យ៉ាងហោចណាស់មានមនុស្ស ៣ នាក់រងរបួសក្នុងការវាយប្រហារដោយគ្រាប់បែកដៃមួយគ្រាប់ នៅតាមបណ្តោយផ្លូវ ១៦៣ ស្ថិតក្នុងសង្កាត់បឹងកេងកង៣ ខ័ណ្ឌចំការមន រាជធានីភ្នំពេញ វេលាម៉ោង៧ និង៤៥នាទីយប់ថ្ងៃទី០៦ កញ្ញា។
តាមមន្ត្រីប៉ូលីសបានបញ្ជាក់ថា សមត្ថកិច្ចនៅពុំទាន់អាចកំណត់ពីមូលហេតុនៃការបំផ្ទុះគ្រាប់បែកនេះនៅឡើយនោះទេ។ តែបើយោងតាមសាក្សី នៅទីកើតហេតុបានឱ្យដឹងមុនពេលករណីបំផ្ទុះគ្រាប់បែកថា គេឃើញមានយុវជន ២ នាក់ជិះម៉ូតូមួយគ្រឿងតាមពីក្រោយរថយន្តឡិចស៊ឹស AX330 ពណ៌សមួយគ្រឿង ពេលមកដល់ចំណុចកើតហេតុ ជនបង្កក៏បានបោះគ្រាប់បែកចូលក្រោមរថយន្តតែម្តង តែមិនបានបង្កឱ្យអ្នកនៅលើរថយន្តរងរបួលនោះទេ។
យ៉ាងណាមន្ត្រីសមត្ថកិច្ចបង្ហាញថា ការបំផ្ទុះគ្រាប់បែកនេះបានបង្កឱ្យមនុស្ស ៣រងរបួល និងបានបង្កឱ្យរថយន្ត និងម៉ូតូមួយចំនួនរងការខូចខាតផងដែរ។
សូមបញ្ជាក់ថា អ្នករងរបួសទាំង ៣ នាក់នោះមានស្រី្ត ២នាក់ ម្នាក់ជាជនជាតិឥណ្ឌា ឈ្មោះ Dhamendra Singh Kshetrimayum អាយុ៣៥ឆ្នាំ ជាគ្រូបង្រៀនស្នាក់នៅភ្នំពេញ រងរបួលត្រង់ចង្កេះ ហើយត្រូវបញ្ជូនទៅកាន់បមន្ទីរពេទ្យមិត្តភាពកម្ពុជា-សូវៀត។ រីឯស្ត្រីម្នាក់ទៀតជាជនជាតិខ្មែរឈ្មោះ ចាន់ វន្នី អាយុ៣៧ឆ្នាំ មុខរបបជាគ្រូបង្រៀន ស្នាក់នៅភ្នំពេញដូចគ្នា ត្រូវបានបញ្ជូនទៅសង្គ្រោះនៅមន្ទីរពេទ្យកាល់ម៉ែត និងបុរសជនជាតិវៀតណាមម្នាក់ទៀតឈ្មោះ ម៉ឹង ហូវ អាយុ ៣៨ ជាអ្នកលក់ខោអាវបោះដុំនៅផ្សារអូរឫស្សី ស្នាក់នៅភ្នំពេញ ក៏ត្រូវបានបញ្ជូនទៅសង្គ្រោះនៅមន្ទីរពេទ្យកាល់ម៉ែតដូចគ្នា។ នេះបើតាមការឱ្យដឹងពីមន្ត្រីសមត្ថកិច្ច ដែលបានប្រាប់កាសែតភ្នំពេញប៉ុស្តិ៍៕
