ភ្នំពេញ៖ ប្រធាន និងអនុប្រធានគណបក្សសង្គ្រោះជាតិ ស្នើសុំ ព្រះមហាក្សត្រ លើកលែងទោស និងទម្លាក់ចោលការចោទប្រកាន់លើពួកគាត់ ព្រមទាំងសកម្មជន ។
តាមអត្តន័យក្នុងលិខិតរបស់លោក សម រង្ស៊ី និង លោក កឹម សុខា គឺការថ្វាយលិខិតនេះ គឺដើម្បីទាញបរិយាកាស នយោបាយឲ្យល្អប្រសើរវិញ ហើយឆ្ពោះទៅរកការផ្សះផ្សារជាតិ បង្រួបបង្រួម និង ឯកភាពជាតិ។ យ៉ាងណាក៏ដោយ សម្ដេច ហ៊ុន សែន រាយការណ៍ថ្វាយព្រះមហាក្សត្រថា ករណី មេបក្សប្រឆាំងគឺជាបញ្ហារបស់តុលាការ។ តែអ្នកវិភាគថា ដំណាក់កាលនេះ គេត្រូវនិយាយពីការផ្សះផ្សាជាតិ ជាជាងនិយាយថា ពីការពង្រឹងនីតិរដ្ឋ។ លោក ធូរ វីរៈ ជូនសេចក្ដីរាយការណ៍៖
លោក សម រង្ស៊ី ប្រធាន និង លោក កឹម សុខា អនុប្រធានគណបក្សសង្គ្រោះជាតិ កាលពីថ្ងៃទី ៨ ខែ តុលា បានដាក់លិខិតមួយច្បាប់ថ្វាយព្រះមហាក្សត្រ ព្រះករុណា ព្រះបាទសម្ដេច បរមនាថ នរោត្ដម សីហមុនី ដើម្បីសុំលើកលែងទោស និងទម្លាក់ការចោទប្រកាន់ ចំពោះសកម្មជនសិទ្ធិមនុស្ស សកម្មជនដីធ្លី សកម្មជនបរិស្ថាន និង អគ្គលេខារង គ.ជ.ប រួមទាំង សកម្មជនរបស់ខ្លួន ដែលកំពុងជាប់ឃុំនៅក្នុងពន្ធនាគារ។
មន្ត្រីជាន់ខ្ពស់គណបក្សសង្គ្រោះជាតិ លោក សុន ឆ័យ មានប្រសាសន៍ថា គណបក្សសង្គ្រោះជាតិ មិនទាន់ទទួលបានលិខិត ពី រាជរដ្ឋាភិបាលនៅឡើយទេ។ លោកបញ្ជាក់ថា ការដាក់លិខិតនេះ ដើម្បីស្នើសុំព្រះរាជអន្តរាគមន៍ អំពីស្ថានភាពនយោបាយ ឲ្យវិលមក រកភាពដើមវិញ។ លោក សុន ឆ័យ សង្ឃឹមថា ព្រះមហាក្សត្រ ព្រះករុណា ព្រះបាទសម្ដេច បរមនាថ នឹងស្វែងរកដំណោះស្រាយល្អមួយនៅពេលអនាគត ដើម្បីធ្វើឲ្យស្ថានភាពនយោបាយល្អប្រសើរ។
លោក សុន ឆ័យ៖«ខ្ញុំជឿថា ព្រះអង្គ នឹងរកដំណោះស្រាយ ឲ្យប្រជារាស្ត្រព្រះអង្គ ក៏ដូចជាគណបក្សនយោបាយនៅពេលអនាគត់»។
កាលពីថ្ងៃទី ១១ ខែ តុលា ព្រះមហាក្សត្រ បានផ្ញើ លិខិតរបស់មេដឹកនាំ គណបក្សជំទាស់ ទៅសម្តេចនាយករដ្ឋមន្ត្រី ហ៊ុន សែន ដើម្បីពិនិត្យ។
ជាការថ្វាយការឆ្លើយតប ទៅ ព្រះមហាក្សត្រ សម្តេច ហ៊ុន សែន កាលពីថ្ងៃទី ១២ តុលា បានថ្វាយលិខិតដោយសរសេររៀបរាប់ថា ករណី លោក សម រង្ស៊ី និងលោក កឹម សុខា នៅតុលាការ គឺជាការពង្រឹង និងការលើកកម្ពស់នីតិរដ្ឋនៅកម្ពុជា។
លិខិតរបស់សម្ដេច ហ៊ុន សែន បានរាយការណ៍ ជាច្រើនថ្វាយព្រះមហាក្សត្រ នេះ ដោយលើកឡើងជាច្រើន ពីចំនុចច្បាប់ និង បទល្មើស ដែល មេបក្សប្រឆាំងទាំង២រូបនេះ បានប្រព្រឹត្ត។
