វ៉ាស៊ិនតោន៖ ក្រសួងការបរទេសសហរដ្ឋអាមេរិកនិយាយកាលពីថ្ងៃចន្ទ ទី២៦ កញ្ញា ម្សិលមិញថា សេចក្តីសម្រេចរបស់តុលាការវៀតណាម ដែលសម្រេចកាត់ទោសសកម្មជនដីធ្លីពីររូប និងជាអ្នកសរសេរប្លុករិះគន់នយោបាយវៀតណាមដ៏ល្បីល្បាញឱ្យពន្ធនាគារ និងតម្កល់សាល ក្រមទុកជាបានការ។ ក្រសួងការបរទេសអាមេរិក បន្តថាការសម្រេចសេចក្តីរបស់រដ្ឋាភិបាលវៀតណាមលើកករណីនេះ គឺបានក្លាយជាក្តីបារម្ភសម្រាប់សហ រដ្ឋអាមេរិក ចំពោះបញ្ហាសិទ្ធិមនុស្សក្នុងប្រទេសវៀតណាម។
លោក ម៉ាក តូនើរ(Mark Toner) អ្នកនាំពាក្យនៃក្រសួងការបរទេសសហរដ្ឋអាមេរិកបានថ្លែងក្នុងសន្និសីទកាសែតប្រចាំថ្ងៃថា៖ «ការប្រើប្រាស់បទប្បញ្ញត្តិព្រហ្មទណ្ឌ ដោយតុលាការវៀតណាមសម្រាប់ដាក់ទោសបុគ្គលដែលប្រើសិទ្ធិរបស់ពួកគេដើម្បីសេរីភាពនៃការបញ្ចេញមតិនេះ គឺជាបញ្ហាអាក្រក់ខ្លាំងណាស់»។
អ្នកល្បីខាងសរសេរប្លុករិះគន់នយោបាយវៀតណាម លោក ងៀង ហ៊ុង វិន(Nguyễn Hữu Vinh) វ័យ ៦០ ឆ្នាំ និងជំនួយការរបស់លោក គឺ លោក ស្រី ងៀង ធីមិន ថី(Nguyễn-Thị-Minh-Thúy) អាយុ ៣៦ ឆ្នាំបានថ្លោះសិទ្ធិក្នុងការប្តឹងឧទ្ធរណ៍ក្នុងករណីនេះ កាលពីថ្ងៃព្រហស្បតិ៍។
ប្រការដែលមិនអាចប្តឹងជំទាស់នឹងសាលក្រមតុលាការជាន់ទាបបានបែបនេះ ក៏ព្រោះតែតុលាការជាន់ខ្ពស់វៀតណាម បានតម្កល់សាលក្រមរបស់ពួកគេទាំងពីរចូលជាស្ថាពរទៅហើយ ដោយតុលាការអះអាងជាថ្មីថា ពួកគេទាំងពីរបានរំលោភបំពានលើសេរីភាពរបស់ស្ថាប័នរដ្ឋ និងធ្វើឱ្យប៉ះ ពាល់ដល់ផលប្រយោជន៍សាធារណរបស់រដ្ឋ។
តុលាការបានសម្រេចដាក់ទោសលោក វិន(Vinh) ឱ្យជាប់ពន្ធនាគាររយៈពេល ៥ ឆ្នាំ ចំណែកសហការីរបស់លោក គឺលោកស្រី ថី(Thúy) ជាប់គុករយៈពេល ៣ ឆ្នាំ។ ទាក់ទិនសំណុំរឿងនេះ ក្រុមមន្ត្រីសិទ្ធិមនុស្ស និងក្រុមអ្នកតស៊ូសេរីភាពបញ្ចេញមតិ បានអំពាវនាវទៅកាន់តុលាការដោះលែងពួកគេទាំងពីរនាក់ឱ្យមានសេរីភាពឡើងវិញ។
កាលពីថ្ងៃអង្គារតុលាការក្នុងស្រុកមួយ នៅក្រុងហាណូយ បានផ្តន្ទាទោសសកម្មជនដីធ្លីលោកស្រី កឹង ធី ថេវ (Cấn Thị Thêu) វ័យ ៥៤ ឆ្នាំ ឱ្យជាប់ពន្ធនាគារចំនួន ២០ខែផងដែរ ពីបទបង្កឱ្យខូចសណ្ដាប់ធ្នាប់សាធារណៈ។ អ្នកស្រី ថេវ ត្រូវបានចាប់ឃុំខ្លួនបណ្តុះអាសន្នអស់រយៈពេលជាង ៣ ខែមកហើយ បន្ទាប់ពីអ្នកស្រីបានដឹកនាំការតវ៉ានៅក្រៅអាគាររដ្ឋាភិបាលប្រឆាំងនឹងអ្វីដែលអ្នកស្រីហៅថា ជាការរឹបអូសដីធ្លីខុសច្បាប់។
លោក Toner អ្នកនាំពាក្យនៃក្រសួងការបរទេសសហរដ្ឋអាមេរិកក៏បានថ្លែងបន្តទៀតថា៖ «យើងសូមអំពាវនាវដល់រដ្ឋាភិបាលវៀតណាម ឱ្យដោះលែងបុគ្គលទាំងបីនាក់ ព្រមទាំងពួកអ្នកទោសមនសិការផ្សេងទៀត។ ជាងនេះទៅទៀតលោកថា វៀតណាមត្រូវអនុញ្ញាតឱ្យបុគ្គលទាំងអស់នោះ អាចសម្តែងទស្សនៈនយោបាយរបស់ពួកគេ និងផ្តល់សិទ្ធិក្នុងការប្រមូលផ្តុំដោយសន្តិវិធី ដោយគ្មានការភ័យខ្លាច និងគ្មានការដាក់ទោស»។
ប្រភព៖CNA
