ភ្នំពេញ៖ ទីបំផុតភាពមន្ទិលអំពីពិ ធីបុណ្យខួប១០០ថ្ងៃ នៃសពអ្នកវិភាគល្បីឈ្មោះ បណ្ឌិត កែម ឡី ត្រូវបានសាលារាជធានីភ្នំពេញ អនុញ្ញាតជាផ្លូវការឱ្យធ្វើ នៅវត្តពោធិយារាម ហៅវត្តចាស់ ទៅតាមការស្នើសុំរបស់គណៈកម្មាការបុណ្យ។
ការអនុញ្ញាតនេះ បន្ទាប់ពីសាលារាជធានីបានហៅគណៈកម្មការរៀបចំបុណ្យខួប១០០ថ្ងៃទៅប្រជុំនៅកាលពីព្រឹកមិញនេះ។
គណៈកម្មការរៀបចំបុណ្យ ព្រះតេជគុណ ប៊ុត ប៊ុនតិញ មានសង្ឃដីកាក្នុងបទសម្ភាសន៍ជាមួយវិទ្យុស្ត្រីថា អាជ្ញាធរបានយល់ព្រមឲ្យគណៈកម្មការរៀបចំពិធីបុណ្យខួប១០០ថ្ងៃ ជូនលោកបណ្ឌិត កែម ឡី នៅថ្ងៃទី ១៤ដល់ទី១៦ ខែតុលា នៅវត្តចាស់ តាមការស្នើសុំ។
ពិធីបុណ្យខួបគម្រប់១០០ថ្ងៃ សពអ្នកវិភាគបញ្ហាសង្គម រៀបចំធ្វើឡើងរយៈពេល២ថ្ងៃនៅរាជធានីភ្នំពេញ មុននឹងដង្ហែទៅស្រុកត្រាំកក់ ខេត្តតាកែវ នៅថ្ងៃទី១៦ខែតុលា។
លោក កែម ឡី អាយុ៤៦ឆ្នាំជាអ្នកស្រាវជ្រាវពីការអភិវឌ្ឍសង្គម និងជាអ្នកវិភាគនៅកម្ពុជាត្រូវបានខ្មាន់កាំភ្លើងបាញ់សម្លាប់ នៅក្នុងម៉ាតមួយកន្លែង ម្ដុំស្តុបបូកគោ ក្នុងរាជធានីភ្នំពេញ កាលពីព្រឹកថ្ងៃទី១០ ខែកក្កដា ឆ្នាំ២០១៦។
ក្រោយបាញ់សម្លាប់ សពលោកបណ្ឌិតត្រូវបានតម្កល់ទុកពីរសប្តាហ៍ នៅវត្តចាស់ សង្កាត់ជ្រោយចង្វាររាជធានីភ្នំពេញ មុននឹងដង្ហែទៅបញ្ចុះនៅស្រុកកំណើត របស់លោកក្នុងស្រុកត្រាំកក់ ខេត្តតាកែវ កាលពីថ្ងៃ២២កក្កដា ដោយមនុស្សចូលរួមរាប់ម៉ឺនសែននាក់។
ដើម្បីជ្រាបថា តើមូលហេតុអ្វីបានជា សាលារាជធានីភ្នំពេញ ដើរត្រឡប់ក្រោយ អនុញ្ញាតដូចនេះ សូមស្ដាប់ បទសម្ភាសន៍រវាង កញ្ញាច្រឹក ស្រី អូន ជាមួយ ព្រះអង្គ ប៊ុត ប៊ុនតិញ ដូចតទៅ៖