រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា បានថ្លែងថាក្រសួងនឹងរៀបចំគម្រោងស្តីពីការតាមដាន ការធ្វើផែនទីហានិភ័យលើប្រាសាទបុរាណខ្មែរ តំបន់ភាគខាងត្បូងប្រទេស។
ការលើកឡើងដូចនេះស្របពេលដែល ស្ថានទូតអាមេរិក ចុះហត្ថលេខាផ្តល់ថវិកាជាង ១២ ម៉ឺនដុល្លារអាមេរិកដល់ក្រសួងវប្បធម៌ និងវិចិត្រសិល្បៈនៃប្រទេសកម្ពុជា កាលពីថ្ងៃទី២៦ ខែកញ្ញា ឆ្នាំ២០១៦នេះ ដែលធ្វើទ្បើងនៅភ្នំដា ខេត្តតាកែវ។
បន្ទាប់ពីលោក William Heidt ចុះហត្ថលេខា ដើម្បីផ្ដល់ប្រាក់ជំនួយនេះ រដ្ឋមន្ត្រីក្រសួងវប្បធម៌ និងវិចត្រសិល្បៈលោកស្រី ភឿង សកុណា បានថ្លែងថា សហរដ្ឋអាមេរិក បានជួយគាំទ្រកម្ពុជា ក្នុងការថែរក្សា វប្បធម៌បេតិកភណ្ឌ កម្ពុជា តាមរយៈការផ្តល់ថវិកា គឺដើម្បីការពារបេតិកភណ្ឌ របស់កម្ពុជា ជាពិសេសអាមេរិកបានសហការ ជាមួយកម្ពុជា ដែលបាននាំយកនូវវត្ថុបុរាណកម្ពុជា ទៅអាមេរិកដោយខុសច្បាប់ បញ្ជូនមកកម្ពុជាវិញ។
លោកស្រី ភឿង សកុណា បញ្ជាក់ដែរថា ប្រាសាទបុរាណខ្មែរ គឺមានតម្លៃ របស់មនុស្សជាតិទាំងមូល។ «ជាថ្មីម្តងទៀតយើងឃើញថាថ្ងៃនេះ យើងចូលរួមក្នុងពិធីនេះ គឺជាការផ្តល់នូវថិកាជំនួយថ្មី នៅក្នុងការកសាង តាមដាននូវផែនទីហានិភ័យរបស់ប្រាសាទនានា របស់ខ្មែរដែលនៅភាគខាងត្បូងប្រទេស យើងដឹងហើយថាប្រាសាទពិតមែនជារបស់ខ្មែរ ដែលបាន កសាងដោយបុព្វបុរសខ្មែរ ក៏ប៉ុន្តែមានតម្លៃរបស់មនុស្សជាតិទាំងមូលតែម្តង ពីព្រោះគឺជាស្ថាបត្យកម្ម គឺជាការកែច្នៃ របស់ដូនតាខ្មែរ ដែលបានធ្វើទ្បើងមិនមែន សម្រាប់តែជនជាតិខ្មែរនោះទេ សម្រាប់ឱ្យប្រជាជនទាំងអស់ នៅលើពិភពលោក យល់ដឹងពីបញ្ញាណ របស់មនុស្សជំនាន់មុន»។
ចំណែក ឯកអគ្គរដ្ឋទូតសហរដ្ឋអាមេរិក ប្រចាំកម្ពុជា លោក William Heidt បានថ្លែងសុន្ទរកថា ជាភាសារខ្មែរថា ថវិកាគឺ ក្នុងគោលបំណង ចូលរួមថែរក្សា បេតិកភណ្ឌវប្បធម៌ របស់ខ្មែរ។
លោក បញ្ជាក់ថាការផ្តល់ថវិកាដល់ក្រសួងនេះដែរ គឺជាអំណោយក្នុងការចងក្រង ឯកសារស្តីពីប្រាសាទចំនួន ២៤ ដែលត្រូវបានសង់ពីសតវត្សទី ០៦ និងទី ០៧ នៅក្នុងខេត្តកំពង់ចាម កំពង់ឆ្នាំង កំពង់ស្ពឺ កំពត ព្រៃវែង ត្បូងឃ្មុំ និងខេត្តតាកែវ។
លោក William Heidt បន្តថា៖ «គម្រោងនេះនឹងបង្កើតការយល់ដឹង របស់យើងលើបេតិកភណ្ឌវប្បធម៌របស់ខ្មែរ ហើយជួយក្នុងការខិតខំអភិរក្ស ទីតាំងដ៏សំខាន់ទាំងនេះអំណោយថវិកា ដែលយើងចុះហត្ថលេខាថ្ងៃនេះ បានមកពីមូលនិធិ ឯកអគ្គរដ្ឋទូត សម្រាប់ការអភិរក្ស វប្បធម៌ហៅកាត់ជាភាសារអង់គ្លេស AFCPនៃក្រសួងការបរទេស សហរដ្ឋអាមេរិក»។
សូមជំរាបថា អំណោយថវិកានេះបានមកពីមូលនិធិ ឯកអគ្គរដ្ឋទូត សំរាប់ការអភិរក្សវប្បធម៌(AFCP) នៃក្រសួងការបរទេស សហរដ្ឋអាមេរិកដែលជាកម្មវិធីសំខាន់មួយរបស់ រដ្ឋាភិបាលអាមេរិក សំរាប់ជួយប្រទេសដទៃទៀត ក្នុងការអភិរក្ស បេតិកភណ្ឌអរូបិយ និងរូបិយ។
នេះជាការផ្តល់ថវិកាលើកទី១៨របស់ AFCP ដែលប្រទេស កម្ពុជា បានទទួលមូលនិធិនេះគិតចាប់តាំងពីឆ្នាំ ២០០១ មក។
នៅក្នុងរយៈពេល ១៥ ឆ្នាំកន្លងទៅនេះរដ្ឋាភិបាលសហរដ្ឋអាមេរិក បានចំណាយប្រាក់ចំនួន ៣,៨ លានដុល្លារអាមេរិក ទៅលើកម្មវិធីនានា ដែលទ្រទ្រង់ការអភិរក្ស បេតិកភណ្ឌវប្បធម៌ដោយរាប់ពីយុទ្ធនាការ ប្រឆាំងនឹងការលួចប្លន់ ព្រមទាំងបានជួយដល់ ការវិភាគទិន្នន័យ នៃការអភិរក្ស នៅតាមទីតាំងនានា ដូចជានៅប្រាសាទបាក់ខែងនៅ ប្រាសាទអង្គរវត្ដជាដើម ៕