ភ្នំពេញ៖ ដើម្បីអបអរសាទរទិវាសុខភាពភ្នែកពិភពលោក កម្មវិធីជាតិនិងក្រសួងសុខាភិបាល អង្គការដៃគូនឹងផ្តល់សេវាពិនិត្យព្យាលបាលជំងឺភ្នែក ជូនប្រជាពលរដ្ឋ ដោយឥតគិតថ្លៃចាប់ពីថ្ងៃទី ១២ដល់ថ្ងៃទី១៤ នៅមន្ទីពេទ្យមិត្តភាព ខ្មែរ-សូវៀត។
លោកសាស្ត្រចារ្យ ងី ម៉េង ប្រធានកម្មវិធីជាតិ សុខភាពភ្នែកបានថ្លែងដូចនេះក្នុង សន្និសីទកាសែត ស្ដីអំពីទិវាសុខភាពភ្នែកពិភពលោក ក្រោមប្រធានបទ រួមគ្នាកាន់តែខ្លាំងដើម្បីកាត់បន្ថយភាពពិការភ្នែក។
កម្មវិធីនេះរៀបចំដោយកម្មវិធីជាតិសុខភាពភ្នែក នៃក្រសួងសុខាភិបាល នៅមន្ទីពេទ្យមិត្តភាពខ្មែរ សូវៀត កាលពីព្រឹកថ្ងៃអង្គារទី១១តុលានេះ។ កញ្ញា ច្រឹក ស្រីអូន មានសេចក្តីរាយការណ៍៖
ការស្រាវជ្រាវរបស់កម្មវិធីជាតិ និង ក្រសួងសុខាភិបាលទៅលើបញ្ហាភ្នែកបានបង្ហាញថាភាពពិការភ្នែកនៅក្នុងប្រទេសកម្ពុជាមានចំនួន ០.៣៨% ក្នុងនោះជាង៧០%កើតឡើងដោយសារជំងឺឡើងបាយ។
លោកសាស្ត្រចារ្យ ងី ម៉េង ប្រធានកម្មវិធីជាតិ សុខភាពភ្នែកមានប្រសាសន៍ថាស្ថានភាពពិការភ្នែកនៅក្នុងប្រទេសកម្ពុជា មានភាពល្អប្រសើរជាមុនបើធៀបទៅឆ្នាំ១៩៩៥ដែលមានចំនួនអ្នកពិការភ្នែកមានទៅដល់១.២%។
តែទោះបីជាយ៉ាងណាកម្មវិធីជាតិ សុខភាពភ្នែកនៃក្រសួងសុខាភិបាល នៅតែមានបំណង ដើម្បីកាត់បន្ថយជំងឺពិការភ្នែក របស់ប្រជាពលរដ្ឋឲ្យបានទាបបំផុត។
លោកបន្តថា កម្មវិធីជាតិសុខភាពភ្នែក នៃក្រសួងសុខាភិបាល សហកាជាមួយ អង្គការដៃគូ និងផ្ដល់សេវាព្យាបាលជំងឺភ្នែកដោយឥតគិតថ្លៃ នៅមន្ទីពេទ្យមិត្តភាព ខ្មែរ សូវៀត និងមន្ទីពេទ្យផ្សេងទៀតទូទាំងប្រទេស។
នៅថ្ងៃទី ២៤ខែតុលា ក៏មានការសហការ ជាមួយគ្រូពេទ្យចិន ដើម្បីព្យាបាលជំងឺភ្នែកជូនប្រជាពលរដ្ឋផងដែរ។
លោក សិត សំអាត ប្រធានមូលនិធិហ្រេតហ្វូឡូកម្ពុជា(Fred Hollows Foundation) មានប្រសាសន៍ថា កន្លងមកបញ្ហាសុខភាពភ្នែក មិនសូវមានការចាប់អារម្មណ៍ តែក្រោយពីមានការសហការគ្នា កម្មវិធីជាតិនិង ក្រសួងសុខាភិបាលសហការ ជាមួយអង្គការផ្សេងៗឃើញថាការមករកសេវាព្យាបាលភ្នែក នៅក្នុងប្រទេសកម្ពុជា មានការកើនឡើងដល់ជាង៤ម៉ឺននាក់។
លោកថា ប្រជាពលរដ្ឋគួរតែ កុំខ្លាចរអាក្នុងការព្យាបាល ដូច ជាការវះកាត់ ដើម្បីជៀសផុតពីការពិការភ្នែក ហើយចំណែករដ្ឋាភិបាល គួរតែបង្កើនការយកចិត្តទុកដាក់ក្នុងកិច្ចការនេះបន្ថែមទៀតដើម្បីឲ្យមានភាពល្អប្រសើរកាន់តែខ្លាំងឡើង។
អង្គការសុខភាពពិភលោក(WHO)និង ទីភ្នាក់ងារអន្តរជាតិសម្រាប់បង្ការ ភាពពិការភ្នែក(IAPB) កំណត់យកថ្ងៃព្រហស្បត្តិ៍ ក្នុងសប្តាហ៍ទី២នៃខែ តុលា ជារៀងរាល់ឆ្នាំដើម្បីប្រារព្ធ កម្មវិធីទិវាសុខភាពភ្នែកពិភពលោក គឺដើម្បីលើកកម្ពស់ការយល់ដឹងពីសុខភាពភ្នែកជាពិសេសការពារ និងថែរក្សាភ្នែកឲ្យបានល្អ៕
