ភ្នំពេញ៖ ប្រធានគណៈកម្មាធិការសិទ្ធិមនុស្ស របស់រដ្ឋាភិបាលកម្ពុជា លោក កែវ រ៉េមី ស្នើសុំឱ្យអ្នករាយការណ៍ពិសេសអង្គការសហប្រជាជាតិ ផ្នែកសិទ្ធិមនុស្ស លោកស្រី រ៉ូណា ស្មីត ផ្តល់យុត្តិធម៌ដល់រាជរដ្ឋាភិបាលកម្ពុជា ទាក់ទងនឹងបញ្ហសិទ្ធិមនុស្ស ដែលមានការរិះគន់ថា កម្ពុជាជារដ្ឋរំលោភសិទ្ធិមនុស្សធ្ងន់ធ្ងរ។
ការថ្លែងដូចនេះរបស់លោក កែវ រ៉េមី ខណៈអ្នករាយការណ៍របស់ UN ចូលជួបពិភាក្សាជាមួយលោក នៅរសៀលថ្ងៃទី ១១ ខែតុលា ឆ្នាំ២០១៦នេះ។ លោក ជួន សារ៉េត រាយការណ៍៖
បញ្ហាសិទ្ធិមនុស្សនៅកម្ពុជាសព្វថ្ងៃ គឺដំណើរការដោយប្រក្រតី គឺមិនមានការរំលោភបំពានសិទ្ធិមនុស្សនោះទេ។ តែផ្ទុយទៅវិញសិទ្ធិមនុស្សនៅកម្ពុជាកំពុងតែដំណើរជាប្រក្រតី។
នេះជាការលើកទ្បើងរបស់លោក កែវ រ៉េមី ប្រធានគណៈកម្មាធិការសិទ្ធិមនុស្ស របស់រដ្ឋាភិបាលកម្ពុជា។
លោក កែវ រ៉េមី បានផ្តល់បទសម្ភាសន៍ឱ្យអ្នកសារព័ត៌មានថា លោកស្រី រ៉ូណាស្មីត លើកទ្បើងពីបញ្ហាសសេររបាយការណ៍ទាក់ទងនឹងការឆ្លើយតប ទៅនឹងអនុសាសន៍ របស់អង្គការសហប្រជាជាតិទៅតាមពេលវេលាកំណត់ដែរឬទេ ហើយថាតើពេលវេលាណា ដែលត្រូវផ្ញើ របាយការណ៍នោះត្រទ្បប់ទៅវិញ។
លោក កែវ រ៉េមី បន្តថាក្រៅពីការលើកទ្បើងនេះ អ្នករាយការណ៍ពិសេសរបស់ UN រូបនេះក៏ចង់ដឹងពីស្ថានភាពសិទ្ធិមនុស្សនៅកម្ពុជាផងដែរ។
ឆ្លើយតបនឹងការសាកសួរពីមន្ត្រី UN ដូចនេះ លោកថាសិទ្ធិមនុស្សនៅកម្ពុជាដំណើរជាធម្មតាដែលបញ្ហានេះលោកបានស្នើឱ្យអ្នករាយការណ៍ពិសេសរូបនេះត្រូវផ្តល់យុត្តិធម៌ជូនកម្ពុជា ។
យ៉ាងណា លោកស្រី ស្រី រ៉ូណាស្មីត បានប្រាប់អ្នកសារព័ត៌មាន ក្នុងភាពប្រញាប់ប្រញាល់ថា លោកស្រីបានលើកឡើងជាច្រើនបញ្ហា របៀបរៀបចំធ្វើកំណត់ហេតុសិទ្ធិមនុស្ស និងកិច្ចសហការទៅថ្ងៃមុខទៀត។
ទាក់ទងនឹងការលើកទ្បើងរបស់លោក កែវ រ៉េមី នេះដែរ អ្នកស្រាវជ្រាវពីការអភិវឌ្ឍសង្គមលោក បណ្ឌិត មាស នី មានប្រសាសន៍ថា ទោះបីជាមន្ត្រីរដ្ឋាភិបាលឆ្លើយតបថាសិទ្ធិមនុស្សនៅកម្ពុជាដំណើរការជាប្រក្រតីយ៉ាងណាក៏ដោយចុះ ប៉ុន្តែមន្ត្រី UN ដែលមកបំពេញទស្សនៈកិច្ចនៅកម្ពុជាគេនឹងដឹងថា តើដំណើរការសិទ្ធិមនុស្សនៅកម្ពុជា មានលក្ខណៈល្អប្រសើរ ឬមិនល្អប្រសើ។
លោក មាស នី បន្តថា ប្រសិនបើមន្ត្រី UN រកឃើញមិនដូចការលើកទ្បើងរបស់រដ្ឋាភិបាលនោះ នឹងធ្វើឱ្យប៉ះពាល់ដល់មុខមាត់កម្ពុជា។
តែយ៉ាងណា ក៏ដោយ ការទាមទាររបស់ប្រធានគណៈកម្មាធិការសិទ្ធិមនុស្ស រដ្ឋាភិបាលកម្ពុជា លោក កែវ រ៉េមី គឺជាការលើកឡើងថ្មីម្ដងទៀត បន្ទាប់ពី តំណាងកម្ពុជា នៅក្រុមប្រឹក្សាសិទ្ធិមនុស្ស នៅក្រុង ហ្សឹណែវ បានឡើងថ្លែងការពារ មុខមាត់កម្ពុជានៅលើឆាកអន្តរជាតិ ពីករណី ដែលសហគមន៍អន្តរជាតិវាយប្រហារកម្ពុជា ថាជារដ្ឋមួយនៅអាស៊ីអាគ្នេយ៌ កំពុងរំលោភសិទ្ធិមនុស្សធ្ងន់ធ្ងរ៕
