ក្រុងហាងចូវ៖ មន្ត្រីជប៉ុននិយាយថា នាយករដ្ឋមន្ត្រីជប៉ុនលោក ស៊ីន ហ្សូអាបេ នឹងបើកកិច្ចចរចាក្រៅវេទិកាG20 ជាមួយប្រធានាធិបតីចិនលោក ស៊ី ជីនពីង នៅថ្ងៃចន្ទទី០៥ កញ្ញានេះ ដែលជាលើកដំបូងក្នុងរយៈពេលជាងមួយឆ្នាំ បន្ទាប់ពីប្រទេសមានសេដ្ឋកិច្ចធំជាងគេទាំងពីររបស់អាស៊ីមើលមុខគ្នាមិនចំដោយសារបញ្ហាជម្លោះដែនទឹកនៅសមុទ្រចិនខាងកើត។
យោងតាមបណ្ដាញផ្សាយព័ត៌មាន Channel News Asia កិច្ចប្រជុំដាច់ដោយឡែកនេះនឹងធ្វើឡើង បន្ទាប់ពីសេចក្តីសន្និដ្ឋានបិទនៃកិច្ចប្រជុំកំពូល G-20 ដែលបានប្រព្រឹត្តរយៈពេលពីរថ្ងៃចាប់ផ្តើមកាលពីថ្ងៃអាទិត្យម្សិលមិញ នៅទីក្រុង ហាងចូវ (Hangzhou) ប្រទេសចិន។
ភាពតានតឹងនេះ បានផ្ទុះឡើងកាលពីខែមុន បន្ទាប់ពីទូកនេសាទ និងនាវាឆ្មាំសមុទ្រចិនជាង ១២គ្រឿង បានបើកចូលតំបន់ប្រជុំកោះតូចៗដែលគ្មានមនុស្សរស់នៅនៃសមុទ្រចិនខាងកើត ដែលទីក្រុងតូក្យូតែងតែអះអាងថា ជារបស់ខ្លួនគ្រប់គ្រង ប៉ុន្តែចិនវិញក៏ទាមទារប្រជុំកោះនេះដូចគ្នា។
ទំនាក់ទំនងរវាងជប៉ុន និង ចិន ក៏បានផ្ទុះឡើងកាន់តែល្អក់កករថែមទៀត ដោយសារបញ្ហាជម្លោះសមុទ្រចិនខាងត្បូង នោះក៏ព្រោះតែប្រទេសជប៉ុន បានទទូចឱ្យចិនគោរពសេចក្តីសម្រេចតុលាការអន្ដរជាតិក្រុងឡាអេ តែប្រទេសចិនវិញបានច្រានចោលសេចក្តីសម្រេចនេះ ហើយនៅតែបន្តការទាមទារទឹកដីជម្លោះនោះ ថាជារបស់ចិនដដែល។ មួយវិញទៀត ចិន ក៏ធ្លាប់បានព្រមានជប៉ុនថា មិនត្រូវជ្រៀតជ្រែកក្នុងរឿងសមុទ្រចិនខាងត្បូងនោះឡើយ៕ ប្រភព:CNA