ភ្នំពេញ៖ អតីតអ្នកបើកទ្បានឱ្យក្រុមហ៊ុនកាពីតូល ទាំង ៤៥ នាក់គ្រោងធ្វើកូដកម្មសាជាថ្មីទៀតនៅថ្ងៃទី ២៨ ខែតុលា បន្ទាប់ពីពួកគេថាកូដកម្មនាពេលកន្លងមក មិនទាន់មានដំណោះស្រាយ។ ការថ្លែងនេះធ្វើទ្បើងនៅក្នុងសន្និសិទសារព័ត៌មានស្តីពី ការរំលោភសិទ្ធិ និងអំពើហិង្សានៃក្រុមហ៊ុនកាពីតូលមកលើបុគ្គលឹក៤៥នាក់ នាព្រឹកថ្ងៃទី ២៥ ខែតុលា ឆ្នាំ២០១៦នេះ។ លោក ជួន សារ៉េត រាយការណ៍៖
បន្ទាប់ពីមានការតវ៉ាធ្វើកូដកម្មជាច្រើនលើក ច្រើនសារកន្លងមកមិនទាន់ទទួលបានលទ្ធផលតាមការចង់បាន ពួកគេបានសម្រេចចិត្ត ជាថ្មីទៀតថា នឹងធ្វើកូដកម្មនៅថ្ងៃទី ២៨ ខែតុលា ខាងមុខនេះដើម្បីឱ្យក្រុមហ៊ុនកាលពីតូល គោរពច្បាប់ការងារ និងយកពួកគេឱ្យចូលធ្វើការងារវិញ។
តំណាងកម្មករនិយោជិត អតីតអ្នកបើកទ្បានឱ្យក្រុមហ៊ុន កាលពីតូលម្នាក់ ក្នុងចំណោមបុគ្គលឹក ៤៥ នាក់ផ្សេងទៀត ដែលត្រូវបានក្រុមហ៊ុនកាពីតូល សម្រេចបឈ្ឈប់ពួកគេពីការងារនោះ គឺលោក ប៉ិល វឿន បានផ្តល់បទសម្ភាសន៍ ឱ្យវិទ្យុស្ត្រីនៅថ្ងៃនេះថា លោកត្រូវបានក្រុមហ៊ុន កាពីតូល បឈ្ឈប់រូបលោករយៈពេលជាង ១៦ ខែហើយ។
លោក ប៉ិល វឿន បន្តថាដើមចមឈានទៅដល់ការបឈ្ឈប់បុគ្គលឹកនេះ ទំនងមកពីពួកគាត់ទាមទារឱ្យក្រុមហ៊ុនគោរពច្បាប់ ឈប់រើសអើងសហជីពជាដើមទើបបង្កឱ្យថៅកែសម្រេចបឈ្ឈប់ពួកគេពីការងារ។ លោក ប៉ិល វឿន សង្កត់ធ្ងន់ថា លោកនឹងចូលរួមធ្វើកូដកម្ម នៅថ្ងៃទី ២៨ ខាងមុខនេះដោយលោកគូសបញ្ជក់ថា លោកស៊ូស្លាប់ទាមទារ រកយុត្តិធម៌ពីក្រុមហ៊ុនកាពីតូល ឱ្យទាល់តែបានគឺតាមរយៈការ ធ្វើកូដកម្មដោយអហិង្សា។
លោក ប៉ិល វឿន៖«ខ្ញុំអត់បានព្រួយបារម្ភអ្វីទាំងអស់ហើយខ្ញុំត្រូវធ្វើការតវ៉ារបស់ខ្ញុំ ខ្ញុំនិយាយថាសម្លាប់ខ្ញុំចោលបានខ្ញុំឈប់តវ៉ា ហើយក៏ចាប់ខ្ញុំដាក់គុកបានខ្ញុំឈប់ទៅតវ៉ា ប៉ុន្តែបើខ្ញុំចេញពីគុកទៅតវ៉ានៅកន្លែងកាពីតូលម្តងទៀតបាទ អានេះខ្ញុំប្រាប់ជម្រើសរបស់ខ្ញុំវាអស់ជំរើសឱ្យខ្ញុំធ្វើខ្ញុំត្រូវតែធ្វើអញ្ចឹង មុននឹងថ្ងៃទី ២៨ ខាងមុខនេះ ខ្ញុំបានផ្តាំប្រពន្ធកូនថាថ្ងៃទី២៨ កុំគិតពីរឿងខ្ញុំជាប់គុកជាប់ច្រវ៉ាក់ ហើយរឿងស្លាប់កុំគិតឱ្យសោះ ព្រោះខ្ញុំអត់បានពាក់ព័ន្ធរឿងនយោបាយអីទេ ខ្ញុំទៅទាមទារទៅតាមផ្លូវច្បាប់សិទ្ធិសេរីភាពកម្មករទាំងអស់ខ្ញុំធ្វើ»។
ចំណែកឯ អគ្គលេខាធិការនៃសហព័ន្ធសហជីពកម្មករ វិស័យដឹកជញ្ជូនកម្ពុជា លោក អៀង គឹមហ៊ុន មានប្រសាសន៍ថា គោលបំណងសំខាន់ធ្វើសន្និសិទសារព័ត៌មានថ្ងៃនេះ គឺដើម្បី ទាមទារឱ្យថៅកែក្រុមហ៊ុនកាពីតូល ទទួលបុគ្គលឹកដែលត្រូវបានថៅកែបឈ្ឈប់ពីការងារនោះ បានចូលធ្វើការងារជាធម្មតាវិញ និងទីពីរ គិតប្រាក់រំលឹកចាប់ពីថ្ងៃបឈ្ឈប់រហូតដល់ថ្ងៃចូលធ្វើការ។
