ភ្នំពេញ៖ បន្ទាប់ពីមានសាររិះគន់ទៅលើប្រធានគណបក្សសង្គ្រោះជាតិលោក សម រង្ស៊ី ពីកញ្ញា កឹម មនោវិទ្យា ដែលជាអនុប្រធានផ្នែកកិច្ចការសាធារណៈ របស់គណបក្សសង្គ្រោះជាតិ និងជាកូនស្រីច្បងលោក កឹម សុខា នៅថ្ងៃទី២៦ តុលានេះ លោក យ៉ែម បុញ្ញឬទ្ធិ ថាលោកមិនច្បាស់ថា ការលើកឡើងរបស់កញ្ញា កឹម មនោវិទ្យា ជាការពិតឬយ៉ាងណាទេ។
លោកបន្តថា ដោយសារតែការលើកឡើងនោះធ្វើឡើងនៅក្នុងបណ្តាញសង្គម ដែលអ្នកណាក៏អាចបង្កើតគណនីថ្មីបានដែរ។
អ្នកនាំពាក្យរូបនេះ បានលើកឡើងបន្តថា៖«ខ្ញុំអត់យល់អញ្ចឹងទេ ពីព្រោះព័ត៌មានដែលលើកហ្នឹងគឺព័ត៌មានបណ្តាញសង្គមហ្វេសប៊ុក។ ដូចច្នេះហ្វេសប៊ុក អ្នកណាក៏អាចបង្កើតគណនីបាន ចូលខមមិនបានគ្រប់គ្នា។ ដូច្នេះវាគ្មានអីជាមូលដ្ឋាន ជាគោលការណ៍របស់គណបក្សនោះទេ»។
កាលពីយប់ថ្ងៃទី ២៣ តុលា គេឃើញសារមួយ បង្ហោះនៅលើបណ្តាញសង្គមធ្វីតធើរ ជាភាសាអង់គ្លេស នៃគណនីរបស់កញ្ញា កឹម មនោវិទ្យា បានសរសេរ ថា ការហាមឃាត់មិនឱ្យលោកសម រង្ស៊ី វិលចូលស្រុកវិញ គឺជាលេសមួយសម្រាប់លោក សម រង្ស៊ី បាននិរទេសខ្លួននៅបរទេសបន្តទៀត។
សារនេះ បន្តថាអស់រយៈពេលមួយឆ្នាំមកហើយ គឺនៅពេលនេះ លោក សម រង្ស៊ី អាចប្រកាសជាផ្លូវការនូវការនិរទេសខ្លួន និងមានហេតុផលស្របច្បាប់ក្នុងការស្ថិតនៅបរទេសបន្តទៀត។
ប៉ុន្តែចំនុចមួយដែលមានការសង្ស័យ ត្រង់សរសេរថា៖ «រដ្ឋាភិបាលខែ្មរនឹងហៅស្ថានភាពនេះជាការឈ្នះៗ គឺ សម រង្ស៊ី ឈ្នះ ហើយគណបក្សប្រជាជនកម្ពុជាក៏ឈ្នះ»។
ការលើកឡើងបែបនេះ ធ្វើឡើងបន្ទាប់ពីរដ្ឋាភិបាលកម្ពុជា បានចេញលិខិតមួយ ហាមឃាត់មិនឱ្យលោក សម រង្ស៊ី ចូលប្រទេសកម្ពុជាវិញ។
យ៉ាងណាមិញការរិះគន់លើប្រធានគណបក្សប្រឆាំងនេះ មិនមែនជាលើកទីមួយដោយ កន្លងមក កូនស្រីរបស់លោក កឹម សុខា រូបនេះ ក៏ធ្លាប់បានធ្វើការិះគន់ទៅលើ លោក សម រង្ស៊ី ដែរ ពេលដែលលោកប្រកាសចង់វិលចូលស្រុកវិញ៕