ភ្នំពេញ ៖ ព្រះសង្ឃប៊ុត ប៊ុនតិញ ជាសមាជិកស្ថាបនិកនៃបណ្ដាញព្រះសង្ឃឯករាជ្យ ដើម្បីយុត្តិធម៌សង្គម និងអភិវឌ្ឍន៍ និងជាសមាជិកគណៈ កម្មការបុណ្យសពលោកបណ្ឌិត កែម ឡី មានថេរៈដីកាថា គ្មានក្រុមណា ឬជនណា ទិញឧត្តមគតិព្រះអង្គបានទេ។
ការប្រកាសជំហររបស់ព្រះសង្ឃ ប៊ុត ប៊ុនតិញ ដូចនេះ ជាការបញ្ជាក់ទៅកាន់អ្នកសារព័ត៌មាន ដែលបានចោទសួរព្រះអង្គនៅថ្ងៃសៅរិ៍ ទី១៥ តុលានេះ នៅក្នុងពិធីបុណ្យ សព ១០០ថ្ងៃ លោកបណ្ឌិត កែម ឡី ធ្វើឡើងនៅវត្តពោធិយារាម ហៅវត្តចាស់ ក្នុងសង្កាត់ជ្រោយចង្វាររាជធានីភ្នំពេញ។
ព្រះសង្ឃ ប៊ុត ប៊ុនតិញ បានហៅខ្លួនព្រះអង្គថា ជាដើមនាងនួន ដែលមិនងាយបាក់បែកដោយខ្យល់វាយប្រហារនោះទេ។ ព្រះអង្គមានថេរៈដីកាបន្តថា សម្ដេច ហ៊ុន សែន ជាពុទ្ធបរិស័ទ ហើយព្រះអង្គជាព្រះសង្ឃដែលសម្ដេចត្រូវគោរពព្រះអង្គ។ ត្រង់ចំនុចនេះព្រះអង្គមានសង្ឃដីកាថា បើសម្ដេច ហ៊ុន សែនក្លាហានគឺមកកាន់រោងបុណ្យ កែម ឡី មក។
ស្តាប់សំឡេងព្រះសង្ឃ ប៊ុត ប៊ុនតិញ៖
ការចោទសួររបស់អ្នកសារព័ត៌មាន បន្ទាប់ពីមានការសង្ស័យថា ព្រះអង្គបានទទួលថ្នូរអ្វីមួយពីបក្សកាន់អំណាច ទើបបានជាសាលារាជធានីភ្នំពេញអនុញ្ញតឱ្យធ្វើបុណ្យ ១០០ថ្ងៃ លោកបណ្ឌិត កែម ឡី ធ្វើនៅវត្តចាស់តាមការស្នើសុំរបស់ព្រះអង្គ៕