នៅក្នុង វេទិកា Presidential Debate ដែលជា ដំណាក់កាលទី២ នៅថ្ងៃចន្ទទី ១០ តុលា នេះ សង្គ្រាមពាក្យសម្ដី បានផ្ទុះឡើងធ្ងន់ៗ រវាង បេក្ខជនប្រធានាធិបតី២រូប គឺ លោក Donald Trump មកពីគណបក្សសាធារណរដ្ឋ និង លោកស្រី Hillary Clinton មកពីគណបក្ស ប្រជាធិបតេយ្យ។
លោក Donald Trump បាន គំរាមលោកស្រី Hillary Clinton ភ្លាមថា៖« នឹងបង្កើតរដ្ឋអាជ្ញាពិសេស មួយក្រុម ដើម្បីចាប់ខ្លួន លោកស្រី ដាក់ពន្ធនាគារ ប្រសិនបើលោក ឈ្នះឆ្នោតនៅក្នុងការបោះឆ្នោតថ្ងៃទី ៨វិច្ឆិកា» ។
អ្វីនាំឱ្យ លោក Donald Trump គំរាមលោកស្រី Hillary ដូចនេះ ដោយសារលោកបានចោទស្ត្រីបេក្ខជនរូបនេះថា បានប្រព្រឹត្តខុស ក្រមសីលធម៌ ជាមន្ត្រីសាធារណៈ ដោយសារតែ លោកស្រីបានប្រើប្រាស់ Email ឯកជន ក្នុងឋានៈជារដ្ឋមន្ត្រីការបរទេស រវាងឆ្នាំ២០០៩ ដល់២០១៣។
តែនៅពេលជាមួយគ្នានេះ លោកស្រី Hillary Clinton បានថ្លែងដោយចំអកថា៖« លោកឯងគ្មានឱកាស ទៅកាន់តំណែងសេតវិមានទេ»។
តាមទីភ្នាក់ងារសារព័ត៌មាន Reuters លោក Donald Trump ក៏មានរឿងអាស្រូវច្រើនដែរ កាលពី១០ឆ្នាំមុន ដូចជាលោកបៀតបៀនលើស្ត្រីភេទ និង ការលាក់បាំង ទ្រព្យសម្បត្តិ លោកជាដើម។
រយៈពេលចុងក្រោយនេះ លោក Donald Trump ទទួលរងការរិះគន់ជាច្រើន ពីគណបក្សរបស់លោក ដោយសារលោកឃោសនា មិនអនុលោមតាម ក្រមសីលធម៌ របស់គណបក្សដែលរហូតធ្វើឱ្យមានការដកសេចក្ដីទុកចិត្ត ពីឥស្សរជនល្បីៗរបស់បក្សទៀតផង។
តាមការស្ទង់មតិ លោកស្រី Hillary Clinton នៅតែឈានមុខ លោក Donald Trump ប៉ុន្តែមានភាគរយតិចតួច៕ប្រភព CNA