ភ្នំពេញ៖ មន្ត្រីការពារសិទ្ធិមនុស្សនៃអង្គការលីកាដូ (Licahdo) អ្នកសារព័ត៌មាន និងសកម្មជនដីធ្លី ត្រូវបានសន្តិសុខខណ្ឌដូនពេញ វាយដំឲ្យរងរបួស ខណៈសកម្មជនដីធ្លីមានគ្នាប្រមាណ ១០០នាក់ប្រារព្ធទិវាសិទ្ធិលំនៅឋានពិភពលោក នៅថ្ងៃទី ១០ តុលានេះ។ ប៉ុន្តែមន្ត្រីនាំពាក្យសាលាក្រុង បានបដិសេធថា គ្មានអំពើហិង្សាឡើយ។ ហេតុការណ៍ហិង្សានេះ បានកើតឡើង ស្របពេលប្រេសិត របស់អង្គការសហប្រជាជាតិ(UN) មកបំពេញបេសកកម្ម អំពីការរំលោភសិទ្ធិមនុស្ស នៅកម្ពុជា។ លោក ធូ វិរៈ រាយការណ៍៖
នៅថ្ងៃច័ន្ទនេះ សហគមន៍មានទំនាស់ដីធ្លី ប្រាព្ធទិវាសិទ្ធិលំនៅឋានពិភពលោក ដោយពួកគេដង្ហែក្បួនចេញពីតំបន់ដីក្រហម ក្បែរស្ថានទូតរុស្ស៊ី ជាកន្លែងធ្លាប់ រងការបណ្តេញ ប្រជាពលរដ្ឋចេញដោយបង្ខំ។
កងកម្លាំងសន្តិសុខខណ្ឌដូនពេញ បានប្រើអំពើហិង្សា លើមន្ត្រីស៊ើបអង្កេតជាន់ខ្ពស់ នៃអង្គការលីកាដូ លោក អំ សំអាត នៅពេលលោកឃ្លាំមើល សហគមន៍ រងគ្រោះដីធ្លីប្រារព្ធទិវាសិទ្ធិលំនៅឋាន នៅក្បែរសាលាភូមិន្ទវិចិត្រសិល្បៈ ក្រោយរាជវាំង ទីដែលព្រះមហាក្សត្រគង់នៅទីនោះ។
លោក អំ សំអាត ត្រូវបានសន្តិសុខខណ្ឌដូនពេញ វាយចំ ក មាត់ និងក្បាល បណ្តាលឲ្យរងរបួស។ លោក ថា លោកពិចារណា ប្តឹងសន្តិសុខខណ្ឌ ថាតើក្នុងនាមជាបុគ្គល ឬ ក្នុងនាមជាស្ថាប័នរដ្ឋ។ លោក អំ សំអាត ៖«ខ្ញុំកំពុងពិចារណា និងពិភាក្សាជាមួយប្រធានថាតើប្តឹងក្នុងនាមជាបុគ្គល ឬ ក្នុងនាមជាស្ថាប័ន»។
ជុំវិញការប្រើអំពើហិង្សានេះ អ្នកនាំពាក្យសាលារាជធានីភ្នំពេញ លោក មាន ចាន់យ៉ាដា បានបដិសេធថា គ្មានអំពើហិង្សាទេគឺ គ្រាន់តែរុញច្រានគ្នាប៉ុណ្ណោះ ព្រោះសហគមន៍ដីធ្លី ទាំងនោះ បានប្រារព្ធទិវាសិទ្ធិលំនៅឋាន លោកមិនគោរពតាម គោលការណ៍ណែនាំរបស់សាលាក្រុង។
លោក មាន ចាន់យ៉ាដា៖«ចង់ជម្រាប់ថាបងប្អូនទាំងនោះ មិនបានគោរពតាមការណែនាំរបស់យើង។យើងឲ្យជួបជុំនៅទីលានប្រជាធិបតេយ្យ ហើយគាត់បែជាមកហែរមកតាមដងផ្លូវ យើងគ្រាន់តែទប់មិនឲ្យហែ មកកាត់តាមផ្លូវព្រះនរោត្តមអញ្ចឹងមានការប៉ះទង្គិចបន្តិចបន្តួច»។
ទោះបីមន្ត្រីសាលាក្រុងបដិសេធ ថាគ្មានអំពើហិង្សាក្តី តែអ្នកសារព័ត៌មានម្នាក់ គឺ លោក សារឹម សារុន អាយុ៤៥ឆ្នាំ មកពីស្ថាប័ន អ្នកកាសែតឯករាជ្យ ត្រូវវាយរងរបួសបែកក្បាលហូរឈាម។ ក្រៅពីនេះ សកម្មជនដីធ្លីម្នាក់គឺ លោក ចាន់ ពុទ្ធិស័ក្ក ក៏រងរបួសដែរ។
អំពើហិង្សានេះ កើតឡើងស្របពេលដំណើរ បេសកកម្មរបស់លោក ស្រី រ៉ូណា ស្មីត អ្នករាយការណ៍ពិសេស របស់អង្គការសហប្រជាជាតិ ទទួលបន្ទុកសិទ្ធិមនុស្ស មកកាន់ប្រទេសកម្ពុជា ក្នុងរយៈពេល ១០ ថ្ងៃនៅថ្ងៃនេះ ដោយផ្តោតទៅលើស្ថានភាពសិទ្ធិមនុស្ស នាពេលបច្ចុប្បន្ន។
ជុំវិញដំណើរ បេសកកម្មរបស់លោក ស្រី រ៉ូណា ស្មីត នេះ លោក អំ សំអាត មន្ត្រីស៊ើបអង្កេតជាន់ខ្ពស់នៃអង្គការលីកាដូ បញ្ជាក់ថា អង្គការលីការដូ អាចនឹងរាយការណ៍ ទៅលោកស្រី រ៉ូណា ស្មិត អំពីបញ្ហារំលោភសិទ្ធិមនុស្ស ពិសេស ការប្រើអំពើហិង្សាមកលើលោកផ្ទាល់។
ចំណែក លោក សៀ ភារម្យ នាយកលេខាធិការដ្ឋាន ក្រុមការងារ ពិសេសសិទ្ធិលំនៅដ្ឋាន បានឲ្យដឹងថា លោកនឹងចូលរួមជួបលោកស្ត្រី រ៉ូណា ស្មីត ដើម្បីរាយការណ៍ ជុំវិញសិទ្ធិលំនៅឋាន នៅក្នុងប្រទេសកម្ពុជា ប៉ុន្តែ លោកមិនទាន់ដឹងថា នឹងជួបអ្នករាយការពិសេស របស់អង្គការសហប្រជាជាតិ ទទួលបន្ទុកផ្នែកសិទ្ធិមនុស្ស នៅពេលណានៅឡើយទេ។
ករណីហិង្សាដែលគេថា ជាស្នាដៃរបស់សមត្ថកិច្ច បានកើតឡើងជាញឹកញាប់នៅកម្ពុជា ដូច ការប្រព្រឹត្តលើ អ្នកការពារសិទ្ធិមនុស្ស និងអ្នកសារព័ត៌មានដូចនេះដែរ។ អំពើនេះជាញឹកញាប់ក៏បានប្រព្រឹត្តទៅលើ សកម្មជនដីធ្លីជាច្រើននាក់ដែរ៕
