អាជ្ញាធរខេត្តព្រះវិហារ អះអាងថានឹងចាត់វិធានការផ្លូវច្បាប់យ៉ាងខ្លាំង ចំពោះសកម្មភាពរបស់ជនទាំងឡាយណា ដែលនៅពីក្រោយនៃការបំផ្លាញធនធានព្រៃឈើ ដោយប្រើប្រាស់រូបភាពប្រជាពលរដ្ឋ ឫគ្រប់រូបភាពណាក៏ដោយ។
នេះបើតាមសេចក្តីប្រកាសព័ត៌មានរបស់រដ្ឋបាល ខេត្តព្រះវិហារ នៅទី២១ ខែតុលា។ បើទោះបីជារដ្ឋបាលខេត្តបញ្ជាក់ពីគោលជំហរ របស់ខ្លួនក្នុងការពារធនធានធម្មជាតិក៏ដោយ តែប្រជាសហគមន៍ការពារព្រៃឈើ និងសកម្មជនការពារព្រៃឈើមួយចំនួន មិនជឿជាក់នោះទេ ព្រោះកន្លងមក អាជ្ញាធរមិនដែលអើពើ ហើយពេលខ្លះថែមទាំងឃុបឃិត ជាមួយឈ្មួញថែមទៀតផង។កញ្ញា ឆេង ណាតា រាយការណ៍ព័ត៌មាន៖
សេចក្តីប្រកាសព័ត៌មានរបស់រដ្ឋបាលខេត្តព្រះវិហារ បានឱ្យដឹងថា ក្នុងរយៈពេលកន្លងមកនេះ សង្កេតឃើញមានការកាប់បំផ្លាញព្រៃឈើយ៉ាងអនាធិបតេយ្យ ក្នុងដែនជម្រកសត្វព្រៃ និងព្រៃការពារ ដែលមានការរៀបចំទុកជាមុនដោយក្រុមជនខិលខូចមួយចំនួន។
សេចក្តីប្រកាស ដដែលបន្តថា ដើម្បីការពារអភិរក្សធនធានធម្មជាតិ រដ្ឋបាលខេត្តព្រះវិហារ បានបញ្ជាក់ពីគោលជំហរ យ៉ាងម៉ឺងម៉ាត់ គឺត្រូវចាត់វិធានការផ្លូវច្បាប់ដាច់ខាត់ ចំពោះសកម្មភាពរបស់ជនទាំងឡាយណា ដែលនៅពីក្រោយ នៃការបំផ្លាញធនធានព្រៃឈើ។ បន្ថែមពីនេះ នឹងហាមឃាត់ ទប់ស្កាត់គ្រប់រូបភាព ក្នងករណីក្រុមហ៊ុនទទួលបានសិទ្ធិស្របច្បាប់ ក្នុងការប្រមូលឈើ តែបែរជាប្រើប្រាស់រូបភាពប្រជាជន ទៅកាប់ឈើក្នុងតំបន់អភិរក្ស យកមកលក់ឱ្យក្រុមហ៊ុន។
សេចក្តីប្រកាសព័ត៌មានរបស់សាលាខេត្តព្រះវិហារ ធ្វើឡើងបន្ទាប់ពី ក្រុមយុវជនមួយក្រុមបានចុះល្បាតព្រៃសហគមន៍ព្រះរការ ហើយចាប់បានគោយន្ដអ្នកដឹកឈើចំនួន១២គ្រឿង ម៉ាស៊ីនអាឈើចំនួនមួយគ្រឿង។
លោក ហេង ស្រស់ សកម្មជន ការពារព្រៃឈើដែលទើបត្រឡប់មកពីចុះល្បាតព្រៃសហគមន៍ព្រះរការ បានប្រាប់វិទ្យុស្ត្រីនៅថ្ងៃទី២១ តុលានេះថា វិធានការ របស់សាលាខេត្តព្រះវិហារនេះ គឺគ្រាន់តែជាការពារខ្លួន ដើម្បីកុំឱ្យសាធារណៈជនមើលឃើញពី អសមត្ថភាពរបស់ខ្លួនក្នុងការ ការពារព្រៃឈើនៅខេត្តព្រះវិហារតែប៉ុណ្ណោះ។
