះថា សម្រាប់លោកជាមេធាវីរួមទាំងកូនក្តីរបស់លោក មិនអាចទទួលបានទេចំពោះការសាលក្រមនេះ។ លោកបានបន្តថា លោកនឹងប្តឹងជំទាស់ទៅសាលាឧទ្ធរណ៍បន្តទៀត។
ចំណែកលោក សម រង្ស៊ី បានបង្ហោះសារបែបចំអកនោះលើទំព័រហ្វេសប៊ុករបស់លោកថា លោកមិនខ្វល់ពីពាក្យបណ្តឹងនេះទេ ហើយលោកនៅតែហ៊ានអះអាងថា លោក ហ៊ុន សែន ប្រើមន្ត្រីនិងបុគ្គលិកក្រោមឱវាទឲ្យបង្កើតគណនី Facebook ក្លែងក្លាយ ដើម្បីផ្តល់ "Like" ក្លែងក្លាយឲ្យទៅទំព័រ Facebook។
លោកថា សម្ដេច ហ៊ុន សែន ក៏បានទិញ "Like" ក្លែងក្លាយ យ៉ាងសន្ធឹកសន្ធាប់ពីច្រើនប្រទេសទូទាំងពិភពលោក ដើម្បីបង្អួតពីប្រជាប្រិយភាពក្លែងក្លាយ។
លោក សម រង្ស៊ី សរសេរបន្ថែមថា៖«បន្ទាប់មកទៀត លោក ហ៊ុន សែន ក៏យកប្រជាប្រិយភាពក្លែងក្លាយរបស់គាត់នេះ មកសំអាង ដើម្បីធ្វើជាមូលដ្ឋាននយោបាយ ក្នុងការបង្ក្រាបអ្នកដែលហ៊ាននិយាយទិតៀនគាត់។
សូមបញ្ជាក់ថា កាលពីថ្ងៃទី១០ ខែមីនា ឆ្នាំ២០១៦ លោក សោម សឿន ជារដ្ឋមន្ត្រីអមនាយករដ្ឋមន្ត្រី បានប្តឹងលោក សម រង្ស៊ី ប្រធានគណបក្សសង្គ្រោះជាតិ ដោយផ្អែកលើសាររបស់លោក សម រង្ស៊ី ដែលបង្ហោះនៅលើទំព័រហ្វេសប៊ុកធ្វើជាអង្គហេតុក្នុងការប្តឹង ។
ក្នុងពាក្យបណ្ដឹងលោក សោម សឿន បានបញ្ជាក់ថា សារដែលលោក សម រង្ស៊ី បានបង្ហោះលើបណ្តាញសង្គមគឺមានខ្លឹមសារមូលបង្កាច់ខុសពីការពិត។ លោក សោម សឿន ជាម្ចាស់បណ្តឹងបានចាត់ទុកថា ការបង្ហោះនេះបានធ្វើឱ្យប៉ះពាល់ដល់កិត្តិយសថ្នាក់ដឹកនាំជាតិ និងខ្លួនលោកផ្ទាល់យ៉ាងធ្ងន់ធ្ងរ៕
