ភ្នំពេញ៖ សម្តេច ហ៊ុន សែន នាយករដ្ឋមន្ត្រីកម្ពុជា ចង់ឲ្យបេក្ខជនប្រកួតប្រជែងតំណែងប្រធានាធិបតីមកពីគណបក្សសាធារណរដ្ឋ លោក ដូណាល់ត្រាំ ជាប់ឆ្នោតបានធ្វើជាប្រធានាធិបតីអាមេរិក។
សម្តេចថា បើលោកត្រាំ ជាប់ឆ្នោតពិភពលោកនឹងប្រែប្រួលទៅល្អប្រសើរ ដោយគ្មានសង្គ្រាម ព្រោះលោក ដូណាល់ត្រាំ ជាពាណិជ្ជករ។
សម្តេច ហ៊ុន សែន៖«ខ្ញុំនិយាយដោយត្រង់ ខ្ញុំចង់ឲ្យត្រាំឈ្នះខ្លាំងណាស់។ បើត្រាំឈ្នះ ពិភពលោកអាចនឹងមានការប្រែប្រួល ហើយអាចមានសភាពការណ៍ល្អផង ដោយសារត្រាំ អ្នករកស៊ី បើត្រាំអ្នករកស៊ី គឺត្រាំមិនចង់ឲ្យមានសង្គ្រាមទេ អាហ្នឹងនិយាយឲ្យពិត»។
សម្តេច បានថ្លែងដូចនេះ កាលពីព្រឹកថ្ងៃទី០៣ ខែវិច្ឆិកា ក្នុងពេលលោកអញ្ជើញធ្វើ បឋកថាស្តីពី ការដឹកនាំបញ្ជា កម្លាំង សភាពការណ៍ជាតិ អន្តរជាតិ និងបញ្ហាផ្សេងៗ នៅបណ្ឌិតសភានគរបាលកម្ពុជា។
សម្តេច បញ្ជាក់ទៀតថា ប្រសិនបើលោកស្រី ហ៊ីលឡារី គ្លីនតុន ជាប់ឆ្នោតជាប្រធានាធិបតីវិញ ពិភពលោកអាចនឹងមានសង្គ្រាម។ ម្យ៉ាងទៀត បើលោកស្រី គ្លីនតុន ជាប់ឆ្នោត ទំនាក់ទំនងអាមេរិក និងរុស្ស៊ី គ្មានភាពល្អប្រសើរហើយ ផ្ទុយទៅវិញ បើលោកត្រាំ ជាប់ឆ្នោត ទំនាក់ទំនង រុស្ស៊ី និងអាមេរិក នឹងក្លាយជាមិត្តយ៉ាងល្អ។
សម្តេចថ្លែងថា៖« ប្រសិនបើលោកស្រី ហ៊ីលឡារី គ្លីនតុន ជាប់ឆ្នោតទំនាក់ទំនងអាមេរិក និងចិន អាចទ្រាំទ្របាន តែទំនាក់ទំនងអាមេរិក និងរុស្ស៊ី នឹងមានការលំបាក។ តែបើលោក ត្រាំ ឈ្នះឆ្នោតវិញ លោកត្រាំ អាចនឹងក្លាយជាមិត្តភក្តិជាមួយលោក ពូទីន ប្រធានាធិបតីរុស្ស៊ី»។
នេះបើយោងតាមគេហទំព័រ Fresh News។ការ បោះឆ្នោត ប្រធានាធិបតីអាមេរិក លើកទី៤៥នេះ នឹងចាប់ផ្ដើម នៅថ្ងៃអង្គារទី៨ វិច្ឆិកា ឆ្នាំ២០១៦។ ការបោះឆ្នោតនេះ ធ្វើឡើង ដើម្បី ជំនួស លោក បារ៉ាក់អូបាម៉ា ដែលបានកាន់អំណាច ពីរអាណត្តិ៨ឆ្នាំមកនេះ ។
តាមការស្ទង់ មតិរបស់បណ្ដាញផ្សាយព័ត៌មាន CNN លោកដូណាល់ត្រាំ មានការគាំទ្រ តិចជាងលោកស្រីហ៊ីលឡារីគ្លិនតុន មួយភាគរយ ។ តែបើតាម BBC លោកដូណាល់ត្រាំ មានការគាំទ្រ តិចជាងលោក ស្រីគ្លិនតុន បីភាគរយ ៕ ។ យ៉ាងណាក៏ដោយការស្ទង់មិត ABC បង្ហាញថាលោកដូណាល់ត្រាំ ១ ភាគរយវិញ គឺ៤៦ ទល់ ៤៥៕