ភ្នំពេញ៖ លោក នេត ភក្ដ្រា អ្នកនាំពាក្យសាលាក្ដីខ្មែរក្រហម ឬគេហៅថា អង្គជំនុំជម្រះវិសាមញ្ញាក្នុងតុលាការកម្ពុជា ហៅកាត់ថា ( អ.វ.ត.ក) បានឱ្យដឹងថា នៅថ្ងៃ១០ តុលា ខាងមុខនេះ ការជំនុំជម្រះក្ដីលើអតីតកាលមេដឹកនាំខ្មែរក្រហមពីររូបនៃសំណុំរឿង០០២ វគ្គ២ នឹងបន្ដដំណើរការឡើងវិញ ទោះបីសាលាក្ដីជនលិចដោយសារទឹកភ្លៀងក៏ដោយ។
លោកបានបញ្ជាក់ទៀតថា សាលាក្ដីខ្មែរក្រហម នឹងធ្វើស្ពានឈើ ដើរពីផ្លូវជាតិលេខ៤ ដល់សាលាក្ដីដើម្បីបន្ដការងារឡើងវិញ ជាពិសេសការបើកសវនាការលើសំនុំរឿង អតីត មេដឹកនាំខ្មែរក្រហមពីររូបគឺ លោក នួន ជា អតីតប្រធានរដ្ឋសភា និង លោក ខៀវ សំផន អតីតប្រមុខរដ្ឋ នៃរបបអាវខ្មៅនោះ។
ក្នុងបទសម្ភាសន៍ខ្លីជាមួយវិទ្យុស្ដ្រីនៅល្ងាចថ្ងៃទី០៦ខែតុលានេះ លោក នេត ភក្ដ្រា បានបញ្ជាក់ថា លោក ខៀវ សំផន និងលោក នួន ជា នៅតែបន្ដឃុំខ្លួននៅក្នុងបរិវេណសាលាក្ដីខ្មែរក្រហម ដោយគ្មានការរុះរើទៅណា ទោះបីផ្នែកខ្លះនៃសាលាក្ដី លិចទឹកក៏ដោយ។
សូមស្ដាប់ប្រសាសន៍របស់លោក នេត ភក្ដ្រា អ្នកនាំពាក្យសាលាក្ដីខ្មែរក្រហមដូចតទៅ៖
