ភ្នំពេញ៖ ធនាគារអភិវឌ្ឍន៍អាស៊ីហៅកាត់ថា ADB បានព្យាករណ៍ថា ប្រទសកម្ពុជាបានរក្សាកំណើនសេដ្ឋកិច្ច ៧ ភាគរយនៅឆ្នាំ ២០១៦ នេះ និង ៧.១ ភាគរយៈក្នុងឆ្នាំ ២០១៧ ។ នេះបើតាមសេចក្តីជូនដំណឹងរបស់ ធនាគារអភិវឌ្ឍន៍អាស៊ី (ADB) ចុះផ្សាយនៅថ្ងៃទី ២៧ ខែ កញ្ញានេះ។
នៅក្នុងសេចក្តីជូនដំណឹងដដែលបានឲ្យដឹងថា ប្រធានធនាគារវឌ្ឍន៍អាស៊ី (ADB) លោក Samiuela Tukuafu បានព្យាករណ៍ថា សេដ្ឋកិច្ចប្រទេសកម្ពុជា នឹងនៅតែរក្សាភាពរឹងមាំ ដោយការនាំចេញសម្លៀកបំពាក់ និងស្បែងជើងមានការកើនឡើងចំនួន ៩,៤ ភាគរយ សម្រាប់ឆមាសទី១ ក្នុងឆ្នាំ ២០១៦នេះ។ លោកបន្តថា ទោះបីជាកំណើនឥណទានជូនដល់វិស័យឯកជនបានថយចុះត្រឹម ២៨,១ ភាគរយ បើធៀបទៅនិងឆ្នាំ ២០១៥។ ប៉ុន្តែ តម្រូវការក្នុងស្រុកមានកម្រិតខ្ពស់។
ធនាគារអភិវឌ្ឍន៍អាស៊ី ក៏បានប្រកាសជំហរគាំទ្រកំណើនសេដ្ឋកិច្ចប្រកបដោយបរិយាប័ន្នក្នុងការវិនិយោគសំខាន់ៗ ក្នុងផលិតកម្មកសិកម្ម ការដឹកជញ្ជូន ភស្តុភារ ការអប់រំ និងការបណ្តុះបណ្តាលបច្ចេកទេសវិជ្ជាជីវៈ និងការអភិវឌ្ឍន៍វិស័យហិរញ្ញវត្ថុ។
សេចក្តីជូនដំណឹងនេះក៏បានបញ្ជាក់ថា ការចំណាយរបស់រាជរដ្ឋាភិបាលមានការកើនឡើងចំនួន ១៥, ៦ ភាគរយ នៅក្នុងឆមាសទី១ ក្នុងឆ្នាំនេះ។ ការកើនឡើងខ្ទង់ចំណាយនេះ ដោយសារកំណើននៃបៀវត្សរ៍សេវាសាធារណៈ។ ចំណែកប្រាក់ចំណូលមានការកើនឡើងចំនួន ២៤,១ ភាគរយ ដោយសារការកែលម្អនៃការប្រមូលពន្ធរបស់រាជរដ្ឋាភិបាល។
រីឯការនាំចេញទំនិញ បានកើនឡើងក្នុងកម្រិតប៉ាន់ប្រមាណចំនួន ១២,៣ ភាគរយ (បើគិតជាដុល្លារអាមេរិក) ក្នុងរយៈពេល ៦ ខែដំបូង ដែលមានអត្រាភាពលឿនជាងអាត្រា ៩,៤ ភាគរយ ក្នុងឆមាសទី១ ឆ្នាំ ២០១៥។ កំណើននៃការនាំចូលទំនិញ បានធ្លាក់ចុះពី ១៧,០ភាគរយ មកត្រឹម ៧,៣ភាគរយ៕
