កូឡាឡាំពូ៖ លោក Mahathir Mohamad អតីតនាយករដ្ឋមន្ដ្រីនៃប្រទេសម៉ាឡេស៊ីដែលកាន់អំណាចយូរជាងគេរបស់ប្រទេសមូស្លីមមួយនេះបានព្រមានថា ប្រាក់កម្ចីច្រើនលើសលប់ខ្ចីពីប្រភពតែមួយប្រទេសគឺអាចនឹងនាំឲ្យប្រទេសនេះបាត់បង់អធិបតេយ្យភាពរបស់ខ្លួន។
លោក Mahathir Mohamad បានថ្លែងដូចនេះនៅក្នុងកិច្ចប្រជុំមួយនៃថ្នាក់ដឹកនាំគណបក្សទើបង្កើតថ្មីគឺគណបក្ស Parti Pribumi Bersatu Malaysia (PPBM) បានធ្វើឡើងនៅថ្ងៃ ពុធ ទី ០២ វិច្ឆិកា នេះ។
លោក Mahathir បានបន្ដថា ការជំពាក់បំណុលប្រទេសតែមួយអាចនាំឲ្យមានហានិភ័យទៅថ្ងៃមុខហើយមិនត្រឹមប៉ុណ្ណោះធ្វើឲ្យបាត់បង់នៅអធិបតេយ្យភាពរបស់ខ្លួន ដូចជាករណីដែលម៉ាឡេស៊ី កំពុងតែមានជម្លោះនៅសមុទ្រចិនខាងត្បូងជាមួយចិន។
តាមបណ្ដាញផ្សាយព័ត៌មាន Channel News Asia ប្រទេសម៉ាឡេស៊ី បានខ្ចីប្រាក់ពីចិន ១៣ ពាន់ លានដុល្លាថែមទៀតដើម្បីស្ថាបនាផ្លូវរថភ្លើងមួយខ្សែដែលមានចំងាយ ៦០០ គីឡូម៉ែត្រ ដែលបំណុលថ្មីនេះនាំឲ្យលោក មហាធា ព្រួយបារម្ភអំពីការកើនឡើងបំណុលបរទេស។
លោក Mahathir Mohamad បានបញ្ជាក់ដូចនេះថា៖«មើលទៅយើងកំពុងតែដើរលើផ្លូវមួយដោយការធ្វើសេចក្ដីសម្រេចចិត្ដដោយខ្លួនឯង។ យើងមិនបានគិតអំពីគោលនយោបាយដែលកំពុងជាប់បំណុលចិន ហើយវាអាចនឹងបំផ្លាញ ដែលគោលការណ៍អាស៊ាន ចំពោះការដោះស្រាយដែនអធិបតេយ្យនៃសមុទ្រចិនខាងត្បូង។ យើងបង្កើតអាស៊ាននេះឡើង គឺដើម្បីដោះស្រាយជម្លោះរបស់យើង។ ប្រសិនបើយើងមិនប្រឹក្សារឿងនេះជាមួយប្រទេសជិតខាង គឺវានឹងអាចបង្កឲ្យមានជម្លោះ ហើយថា តើជម្លោះនោះនឹងដោះស្រាយតាមរបៀបណា»៕