ភ្នំពេញ ៖ សាលាដំបូងរាជធានីភ្នំពេញ បានចេញដីកាកោះហៅលោក សម រង្ស៊ី ប្រធានគណបក្សសង្គ្រោះជាតិឲ្យចូលបំភ្លឺនៅថ្ងៃទី ១៧ ខែ តុលា ស្អែកនេះ ពីបទបរិហាកេរ្តិ៍ ក្នុងករណីមេបក្សប្រឆាំងរូបបានបង្ហោះនៅទំព័រហ្វេសប៊ុករបស់លោក ដែលបានចោទប្រកាន់សម្តេច ហ៊ុន សែន ថាបានបង្កើតគណនីហ្វេសប៊ុកក្លែងក្លាយដើម្បីទិញLike។
លោក សៀង សុខ តំណាងអយ្យាការអបសាលាដំបូងរាជធានីភ្នំពេញ បានចេញដីកាបង្គាប់ឲ្យលោក សម រង្ស៊ី ចូលទៅបំភ្លឺនៅតុលាការនៅថ្ងៃចន្ទស្អែកនេះ តបតាមដើមបណ្តឹងឈ្មោះ សោម សឿត។
ដីការបស់សាលាដំបូងរាជធានីភ្នំពេញនេះ ត្រូវបានលោក សម រង្ស៊ី បង្ហោះលើទំព័រហ្វេសប៊ុករបស់លោក នៅថ្ងៃអាទិត្យ ទី១៦ តុលានេះ។
ឆ្លើយតបដីកានេះ ប្រធានគណបក្សសង្គ្រោះជាតិលោក សម រង្ស៊ី បានសរសេរថា លោកមិនចាំអារម្មណ៍ទៅបណ្តឹងនេះឡើយ។ តែលោកអះអាងថា សម្តេច ហ៊ុន សែន បានប្រើមន្ត្រីក្រោមឱវាទដើម្បីបង្កើតគណនី Facebook ក្លែងក្លាយ ដើម្បីផ្តល់ «Like» ក្លែងក្លាយឲ្យទៅទំព័រ Facebook តាមរយៈទិញ«Like»។
លោក សម រង្ស៊ី បានសរសេរនៅហ្វេសប៊ុកទៀតថា ការទិញចំនួន «Like» គឺ ដើម្បីបង្អួតប្រជាប្រិយភាពរបស់សម្តេច ជាមូលដ្ឋាននយោបាយ។
លោក សម រង្ស៊ី៖« ខ្ញុំមិនខ្វល់ពីពាក្យបណ្តឹងនេះទេ ហើយខ្ញុំនៅតែហ៊ានអះអាងថាលោក ហ៊ុន សែន ប្រើមន្ត្រី និងបុគ្គលិក ក្រោមឱវាទគាត់ ឲ្យបង្កើតគណនី Facebook ក្លែងក្លាយ ដើម្បីផ្តល់ "Like" ក្លែងក្លាយឲ្យទៅទំព័រ Facebook របស់គាត់ ហើយគាត់ក៏បានទិញ "Like" ក្លែងក្លាយ យ៉ាងសន្ធឹកសន្ធាប់ពីច្រើនប្រទេស ទូទាំងពិភពលោក ដើម្បីបង្អួតពីប្រជាប្រិយភាពក្លែងក្លាយរបស់គាត់។ បន្ទាប់មកទៀត លោក ហ៊ុន សែន ក៏យកប្រជាប្រិយភាពក្លែងក្លាយរបស់គាត់នេះ មកសំអាង ដើម្បីធ្វើជាមូលដ្ឋាននយោបាយ ក្នុងការបង្ក្រាបអ្នកដែលហ៊ាននិយាយទិតៀនគាត់។ សូមបងប្អូនជនរួមជាតិ កត់សម្គាល់ភាពទុច្ចរិត និងល្បិចទុច្ចរិតរបស់អ្នកដឹកនាំប្រទេសយើងសព្វថ្ងៃ »។
សូមរម្លឹកថា លោក សម រង្ស៊ី មិនត្រឹមតែទទួលរងដីកាសំនុំរឿងមួយនេះទេ គឺមានជាច្រើនទៀត មានទាំងសំនុំរឿងសម្ដេច ហេង សំរិន ប្ដឹងលោកពីបទបរិហារកេរ្តិ៍ និង ករណីសាលាឧទ្ទរណ៍ចេញដីកាចាប់ខ្លួនលោក ពាក់ព័ន្ធបណ្ដឹងរបស់លោក ហោ ណាំហុង ប្ដឹងលោកពីបទបរិហារកេរ្តិ៍ ដែលលោក សម រង្ស៊ី ថាអតីតរដ្ឋមន្ត្រីរូបនេះ ធ្លាប់ជាមេគុកបឹងត្របែក ។ លោក សម រង្ស៉ី បានចាកចេញពីប្រទេសតាំងពីខែវិច្ឆិកា ២០១៦ មកម្ល៉េះ៕
