ប្រជាជនអ៊ីស្រាអែលរាប់សែននាក់ នឹងធ្វើបដិសណ្ឋារកិច្ច ចុងក្រោយចំពោះអតីតនាយករដ្ឋមន្ដ្រីរបស់ខ្លួន គឺ លោក Shimon Peres ដែលបានស្លាប់ ដោយរោគចាស់ជរា នៅអាយុ ៩៣ឆ្នាំ ដែលក្នុងពិធីនេះ មេដឹកនាំមួយចំនួនក៏នឹងធ្វើដំណើរ ទៅចូលរួមគោរពវិញ្ញាណក្ខន្ធលោកដែរ។
សេចក្ដីរាយការណ៍ របស់បណ្ដាញព័ត៌មាន BBCបានឲ្យដឹងថា លោក បារ៉ាក់ អូបាមា ប្រធានាធិបតីអាមេរិក អគ្គលេខាធិការអង្គការសហប្រជាជាតិ លោក Ban Ki-moon លោកប្រធានាធិបតីបារាំង Francois Hollande អធិការបតីអាល្លីម៉ង់ Angela Merkel នាយករដ្ឋមន្ដ្រីកាណាដា Justin Trudeau នាយករដ្ឋមន្ដ្រីអូស្ដ្រាលី ប្រធានាធិបតីម៉ិចស៊ិច Enrique Pena Nieto នឹងទៅ គោរព វិញ្ញាណក្ខន្ធ អតីតនាយករដ្ឋមន្ដ្រីអ៊ីស្រាអែលរូបនេះ។
សពអតីតនាយករដ្ឋមន្ដ្រីអ៊ីស្រាអែល Shimon Peres នឹងត្រូវដាក់តំកល់ នៅវិមានរដ្ឋសភា រហូតដល់ថ្ងៃសុក្រ ទើបហែទៅបញ្ចុះ។
លោក Shimon Peres អតីតនាយករដ្ឋមន្ដ្រីអ៊ីស្រាអែល២អាណត្តិ លោកបានស្លាប់ ដោយសារជម្ងឺដាច់សរសៃឈាមក្នុងខួរក្បាល បន្ទាប់ពីលោកបានទៅព្យាបាលរយៈពេល២សប្ដាហ៍។
លោកបានទទួលពានរង្វាន់នូបែលសន្ដិភាព នៅឆ្នាំ១៩៩៤ ដោយសារតែលោក បានធ្វើឱ្យមានកិច្ចព្រមព្រៀងសន្ដិភាព ទូលំទូលាយមួយ ជាមួយនឹងរដ្ឋាភិបាលដែនដីប៉ាឡេស្ទីន។
ប្រជាជនអ៊ីស្រាអែល ចាត់ទុក លោក Shimon Peres ជាបុរសរដ្ឋរបស់ខ្លួន ដែលបានកាន់អំណាចធ្វើអោយមានយុត្ដិធម៌សង្គម និងសន្ដិភាពតំបន់ ៕ប្រភព BBC
