ភ្នំពេញ៖ សាលារាជធានីភ្នំពេញ បានអនុញ្ញាតឱ្យគណៈកម្មាការបុណ្យ រៀបចំពិធីបុណ្យ ១០០ថ្ងៃលោកបណ្ឌិត កែម ឡី នៅទីតាំងវត្តពោធិយារាម ហៅវត្តចាស់ នៅថ្ងៃទី១៤ ដល់ថ្ងៃទី១៦ តុលា ទៅតាមការស្នើសុំ។
ប៉ុន្តែបើតាមព្រះតេជគុណ ប៊ុត ប៊ុនតិញ សមាជិកគណៈកម្មារៀបចំពិធីបុណ្យ ការអនុញ្ញាតនេះដោយសារ គណៈកម្មការបានសន្យាថា នឹងមិនការផ្សារភ្ជាប់ទៅនឹងរឿងនយោបាយ។ យ៉ាងណាក៏ដោយ នេះជាការធ្វើឱ្យអស់មន្ទីល ចំពោះ កម្មវិធីបុណ្យនេះ ថាធ្វើបានឬមិនបានដែលធ្វើឡើងនៅវត្តចាស់។
អ្នកស្រាវជ្រាវពីការអភិវឌ្ឍសង្គម បានគាំទ្រ ចំពោះចំហរ របស់សាលារាជធានីភ្នំពេញ។កញ្ញា ឆេង ណាតា រាយការណ៍៖
ការអនុញ្ញាតនេះ បន្ទាប់ពី គណៈកម្មការបុណ្យសព លោក កែម ឡី និងអភិបាលរាជធានីភ្នំពេញបានជួបភាក្សាគ្នា នៅសាលារាជធានីភ្នំពេញនៅថ្ងៃទី១២នេះ ដោយគណៈកម្មាបានសន្យាថាការរៀបចំពិធីបុណ្យនេះ នឹងមិនមានការផ្សារភ្ជាប់ទៅនឹងរឿងនយោបាយ ឬការប្រមូលផ្តុំដើម្បីធ្វើបាតុកម្មអ្វីនោះទេ។ នេះបើតាមថេរដីការ របស់ព្រះតេជគុណ ប៊ុត ប៊ុនតិញ ដែលបានប្រាប់វិទ្យុស្ត្រី នៅថ្ងៃទី១២ ខែតុលានេះ។
ព្រះតេជគុណ ប៊ុត ប៊ុនតិញ ៖«ដោយយោងទៅតាមការជឿ បារមីរបស់លោកបណ្ឌិត កែម ឡី ក្នុងការធ្វើអំពើល្អ ទើបអាត្មាមើលឃើញថា សាលារាជធានី មើលឃើញរឿងល្អបានអនុញ្ញាត មុនប្រហែលជាមើលមិនឃើញរឿងល្អទេដឹង បានពួកគាត់មិនបានអនុញ្ញាត តែឥលូវមើលឃើញរឿងល្អ បានចំណេញបានប្រយោជន៍ ហើយអាត្មាបាននិយាយខ្លះដែរ ប្រសិនបើយើងហាមឃាត់រិតត្បិត សិទ្ធិគេមិនឱ្យធ្វើបុណ្យអ្នកដែលខាតមិនមែន គណៈកម្មការបុណ្យទេ អ្នកដែលខាតគឺរដ្ឋាភិបាល»។
នៅក្នុងបទសម្ភាសន៍ ជាមួយវិទ្យុស្រី្ត កាលពីថ្ងៃម្សិលមិញ ចៅអធិការវត្ត ចាស់ ព្រះអង្គ មាស សាខន មានថេរៈដិការថា ព្រះអង្គមិន ជំទាស់ហើយក៏មិន ប្រឆាំងសមត្ថកិច្ចដែរ តែ ព្រះអង្គមិនបិទទ្វារវត្ត ទេ បើទោះជា មានកម្មវិធីបុណ្យ ធ្វើឡើងនៅវត្តព្រះអង្គក៏ដោយ។ ព្រះអង្គ មានដីការបន្តថា វត្តគឺជាស្រែបុណ្យ ។
