សហរដ្ឋអាមេរិក៖ នៅសល់ ១៧ថ្ងៃទៀតប៉ុណ្ណោះ ការបោះឆ្នោតប្រធានាធិបតីសហរដ្ឋអាមេរិក នឹងចាប់ផ្ដើមហើយ តែនៅខណៈនេះលទ្ធផលនៃការស្ទង់មតិមួយបានបង្ហាញថា គូប្រកួតទាំងពីរគឺលោកស្រី ហ៊ីលឡារី គ្លីនតុន និងលោក ដូណាល់ត្រាំ មានភាពឈ្នះចាញ់ពីគ្នាបន្ដិចបន្ដូចប៉ុ ណ្ណោះ គឺ ៤%។
ការស្ទង់មតិមួយដែលបង្ហាញដោយបណ្ដាញផ្សាយព័ត៌មាន BBC ឲ្យដឹងថា លោកស្រី គ្លីនតុន បេក្ខជនប្រធានធិបតីមកពីគណបក្សប្រជាធិបតេយ្យបាននាំមុខលោក ដូណាល់ត្រាំ បេក្ខជនមកពីគណបក្សសាធារណរដ្ឋ បន្ដិចបន្ដូច គឺរវាង ៤៧% ទល់និង ៤៣%។
ការស្ទង់មតិដែលបានបង្ហាញដូចនេះគឺក្រោយពីលោក ដូណាល់ត្រាំ មហាសេដ្ឋីអចលនទ្រព្យបានបញ្ចេញផែនការ ១០០ថ្ងៃ នៃការឡើងកាន់ដំណែងជាប្រធានាធិបតី ប្រសិនបើលោកឈ្នះឆ្នោត។
ផែនការ ១០០ថ្ងៃ នេះគឺសំដៅរឹតត្បិតទិដ្ឋាការជនអន្ដោប្រវេសន៍ ដែលប្រព្រឹត្ដបទល្មើសផ្សេងៗ និងការពិនិត្យឡើងវិញការផ្ដល់មូលនិធិទៅឲ្យអង្គការសហប្រជាជាតិដើម្បីកាត់បន្ថយការឡើងកម្ដៅផែនដី និងមួយទៀតនិយាយអំពីការកំណត់អាណត្ដិសមាជិកសភា។
យ៉ាងណាក៏ដោយបណ្ដាញផ្សាយព័ត៌មាន BBC មិនបាននិយាយថា បេក្ខជន គ្លីនតុន ដាក់ចុះផែនការ ១០០ថ្ងៃដូចលោក ដូណាល់ត្រាំ នោះទេ។
សូមជម្រាបថា ប្រជាជនអាមេរិក នឹងធ្វើសេចក្ដីសម្រេចចិត្ដជ្រើសរើសប្រធានាធិបតីលើកទី ៤៥ របស់ខ្លួននៅថ្ងៃទី ០៨ ខែ វិច្ឆិកា ឆ្នាំ ២០១៦ ខាងមុខនេះ ហើយប្រធានធិបតីដែលឈ្នះឆ្នោត នឹងចូលកាន់ដំណែងនៅថ្ងៃទី ២០ ខែ មករា ឆ្នាំ ២០១៧៕ ប្រភព៖BBC