ភ្នំពេញ៖ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នៅពាក់កណ្តាលខែវិច្ឆិកា ខាងមុខនេះ សាលាក្រុង បានសាងសង់បង្គន់សាធារណៈចំនួន ៥ ទីតាំង សម្រាប់ដាក់ឲ្យប្រើប្រាស់នៅក្នុងព្រះរាជពិធីបុណ្យអុំទូក។ ខណៈដែលក្រុមហ៊ុនប្រមូលសំរាមស៊ីនទ្រី រួមទាំងអាជ្ញាធរសាលារាជធានីភ្នំពេញ បង្កើនចំនួនអ្នកប្រមូលសំរាម និងរថយន្តដឹកសំរាមទ្វេដង។ លើសពីនេះ អាជ្ញាធរបានត្រៀមកម្លាំងសមត្ថកិច្ចជាង១ម៉ឺននាក់ ដើម្បីការពារសុវត្ថិភាពប្រជាពលរដ្ឋដែលមកទស្សនាការប្រណាំងទូក ក្នុងរយៈពេល ៤ថ្ងៃ។
អភិបាលរាជធានីភ្នំពេញ លោក ប៉ា សុជាតិវង្ស នៅព្រឹកថ្ងៃទី០៥ ខែវិច្ឆិកានេះ បានសរសេរនៅលើ Facebook របស់លោកថា ក្រុមការងារការដ្ឋានសាងសង់បង្គន់អនាម័យសាធារណៈនៅសួនច្បារ ក្រម ង៉ុយ សម្រេចបាន៩៨% ហើយ។
លោកថា បង្គន់អនាម័យសាធារណៈទាំងនោះ គឺសម្រាប់ប្រជាពលរដ្ឋមកលំហែកំសាន្តនៅសួនច្បារ និងត្រៀមដាក់ឲ្យប្រើប្រាស់ក្នុង ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលក្នុងនោះគឺមានបង្គន់សាធារណៈចំនួន ៥ទីតាំង ដែលរួមមាន សួនច្បារមាត់ទន្លេជាប់សាលចតុមុខ សួនច្បារក្រម ង៉ុយ សួនច្បារបទុមវតីជាប់វិថី ស៊ូ ស្រ៊ុនសួនច្បារបទុមវតីក្នុងទីធ្លាសួនកុមារ សួនច្បារអរិយក្សត្រ។
ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នឹងប្រារព្ធធ្វើនៅថ្ងៃទី១៣ ១៤ និងថ្ងៃទី១៥ ខែវិច្ឆិកា ឆ្នាំ២០១៦ ដោយមានកងកម្លាំងសមត្ថកិច្ចជាង១ម៉ឺននាក់ នឹងដាក់ការពារសន្តិសុខ សណ្តាប់ធ្នាប់។ នៅក្នុងព្រះរាជពិធីបុណ្យអុំទូក ឆ្នាំនេះ មានទូកង ចូលរួមប្រណាំងជាង ២០០ គ្រឿង និងមានកីឡាករអុំទូក ប្រមាណ ១ម៉ឺន ៦ពាន់នាក់។
ក្នុងព្រះរាជពិធីបុណ្យអុំទូកនេះដែរ សាលារាជធានីភ្នំពេញ និងក្រុមហ៊ុនស៊ីនទ្រីបានបង្កើនចំនួន អ្នកប្រមូលសំរាម និងចំនួនឡានដឹកសំរាមជាច្រើនគ្រឿង ដើម្បីត្រៀមសម្អាត់បរិស្ថាន នៅរាជធានីភ្នំពេញ។
បើតាមទីភ្នាក់ងារសារព័ត៌មានជាតិ AKP បានឲ្យដឹងថា លោក អ៊ិត ចាន់ដា ប្រធានការិយាល័យអតិថិជន និងសំអាតក្រុង នៃក្រុមហ៊ុនស៊ីនទ្រី មានប្រសាសន៍ថា សាលារាជធានីភ្នំពេញ និងក្រុមហ៊ុនលោក បានត្រៀមកម្លាំងជិត ២០០០នាក់ ដើម្បីសំអាត និងប្រមូលសំរាម ក្នុងរាជធានីភ្នំពេញ ក្នុងឱកាសព្រះរាជពិធីបុណ្យអុំទូករយៈពេល៣ថ្ងៃនេះ។
លោក ចាន់ដា បន្តថា នៅក្នុងឱកាសព្រះរាជពិធីបុណ្យអុំទូកសំរាមអាចនឹងកើនឡើងពី៣០០តោន ទៅ៤០០តោនក្នុងមួយថ្ងៃ។ លោកថា ក្រុមហ៊ុនស៊ីនទ្រីបានបែងចែកក្រុមអ្នកបោសសំអាត និងប្រមូលសំរាម ចំនួន១០ក្រុម ដោយចែកជាពីរវេន គឺវេនយប់ និងវេនថ្ងៃ។
សូមបញ្ជាថា ពាក់ព័ន្ធនឹងបញ្ហាសំរាមនៅថ្ងៃបុណ្យអុំទូកខាងមុខនេះ អង្គភាពសួនច្បារ និងរុក្ខជាតិ រាជធានីភ្នំពេញ ក៏បានរៀបចំកម្លាំង ប្រចាំការសម្រាប់បោសសំអាត និងប្រមូលសំរាមតាមសួនច្បារជាង២០០នាក់ ដោយចាប់ផ្តើមបោសសំអាត ចាប់ពីម៉ោង១១យប់ រហូតដល់ ម៉ោង៨ព្រឹក៕