លោក ហេង ស្រ៊ាង សាស្ត្រាចារ្យទស្សនៈវិជ្ជា យល់ថា ហេតុផលដែលគណៈកម្មការ បានសន្យាជាមួយសាលារាជធានីភ្នំពេញ មិនពាក់ព័ន្ធនយោបាយ និងការប្រមូលផ្តុំធ្វើបាតុកម្ម ជារឿងសមស្រប ដែលគួរតែមានការអនុញ្ញាតឱ្យរៀបចំ។ លោកបន្តថា កន្លងមកអ្វីដែលនៅពីក្រោយការបដិសេធ របស់សាលារាជធានីភ្នំពេញ ដោយសារមានពាក្យបកស្រាយថា កម្មវិធីបុណ្យនេះ គឺជាកម្មវិធីដែលអាចឱ្យគណបក្សនយោបាយផ្សេងៗ ទាញយកប្រជាប្រិយភាព ឬប្រយោជន៍ផ្សេងៗជាដើម។
លោក ហេង ស្រ៊ាង៖«ម្សិលមិញគណៈកម្មាការបុណ្យ បានផ្តល់ជាការប្តេជ្ញាថា មិនឱ្យគណបក្សនយោបាយណា មកឡូក ដើម្បីយកជាផលប្រយោជន៍ ឬគណបក្សនយោបាយទាំងអស់បើគិតថា ជាកន្លែងមួយដែលអាចយកប្រយោជន៍ប្រជាប្រិយភាព អញ្ចឹងគណៈកម្មការឱ្យអញ្ជើញមកទាំងអស់ ចូលរួមទាំងអស់គណបក្សនយោបាយណាក៏ដោយ»។
រយៈពេលប្រមាណ១០០ថ្ងៃហើយ ដែលលោក បណ្ឌិត កែម ឡី អ្នកវិភាគបញ្ហាសង្គម និងនយោបាយ ដ៏ល្បី ត្រូវបានឃាតករ បាញ់សម្លាប់នៅក្នុងស្ដារម៉ាត (Star Mart) កាល់តិច ស្ដុបបូកគោ រាជធានីភ្នំពេញ។
បើទោះបីជា សាលារាជធានីភ្នំពេញ នៅថ្ងៃនេះ អនុញ្ញាតឱ្យប្រារព្ធធ្វើឡើងនៅវត្តពោធិយារាម ក៏ដោយ ប៉ុន្តែកន្លងមកសាលាក្រុងភ្នំពេញ ធ្លាប់បានបដិសេធ ទីតាំងនៅរាជធានីភ្នំពេញជាច្រើនកន្លែង ក្នុងហេតុផលដែលមិនច្បាស់លាស់។ ការបដិសេធនេះ បានធ្វើឱ្យមតិសាធារណៈជន មួយចំនួន ដាក់ឆ្ងល់ថា ហេតុអ្វីបានជា គ្រាន់តែប្រារព្ធពិធីបុណ្យបែបសាសនាសោះ តែអាជ្ញាធរ បដិសេធមិនឱ្យរៀបចំទៅវិញ។
លោក គីម សុខ អ្នកឃ្លាំងមើលការអភិវឌ្ឍន៍សង្គម និងនយោបាយ មានប្រសាសន៍ថា មូលហេតុដែលអាជ្ញាធរតែងបដិសេធ មិនឱ្យមានរៀបចំពិធីបុណ្យ១០០ថ្ងៃ លោកបណ្ឌិត កែម ឡី ព្រោះតែខ្លាចបាក់មុខមាត់របស់បុគ្គល ច្រើនជាងខាតមុខមាត់នយោបាយ របស់គណបក្សកាន់អំណាច ដោយសារតែអ្នកនយោបាយទាំងនោះមិនចង់ឃើញ មហាជនគាំទ្រអ្នកណាម្នាក់ច្រើនជាងខ្លួនជាសាធារណៈ។
