ភ្នំពេញ៖ ក្រសួងការងារ និងបណ្ដុះបណ្ដាលវិជ្ជាជីវៈ បានសម្ដែងនូវការសោកស្ដាយ ចំពោះឧបទ្ទវហេតុគ្រោះថ្នាក់ចរាចរណ៍ ក្រឡាប់រថយន្តដឹកកម្មករ កាលព្រឹកថ្ងៃទី១៣តុលានេះ ដោយ បណ្ដាលឱ្យកម្មករ-កម្មការិនី រងរបួសធ្ងន់ស្រាលសរុប ២៥នាក់។
តាមសេចក្ដីជូនដំណឹង ឧបទ្ទវហេតុនេះបានកើតឡើងកាលពីម៉ោង៦ និង ៣០នាទី ព្រឹកថ្ងៃទី១៣ ខែតុលា ឆ្នាំ២០១៦នេះ ស្ថិតនៅចន្លោះគីឡូម៉ែត្រ ១៩៣-១៩៤ ក្នុងភូមិអូរតាប៉ាង ឃុំអូរចំណារ ស្រុកព្រៃនប់ ខេត្តព្រះសីហនុ ។
សេចក្ដីប្រកាសរបស់ក្រសួងការងារ នៅថ្ងៃទី១៣ តុលានេះ បានឱ្យដឹងថា ក្នុងហេតុការណ៍ក្រឡាប់រថយន្តនេះ កម្មករ ៣នាក់បានរងរបួសធ្ងន់ និង២២នាក់ទៀតរងរបួសស្រាល។
អ្នករងរបួសទាំងនោះ ត្រូវបានជួយសង្គ្រោះដោយ កម្លាំងអាជ្ញាធរមានសមត្ថកិច្ច និងបេឡាជាតិរបបសន្តិសុខសង្គម ។
សេចក្តីប្រកាសព័ត៌មានដដែលបន្តថា គិតត្រឹមម៉ោង១០ព្រឹក នេះ មានកម្មករចំនួន១៨នាក់ បាននឹងកំពុងសម្រាកព្យាបាលនៅគ្លីនិក ផូ ផាន់នី ៥នាក់ផ្សេងទៀតកំពុងសម្រាកព្យាបាលនៅគ្លីនិកវណ្ឌីវាលរេញ ហើយកម្មករចំនួន២នាក់ សម្រាកព្យាបាលនៅមន្ទីពេទ្យតេសេខេត្តសីហនុ៕