លោក ហេង ស្រស់៖«ខ្ញុំគិតថាអាជ្ញាធរ មិនបាច់ចេញសេចក្តីថ្លែងការណ៍អញ្ចឹងទេ អាថ្ងៃដែលខ្ញុំ និងអាជ្ញាធរចុះល្បាតរួមគ្នាហ្នឹង អ្នកដែលកាប់ឈើហ្នឹងប្រាប់ទាំងឈ្មោះដេប៉ូ ប្រាប់ទាំងអ្នកដែលបញ្ជាកាប់ថាគាត់ហ្នឹងជាអ្នកណាហើយ បើតាមខ្ញុំចុះស្រាវមួយអាទិត្យកន្លងទៅគឺអ្នកដែលកាប់ឈើគឺគាត់បាននិយាយថា គាត់កាប់ឈើយកទៅ គាត់ដឹកទៅតាមផ្លូវនេះ គឺគាត់បង់ឱ្យមានប៉ូលីសមានប៉េអ៊ឹមហ្នឹង ក្នុងមួយគោយន្តបង់ឱ្យប៉ូលីសប៉េអ៊ឹម២០០០០រៀល»។
ចំណែកព្រះតេជគុណ ប៊ុត ប៊ុនតិញ ជាសង្ឃមួយអង្គដែលសកម្មក្នុងការពារធនធានធម្មជាតិ មានថេរៈដីការថា លិខិតរបស់សាលាខេត្តព្រះវិហារ ធ្វើឡើងដើម្បីបង្គ្រប់កិច្ចតែប៉ុណ្ណោះ។ ករណីនេះព្រះអង្គ មិនជឿជាក់លើគោលជំហររបស់អាជ្ញាធរ ចំពោះការពារធនធានធម្មជាតិនោះទេ។ ព្រះអង្គបន្តថា សព្វថ្ងៃនេះព្រៃនៅខេត្តព្រះវិហារ រងការកាប់បំផ្លាញយ៉ាងគំហុក ហើយមិនយូទេព្រៃឈើនៅខេត្តមួយនេះនឹងអស់ក្នុងពេលឆាប់នេះ។
ទាក់ទិនការកាប់បំផ្លាញព្រៃឈើនេះ លោក ថោង ស៊ុន ប្រជាសហគមន៍ព្រៃព្រះរការ បានចោទអាជ្ញាធរថា បានឃុបឃិតជាមួយឈ្មួញ។ លោកថារាល់ថ្ងៃនេះ ព្រៃឈើនៅខេត្តព្រះវិហារ រងការកាប់បំផ្លាញស្ទើអស់ហើយ ចំណែកគោយន្តវិញដឹកឈើចេញរាល់ថ្ងៃ។ ប៉ុន្តែគ្មានអាជ្ញាធរណាម្នាក់ ចាត់វិធានការចំពោះជនល្មើសទាំងនោះទេ។
លោកថោង ស៊ុន៖«អាជ្ញាធរមិនសូវយកចិត្តទុកដាក់បើគេហាមឃាត់មានការលំបាក វារួមដៃរួមជើងជាមួយជជនល្មើសហើអាជ្ញាធរមិនសូវយកចិត្តទុកដាក់សព្វថ្ងៃ។គេកាប់បំផ្លាញព្រៃឈើរាល់ថ្ងៃគ្មានខានទេដឹករាល់ថ្ងៃ។ អជ្ញាធរគេមិនធ្វើទេកាលណាធ្វើគេនិងដាច់យៃបានបន្ថែមពីលើប្រាក់ខែ»។
យ៉ាងណាក៏ដោយ វិទ្យុស្រី្តមិនទាន់សុំការបំភ្លឺភ្លាមៗពី អភិបាលខេត្តព្រះវិហារជុំវិញមតិរិះគន់ ពី សំណាក់សកម្មជនព្រៃឈើទាំងនោះបាននៅឡើយទេ។
បើតាមលោក ហេង ស្រស់ សកម្មជន ការពារព្រៃឈើ ថានៅខេត្ត ព្រះវិហារ សព្វថ្ងៃ មានឈ្មួញ រកស៊ីឈើខុសច្បាប់កំពុងតែ ជំរុញឱ្យប្រជាពលរដ្ឋ ចូលកាប់ឈើពីព្រៃព្រះរការ ដែលជាតំបន់ការពារ។ លោកថា ក្រុមអ្នកកាប់ឈើទាំងនោះបានប្រាប់ថា ពួកគាត់កាប់ឈើឱ្យក្រុមហ៊ុន ហើយពេលពួកគាត់ដឹកចេញពីព្រៃមាន អាជ្ញាធរ ចាំយកលុយ ក្នុងមួយគោយន្ដតម្លៃ២០០០០រៀល៕