លោក Antonio Guterres អគ្គលេខាធិការថ្មី អង្គការសហប្រជាជាតិ បានសន្យាថា លោកនឹងជួយដោះស្រាយវិបត្តិ នៅក្នុងប្រទេសស៊ីរី ដែលហែកហួរ ដោយសារសង្គ្រាមជិត៦ឆ្នាំ។
លោក Guterres បានថ្លែងអះអាងដូចនេះ គឺ ភ្លាមៗបន្ទាប់ពីលោកទទួលបានការតែងតាំងជាផ្លូវការ អោយកាន់តំណែងប្រធានស្ថាប័នពិភពលោកមួយនេះកាលពីម្សិលមិញ ដោយមហាសន្និបាត។
អតីតនាយករដ្ឋមន្ដ្រី នៃប្រទេសព័រទុយហ្គាល់ បច្ចុប្បន្នជាអគ្គលេខាធិកាអង្គការសហប្រជាជាតិថ្មី មានអាយុ៦៧ឆ្នាំ លោកធ្លាប់ដឹកនាំទីភ្នាក់ងារជនភៀសខ្លួន អង្គការសហប្រជាជាតិ រយៈពេល១០ឆ្នាំ។ លោកបានជាប់ឆ្នោត ដោយឈ្នះលើបេក្ខជនចំនួន ១២ រូបផ្សេងទៀត។
លោកបានប្រាប់បណ្ដាញផ្សាយព័ត៌មាន BBC ថា វិបត្តិនៃប្រទេសស៊ីរី គឺជា បញ្ហាអាទិភាពរបស់លោក ដែលត្រូវដោះស្រាយ ព្រោះវាជាបញ្ហាប្រឈមបំផុត របស់ពិភពលោក។
លោកបានថ្លែងដូចនេះ ៖« ខ្ញុំជឿថា វាជាអាទិភាពទីមួយរបស់សហគមន៍អន្ដរជាតិ ដែលចូលរួមបញ្ចប់ជម្លោះនេះ ហើយត្រូវប្រើប្រាស់មធ្យោបាយ សមស្របណាមួយ ដើម្បីអោយមានដំណោះស្រាយវិបត្តិដ៏រ៉ាំរ៉ៃនេះ»។
ប្រទេសស៊ីរី បានធ្លាក់ចូលក្នុងភ្នក់ភ្លើង សង្គម តាំងពីឆ្នាំ២០០៦ ដោយសម្លាប់មនុស្ស ជាច្រើនសែននាក់ និងបង្កឱ្យមានជនភៀសខ្លួនរាប់លាននាក់៕ ប្រភពៈ BBC