ជុំវិញការស្នើសុំលើកលែងទោសពីព្រះមហាក្សត្រនេះ លោក គឹម សុខ អ្នកឃ្លាំមើលបញ្ហានយោបាយ និង សង្គមយល់ថា ការស្វះស្វែងរបស់មេដឹកនាំ គណបក្សសង្គ្រោះជាតិ ស្នើសុំព្រះរាជទានទោស ពីព្រះមហាក្សត្រគឺជាដំណោះស្រាយល្អមួយ ដើម្បីឲ្យអ្នកនយោបាយត្រូវរូវគ្នាក្នុងការផ្សះផ្សាជាតិខ្មែរ។
លោក គឹម សុខ៖«អ្នកនិយាយគ្នាបាន វាទាល់តែពុំមានរនាំងបាំង ក្នុងការធ្វើដំណើរទៅជួបគ្នា និយាយគ្នា ហើយកុំឲ្យមាន រនាំងបាំង លុះត្រាតែរដ្ឋាភិបាល កុំប្រើតុលាការ កុំប្រើអាជ្ញាធររដ្ឋ ស្ថាប័នរដ្ឋ ដើម្បីរារាំំង ឬឃាំងដំណើរ មេដឹកនាំគណបក្សប្រឆាំងឲ្យទៅជួប។ បញ្ហានេះ លោកនាយករដ្ឋមន្ត្រី ហ៊ុន សែន បង្ហាញសេចក្តីក្លាហាន ជជែកគ្នាបន្តិចទៅ ដើម្បីថ្វាយលិខិតទៅព្រះមហាក្សត្រ សុំលើកលែងទោស ហើយយើងជជែកគ្នាទៅបញ្ហាអ្វីខ្លះ បើយល់ល្អជជែកគ្នាតុមូលមក បង្ហាញរាស្ត្រ អ្នកណាខុស អ្នកត្រូវ»។
ចំណែក លោក ចាន់ វិបុល អ្នកវិភាគបញ្ហាសង្គម មានប្រសាសន៍ថា ការដាក់លិខិតថ្វាយព្រះមហាក្សត្រ ដើម្បីសុំលើកលែងទោសនេះគឺ ជាវិធីសាស្ត្រចុងក្រោយរបស់គណបក្សសង្គ្រោះជាតិ រួចផុតរឿងក្តីក្តាំនៅតុលាការ។ លោកយល់ថា រាជរដ្ឋាភិបាលគួរដោះស្រាយបញ្ហាជាមុនសិន មុននឹងពង្រឹងនីតិរដ្ឋនៅកម្ពុជា។
លោក ចាន់ វិបុល៖«ខ្ញុំឃើញថាការលើកលែងទោសមិនជាប់ទាក់ទង និងនីតិរដ្ឋទេ ពីព្រោះកម្ពុជាសព្វថ្ងៃមិនមែនជានីតិរដ្ឋ តុលាការស្ថិតនៅក្រោមអំណាច របស់អ្នកនយោបាយ យើងមិនចង់ឃើញដូចនេះនៅក្នុងពេលអនាគត។ យើងចង់ឃើញមេដឹកនាំម្នាក់ៗ សុំរក្សាឲ្យអំណាចនយោបាយ នៅតុលាការដាច់ពីគ្នា កុំឲ្យពាក់ព័ន្ធគ្នាដូចបច្ចុប្បន្ននេះ»។
តែបើតាមលោក គល់ បញ្ញា នាយកអង្គការឃ្លាំមើលការបោះឆ្នោត Comfrel គឺព្រះមហាក្សត្រមានបុព្វសិទ្ធ លើកលែងទោស ជនណាក៏បានដែរ ព្រោះជាការកំណត់ដោយរដ្ឋធម្មនុញ្ញ។
លោកបាន សរសេរដូចនេះ លើ ហ្វេសប៊ុក របស់លោកថា ៖«យោងតាមរដ្ឋធម្មនុញ្ញ ព្រះមហាក្សត្រ មានព្រះរាជសិទ្ធិ ធានាការគោរពសិទ្ធិសេរីភាពរបស់ពលរដ្ឋ, ការលើកលែងទោស និង ព្រះរាជតួនាទីខ្ពង់ខ្ពស់ជាអាជ្ញាកណ្តាល»។
លោកបានពន្យល់ថា ៖«មេដឹកនាំ រដ្ឋាភិបាល មិនអាចអព្យាក្រិតនយោបាយ ដូចព្រះមហាក្សត្រទេ ព្រោះនាយករដ្ឋមន្ត្រី ជាគូប្រកួតនយោបាយ ជាមួយមេដឹកនាំគណបក្សប្រឆាំង ដូចនេះមានទំនាស់ផលប្រយោជន៍ ខ្លាំងក្នុងកាផ្តល់យោបល់ ករណីរបៀបនេះ» ។
ការថ្វាយលិខិតទៅព្រះមហាក្សត្រ ធ្វើឡើង ដោយមេបក្សប្រឆាំងនេះ គឺជាលើកទី២ បន្ទាប់ពីលើកមុន ពួកគាត់ស្នើសុំ ព្រះមហាក្សត្រ ជួយអន្តរាគមន៍ ជួយបញ្ចប់ការឡើងកំដៅ នយោបាយ ដែលបក្សប្រឆាំងថាលទ្ធិប្រជាធិបតេយ្យបានដើរដល់ចំនុចគ្រោះថ្នាក់៕