លោក អៀង គឹមហ៊ុន បានអំពាវនាវឱ្យសម្តេច ហ៊ុន សែន និងរដ្ឋមន្ត្រីក្រសួងការងារចូលសម្របសម្រួលបញ្ចប់វិវាទដែលកើតទ្បើងជាយូរមកហើយនោះ មានន័យថាត្រូវដាក់សម្ពាធទៅលើក្រុមហ៊ុនកាលពីតូលឱ្យគោរពច្បាប់ការងារ និងទទួលយក កម្មករ ឱ្យចូលធ្វើការងារវិញ។
លោក អៀង គឹមហ៊ុន បង្ហាញគោលជំហរថា នឹងតវ៉ា រហូតទាល់តែមានដំណោះស្រាយសមស្របដែលកម្មករនិយោជិក អាចទទួលយកបានទើបឈប់ធ្វើការតវ៉ា។
«បាទនៅថ្ងៃទី២៨ យើងនឹងធ្វើការតវ៉ាដើម្បីឱ្យថៅកែកាពីតូល បានដឹងពីព័ត៌មាន ហើយនឹងឱ្យរដ្ឋាភិបាលបានដឹង ហើយប្រជាពលរដ្ឋ បានដឹងថាយើងទៅរកយុត្តិធម៌ បើសិនលទ្ធផលមិនបាននោះទេយើងនឹងធ្វើយុទ្ធនាការធំ គោលបំណងយើងអត់ថយក្រោយនោះទេដាច់ខាតយើងត្រូវទៅមុខ យើងទៅរកយុត្តិធម៌ យើងមិនមែនទៅវាយគ្នានោះទេ រឿងវាយគ្នាយើងអត់មានបំណងនោះទេ»។
រីឯប្រធានសហភាពការងារកម្ពុជាលោក អាត់ ធន់ មានប្រសាសន៍ថា ការរំលោភសិទ្ធិនៃការបញ្ចេញមតិរបស់ប្រជាពលរដ្ឋ គឺជា ការគំរាមជាខ្លាំងដូចជាករណី ការបឈ្ឈប់បុគ្គលឹកកាពីតូលធ្វើឡើងដោយក្រុមហ៊ុន ដែលករណីនេះបានបង្កឱ្យមានអំពើហិង្សាកើតទ្បើងទៅលើអ្នកតវ៉ាដោយអហិង្សាទៅវិញ។
លោក អាត់ ធន់ បន្តថាភាពល្អប្រសើរ នឹងកើតទ្បើងវិញគឺនៅពេលដែលថ្នាក់ដឹកនាំបង្កើនការយកចិត្តទុកដាក់ទៅលើប្រជាពលរដ្ឋ។
លោក អាត់ ធន់៖ «អ្វីៗគ្រប់យ៉ាងនឹងល្អប្រសើរ ប្រសិនជាអ្នកដឹកនាំរដ្ឋយកចិត្តទុកដាក់ ប្រជាពលរដ្ឋអំពីពលរដ្ឋដែលទុកបណ្តោយ ឱ្យមន្ត្រីធ្វើអីស្រេចតែចិត្តរឿងល្អទៅជារឿងខ្មៅខ្ញុំគិតថាវាអត់សុខនោះទេ យើងជាជនរងគ្រោះយើងនៅតែបន្តរកយុត្តិធម៌តវ៉ាឯកសារផ្លូវច្បាប់ ការធ្វើកូដកម្ម និងយុទ្ធនាការយើងនៅបន្តធ្វើ »។
ជុំវិញនឹងការលើកទ្បើងនេះដែរវិទ្យុស្ត្រី មិនទាន់អាចសុំការឆ្លើយតប ពីភាគីខាងក្រុមហ៊ុនកាពីតូល បាននៅទ្បើយនោះទេនៅថ្ងៃនេះ។
សូមជំរាបថា ចំនុចទាមទារដែលអតីតបុគ្គលឹកក្រុមហ៊ុនកាពីតូល ទាមទារមានដូចជា៖ «ស្នើឱ្យក្រុមហ៊ុនទទួលយកថ្នាក់ដឹកនាំ និងសមាជិកសហជីពចំនួន ៤៥ រូប ចូលធ្វើការវិញ និងគិតប្រាក់រំលឹកចាប់ពីថ្ងៃបឈ្ឈប់រហូត ដល់ថ្ងៃចូលធ្វើការ ដោយបឈ្ឈប់ការរើសអើងសហជីព។
អតីតអ្នកបើកទ្បានឱ្យក្រុមហ៊ុនកាពីតូល ទាំង ៤៥ នាក់បានព្រមាន ថាបើករណី តវ៉ាថ្ងៃខាងមុខនេះមិនទទួលបានដំណោះស្រាយទៀតនោះ ពួកគេនឹងសម្រេចចិត្តហែក្បូនទៅគេហដ្ឋានរបស់សម្ដេច នាយករដ្ឋមន្ត្រី បន្តទៀតដើម្បីសុំការអន្តរាគមន៍៕