ភ្នំពេញ៖ ក្រោយបញ្ចប់កិច្ចប្រជុំជាមួយគណៈកម្មការរៀបចំបុណ្យសពលោក ប៉ែន សុវណ្ណ សាលារាជធានីភ្នំពេញបានសម្រេចឱ្យ បូជាសពលោក ប៉ែន សុវណ្ណ នៅក្នុងបរិវេណវត្តនិរោធ ស្ថិតនៅខណ្ឌច្បារអំពៅវិញ។
ការសម្រេចដូចនេះ បន្ទាប់ពីសាលារាជធានីភ្នំពេញបានបដិសេធ មិនឱ្យបូជានៅខាងមុខវត្តបទុមវតី និងវត្តពីពោធិ៍យ៉ារាម ហៅវត្តចាស់ តាមការស្នើសុំរបស់គណបក្សសង្គ្រោះជាតិ។
យោងតាមកំណត់ហេតុនៃកិច្ចប្រជុំកាលពីថ្ងៃទី ០២ វិច្ឆិកា ម្សិលមិញ សាលារាជធានីបានបញ្ជាក់ថា បរិវេណវត្តនិរោធ មានទីធ្លា ធំទូលាយងាយស្រួលក្នុងការដង្ហែសព។ ចំណែកទីតាំងវត្តចាស់ដែលបានស្នើសុំ គឺជាទីអារាមធម្មតាៗ ពុំមែនមានឈាបនដ្ឋានសម្រាប់បូជាសពនោះទេ។ សាលារាជធានីថា បើធៀបចំងាយផ្លូវ ពី វត្តថាន់ ទៅវត្តនិរោធ និង កន្លែងតម្កល់សពមានលក្ខណៈល្អប្រសើរ ជាងវត្តចាស់។
កំណត់ហេតុដដែលបានបញ្ជាក់ថា ចំពោះការរៀបចំពីធីបូជាសព លោក ប៉ែន សុវណ្ណ នៅវត្តនិរោធ នៅថ្ងៃទី០៦ ខែវិច្ឆិកា គណៈកម្មការរៀបចំបុណ្យត្រូវធ្វើលិខិតស្នើសុំជាមុនទៅព្រះចៅអធិការវត្ត និងគណៈកម្មការគ្រប់គ្រង់វត្តនិរោធ។
កំណត់ហេតុរបស់សាលារាជធានីភ្នំពេញ ដែលចុះហត្ថលេខាដោយលោក ឃួង ស្រេង អភិបាលរងសាលារាជធានីភ្នំពេញ និងមានការឯកភាពពីគណៈកម្មការរៀបចំបុណ្យ បានបញ្ជាក់បន្ថែមថាចំពោះការដង្ហែនេះ គណៈកម្មការរៀបបុណ្យត្រូវទទួលខុសត្រូវចាត់ចែងដោយខ្លួនឯង ហើយសមត្ថកិច្ច និងជួយសម្រួលផ្នែកសណ្តាប់ធ្នាប់ចរាចរណ៍។
ក្នុងករណីមានជនបង្កការអុកឡុកត្រូវរាយការណ៍ជូនសមត្ថកិច្ច ដើម្បីចាត់វិធានការបានទាន់ពេលវេលា។ កំណត់ហេតុនេះ បន្តថា គណៈកម្មការបុណ្យត្រូវអនុវត្តតាមគោលការណ៍ដែលបានឯកភាពគ្នា ជាមួយរដ្ឋបាលរាជធានីភ្នំពេញ ក្នុងករណីអនុវត្តផ្ទុយពីខ្លឹមសារខាងលើ គណៈកម្មាការត្រូវទទួលខុសត្រូវទាំងស្រុងចំពោះមុខច្បាប់។
សូមជម្រាបថា លោក ប៉ែន សុវណ្ណ តំណាងរាស្ត្រគណបក្សសង្គ្រោះជាតិ មណ្ឌលកំពង់ស្ពឺបានទទួលមរណៈភាពកាលពីថ្ងៃ២៩ ខែតុលា ឆ្នាំ២០១៦ នៅខេត្តតាកែវ។ កាលពីថ្ងៃទី០២ វិច្ឆិកា សពរបស់លោកត្រូវគណៈកម្មាការរៀបចំបុណ្យដង្ហែ យកមកតម្កល់ធ្វើបុណ្យនៅវត្តថាន់រាជធានីភ្នំពេញ៕
