ក្រុងប៉េកាំង ៖ ប្រទេសចិន និង រុស្ស៊ី បានផ្ទុះកំហឹងលើក្រុងវ៉ាស៊ីនតោន កាលពីថ្ងៃអង្គារ ទី១១ តុលា ដោយសារអាមេរិក សម្រេចចិត្ត ដាក់ពង្រាយប្រព័ន្ធការពារមីស៊ីល (THAAD)នៅកូរ៉េខាងត្បូង ដើម្បីឆ្លើយតប ទៅនឹងកម្មវិធីនុយក្លេអ៊ែរ របស់ទីក្រុងព្យុងយ៉ាង។
ថ្លែងនៅក្នុងវេទិកាលើកទី ៧ ប្រចាំឆ្នាំនៅក្រុង Xiangshan ក្នុងតំបន់ការពារជាតិក្រុងប៉េកាំង មន្ត្រីយោធាកំពូលចិននិយាយថា ការផ្លាស់ប្តូរដោយក្រុងសេអ៊ូល និង ក្រុងវ៉ាស៊ីនតោន ដែលបំពាក់ប្រព័ន្ធការពារមីស៊ីល ហាក់បង្កជាការគំរាមកំហែង ដល់ស្ថេរភាពក្នុងតំបន់ និង ជាតម្រុយឆ្ពោះទៅរកការ ប្រណាំងប្រជែងសព្វាវុធ ជា សកល ថ្មីមួយទៀត។
សហរដ្ឋអាមេរិក និង ប្រទេសកូរ៉េខាងត្បូង បានព្រមព្រៀងគ្នាក្នុងដំណើរការ ដំឡើងប្រព័ន្ធ THAAD នេះកាលពីរដូវក្តៅ បន្ទាប់ពីមានការសាកល្បងនុយក្លេអ៊ែរ និង មីស៊ីល របស់សម្ព័ន្ធមិត្តដ៏រឹងចចេសរបស់ក្រុងប៉េកាំង គឺក្រុងព្យុងយ៉ាង។
អគ្គមេបញ្ជាការចិនលោក Cai Jun ប្រាប់ក្រុមមន្ត្រីរបស់លោកកាលពីខែមិថុនា នៅឯសន្និសីទកាសែតស្តីពីវិស័យការពារជាតិ ថា ក្រុងវ៉ាស៊ីនតោន បានប្រើប្រាស់សកម្មភាព របស់កូរ៉េខាងជើង ជាលេសមួយដើម្បីបំពេញមហិច្ឆិតាយោធាប្រឆាំងចិន៕ប្រភព ៖ CNA
