ភ្នំពេញ៖ កងកម្លាំងសមត្ថកិច្ចជាង១ម៉ឺននាក់ នឹងដាក់ការពារសន្តិសុខ សណ្តាប់ធ្នាប់ ក្នុងព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នៅថ្ងៃទី ១៣ ១៤ និង ១៥ ខែ វិច្ឆិកា ឆ្នាំ ២០១៦។នៅក្នុងព្រះរាជពិធីបុណ្យអុំទូក ឆ្នាំនេះ មានទូកង ចូលរួមប្រណាំងចំនួន ២៥៦ គ្រឿង និងមានកីឡាករអុំទូក ប្រមាណ ១ម៉ឺន ៦ពាន់នាក់។
នៅក្នុងឱកាសព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក រយៈពេល ៤ថ្ងៃនេះដែរ ក្រសួងការងារ និងបណ្ដុះបណ្ដាលវិជ្ជាជីវៈ បានចេញសេចក្ដីជូនដំណឹងមួយដល់ ម្ចាស់សហគ្រាស និងគ្រឹះស្ថានទាំងអស់ ត្រូវអនុញ្ញាតឲ្យកម្មករ និយោជិត បានឈប់សម្រាកថ្ងៃបុណ្យអុំទូករយៈពេល ៤ថ្ងៃ ដោយមានប្រាក់ឈ្នូលផងដែរ។
ចំណែក រដ្ឋមន្ដ្រីក្រសួងសុខាភិបាល លោក ម៉ម ប៊ុនហេង បានត្រៀមក្រុមគ្រូពេទ្យ ២៤ ខេត្ត ឱ្យចុះការពារសុខភាព ជូនកីឡាករ កីឡាការនី អុំទូក ដែលត្រូវមកអុំទូកនៅរាជធានីភ្នំពេញ នៅថ្ងៃទី ១៣ ១៤ ១៥ វិច្ឆិកា ខាងមុខនេះ។
កម្ពុជាបានខកខានប្រារព្ធពិធីបុណ្យអុំទូករយៈពេល ៤ ឆ្នាំមកហើយ ដោយសារតែមានបញ្ហាផ្សេងៗកើតឡើង។ ឆ្នាំ២០១២ ខកខានដោយសារតែព្រះមហាក្សត្រសោយទិវង្គត។ ឆ្នាំ២០១៣ ខកខានដោយសារស្ថានភាពនយោបាយ ឯឆ្នាំ២០១៤ ដោយសារទឹកជន់ច្រើន។ តែឆ្នាំ២០១៥ ខកខានដោយសារទឹកតិចទៅវិញ។
បែបនេះក្ដី សោកនាដកម្មមួយនៅលើស្ពានកោះពេជ្រ អំឡុងព្រះរាជពិធីបុណ្យអុំទូក នាថ្ងៃទី២២ វិច្ឆិកា ឆ្នាំ២០១០ បណ្តាលឱ្យមនុស្សស្លាប់ ៣៥៣នាក់ និងរបួស៣៩៣នាក់នោះ ភាគច្រើនជាយុវជន៕