លោកបន្តថា បើ មិនអនុញ្ញាតឱ្យធ្វើពិធី១០០ថ្ងៃ តាមបែបសាសនា នឹងធ្វើឱ្យគណបក្សកាន់អំណាចខាតបង់ ព្រោះប្រជាពលរដ្ឋជាច្រើនគាំទ្រ លោកបណ្ឌិត កែម ឡី។
លោក គីម សុខ បានប្រាប់បន្ថែមថា ករណីស្លាប់របស់លោកបណ្ឌិត កែម ឡី ក៏អាចចាត់ទុកថាជារឿងនយោបាយបានដែរ ព្រោះលោកបណ្ឌិត គឺជាអ្នកស្រាវជ្រាវបញ្ហា សង្គម សេដ្ឋកិច្ច នយោបាយ និងការរស់នៅ របស់ប្រជាពលរដ្ឋ ដែលរឿងទាំងនេះគឺវាបានផ្សារភ្ជាប់និងនយោបាយ។
លោក គីម សុខ៖«ទោះបីភាគីណាទាញគាត់ឱ្យទៅពាក់ព័ន្ធ ឬមិនពាក់ព័ន្ធនយោបាយក៏ដោយប៉ុន្តែរឿងនោះជារឿងជាតិទាំងអស់គ្នា អ្វីដែលត្រូវគិតគឺរឿងនេះទេ មិនមែណថាឱ្យតែរឿងនយោបាយសុទ្ធរឿងអាក្រក់រឿងមិននយោបាយបានល្អ មិនមែនអញ្ចឹងទេ រដ្ឋាភិបាលគួរប្តូរ កែឥរិយាបថ ក្នុងគិតរបស់ខ្លួនឡើងវិញ កាលណាខ្លួនមានសមត្ថភាព កាលណាគេស្រាវជ្រាវបញ្ជាក់ពីសមត្ថភាពដឹកនាំរបស់ខ្លួន អាហ្នឹងខ្លួនមានមុខហើយ ។ បើសិនជាជួយខ្លួន ជួយរដ្ឋាភិបាលឱ្យមើលឃើញពីភាពត្រឹមត្រូវ ឬមិនត្រឹមត្រូវក្នុងការដឹកនាំជាតិ រដ្ឋាភិបាលគួរតែចូលរួមជាមួយគេវិញ»។
សេចក្ដីជូនដំណឹងពីគណៈកម្មការរៀបចំបុណ្យ១០០ថ្ងៃលោកបណ្ឌិត កែម ឡី បានឱ្យដឹងថា កម្មវិធីបុណ្យខួបគម្រប់១០០ថ្ងៃលោក បណ្ឌិត កែម ឡី នឹងរៀបចំនៅវត្តចាស់ចំនួន៣ថ្ងៃ ដោយចាប់ផ្ដើមនៅថ្ងៃទី១៤ ដល់ថ្ងៃទី១៦ តុលា និងថ្ងៃទី ១៧ ជាថ្ងៃបង្ហើយបុណ្យនឹងធ្វើនៅទីបញ្ចុះសពលោក បណ្ឌិត កែម ឡី នៅក្នុងខេត្តតាកែវ។
នៅថ្ងៃ ទី១៦ ខែ តុលា នឹងមានការដង្ហែរូបសំណាក លោក បណ្ឌិត កែម ឡី ចេញពីវត្តចាស់ទៅតម្កល់នៅទីបញ្ចុះសពលោក បណ្ឌិត កែម ឡី។ នៅថ្ងៃទី១២ តុលា នេះ បានសងរោងរួចបណ្តើរៗហើយ៕
