ភ្នំពេញ៖ យ៉ាងតិចធនាគារចំនួន៨ត្រូវបានសមត្ថកិច្ចវាយឆ្មក់ ដើម្បីពិនិត្យមើលគណនីរបស់លោកស្រី Choi Soon-sil ខណៈដែលរដ្ឋអាជ្ញាកំពុងចោទសួរលោកស្រី ករណី រឿងអាស្រូវមួយនេះ ដែលលោកស្រី ប្រើប្រាស់ឥទ្ធិពលរបស់លោកស្រី ប្រធានាធិបតីប៉ាក គុនហេ។
តាមសេចក្ដីរាយការណ៍របស់បណ្ដាញផ្សាយព័ត៌មាន BBC ពួករដ្ឋអាជ្ញាបានចោទសួរ លោក Choi Soon-sil កាលពីថ្ងៃពុធ ទី២ វិច្ឆិកា គឺ ភ្លាមៗបន្ទាប់ពីរដ្ឋអាជ្ញា បានសម្រេចឃុំខ្លួនលោកស្រី កាលពីល្ងាចថ្ងៃអង្គារ៍។
សេចក្ដីរាយការណ៍បានបញ្ជាក់ទៀតថា នៅពេលដែលលោកស្រី Choi Soon-sil រដ្ឋអាជ្ញាកំពុងចោទសួរនោះ គឺ សមត្ថកិច្ចប្រឆាំងអំពើពុករលួយរបស់ប្រទេសក៏បាន វាយលុកចូលធនាគារចំនួន៨កន្លែង ដើម្បីស្រាវជ្រាវលើមូលនិធិមួយចំនួន ដែលអ្នកស្រីទទួលបានពីការប្រើប្រាស់ឥទ្ធិពលប្រធានាធិបតី លោកស្រី ប៉ាក គុនហេ។
អ្នកនាំពាក្យតុលាការទីក្រុងសេអ៊ូល បាននិយាយថា លោកស្រី Choi Soon-sil នឹងបន្ដឃុំខ្លួនមួយថ្ងៃទៀត រហូតដល់ថ្ងៃព្រហស្បតិ៍នេះ បើរកកំហុសឃើញ នឹងបញ្ចូនខ្លួនទៅកាន់តុលាការដើម្បីធ្វើការចោទប្រកាន់។
ជាមួយគ្នានេះ លោកស្រី ប៉ាក គុនហេ បានសម្រេចរុះរើគណៈរដ្ឋមន្ដ្រីរបស់លោក ដោយដកហូតតំណែងនាយករដ្ឋមន្ដ្រីម្នាក់ បន្ទាប់ពីមានការសង្ស័យថា នាយករដ្ឋមន្ដ្រីរូបនេះក៏នៅពីក្រោយលោកស្រី Choi Soon-sil ផងដែរ។
កាលពីថ្ងៃអាទិត្យចុងសប្ដាហ៍កន្លងទៅនេះបាតុកររាប់ម៉ឺននាក់ បានធ្វើបាតុកម្មដោយទាមទារឱ្យលោកស្រី ប៉ាក គុនហេ ចាកចេញពីតំណែង ដោយសារតែមានការចោទប្រកាន់ ថា លោកស្រី បណ្ដោយអោយមិត្តភក្ដិរបស់ខ្លួន គឺ លោកស្រី Choi Soon-sil ប្រើប្រាស់ឥទ្ធិពលប្រធានាធិបតីដើម្បី រៃអង្គាសប្រាក់មូលនិធិ៕ ប្រភព:BBC
