ភ្នំពេញ៖ លោក ហែម សុជាតិ មេធាវីការពារក្ដីឱ្យលោក អ៊ុំ សំអាន បានហៅ សាលដីការបស់តុលាការកំពូលថា ជារឿងអយុត្ដធម៌។ ការហៅរបស់លោកមេធាវីនេះ ធ្វើឡើងបន្ទាប់ពី តុលាការកំពូល សម្រេចចេញសាលដីកា បដិសេធមិនអោយលោក អ៊ុំ សំអាន បាននៅក្រៅឃុំ។
សាលដីការបស់តុលាការកំពូលបានប្រកាសតម្កល់ទុក សេចក្ដីសម្រេចរបស់សាលាឧទ្ធរណ៍ដែលមិនអនុញ្ញាតិឲ្យលោក អ៊ុំ សំអាន បាននៅក្រៅឃុំ។
កាលពីសប្ដាហ៍មុន នៅពេលសមត្ថកិច្ចនាំខ្លួនលោកមកកាន់តុលាការ លោក អ៊ុំ សំអាន បានស្រែកប្រាប់អ្នកសារព័ត៌មានថា ការចាប់ខ្លួនគឺជាការធ្វើរដ្ឋប្រហាររដ្ឋធម្មនុញ្ញត្រង់មាត្រា៨០ចែងពីការការពារ អភ័យឯកសិទ្ធិសមាជិកសភា។ តែបក្សកាន់អំណាចបដិសេធ។ កញ្ញា ជុំ ជោគជាតា រាយការណ៍បន្ត៖
នៅព្រឹកថ្ងៃទី១៧ខែសីហា ឆ្នាំ២០១៦នេះ តុលាការកំពូលបានសម្រេចចេញសាលដីការ បដិសេធបណ្ដឹង សុំនៅក្រៅឃុំ របស់លោក អ៊ុំ សំអាន អ្នកតំណាងរាស្ដ្រគណបក្សសង្គ្រោះជាតិ ដែលត្រូវបានចាប់ឃុំខ្លួន ក្រោមបទចោទ បង្ហោះផែនទីក្លែងក្លាយ ពាក់ព័ន្ធរឿងព្រំដែនជាមួយប្រទេសវៀតណាម។ ការប្រកាសសាលដីការបស់តុលាការកំពូលនៅថ្ងៃនេះ ធ្វើឡើងដោយពុំមានវត្តមាន លោក អ៊ុំ សំអាន ចូលស្ដាប់សាលដីការ។
លោកមេធាវីការពារក្ដីឲ្យលោក អ៊ុំ សំអាន គឺ លោក ហែម សុជាតិ បានប្រាប់អ្នកសារព័ត៌មានថា ការសម្រេចរបស់តុលាការកំពូល ជារឿងអយុត្ដិធម៌។
លោក ហែម សុជាតិ ៖ «ខ្ញុំយល់ថា នៅតែមិនមានភាពយុត្ដិធម៌ដដែលហ្នឹង គឺថា យើងគិតថា អ្វីដែលជាការចោទប្រកាន់ គឺវាជាបទល្មើសមជ្ឈិមទេ វាអត់មានប៉ះពាល់អីធ្ងន់ធ្ងរដល់សង្គមទេ បាទ៎ ហើយគាត់ជាតំណាងរាស្ដ្រដែលមានមុខរបរ ហើយប្រជារាស្ដ្រ៦,៧ ម៉ឺននាក់ ដែលបោះឆ្នោតអោយ ទំរាំ ឈរឈ្មោះជាតំណាងរាស្ដ្រ ហើយឥលូវគាត់មិនអាចនៅក្រៅឃុំបាន ចឹងខ្ញុំគិតថា វាមិនបាន ផ្ដល់យុត្ដិធម៌ដល់គាត់ទេ»។
លោក ហែម សុជាតិ បានបញ្ជាក់បន្ថែមថា ក្នុងរឿងក្ដីរបស់លោក អ៊ុំ សំអាន សាលាដំបូងរាជធានីភ្នំពេញ សាលាឧទ្ធរណ៍ និងតុលាការកំពូល បានសម្រេច ដោយលើកហេតុផលដូចៗគ្នាទាំងអស់ ហើយអ្វីដែលលោកមេធាវី ខិតខំប្រឹងប្រែង និងសង្ឃឹមនោះ គឺជារឿងខកចិត្ត ហើយវាក៏ជាការខកចិត្តមួយរបស់កូនក្ដីលោកដែរ។ លោកថា លោក អ៊ុំ សំអាន ជាតំណាងរាស្ដ្រដែលនៅមានអភ័យឯកសិទ្ធិសភា តែបែរជាត្រូវបានឃុំខ្លួនជាបណ្ដោះអាសន្នទៅវិញ។
លោក ហែម សុជាតិ បន្ដថា តុលាការកំពូល មិនគួរបដិសេធបណ្ដឹងសុំនៅក្រៅឃុំនេះទេ ព្រោះលោកថា កូនក្ដីលោក មានហេតុផលនិងសំអាងត្រឹមត្រូវ ទើបសុំនៅក្រៅ ឃុំ។ លោកបានពន្យល់ពីមាត្រា៨០នៃរដ្ឋធម្មនុញ្ញដែល ការពារអភ័យឯកសិទិ្ធរបស់អ្នកតំណាងរាស្ត្រ។
លោកមេធាវី បានពន្យល់បន្ដលើចំនុចនេះទៀតថា៖ «មាត្រា៨០នៃរដ្ឋធម្មនុញ្ញ ការដកអភ័យឯកសិទ្ធតំណាងរាស្ដ្រណាម្នាក់នៃរដ្ឋសភា គឺវាទាមទារអោយមានសម្លេងភាគច្រើន២ភាគ៣បានន័យថា គឺមាន៨២សមាជិកសភាអនុម័តអោយដកអភ័យឯកសិទ្ធិ គឺបានអាចដកបាន ប៉ុន្ដែក្នុងករណីនេះ គឺអត់ទាន់មានសមាជិកសភា៨២រូបណាដកអភ័យឯកសិទ្ធិទេ ហើយអ្វីដែលសភាស៊ើបសួរ (សាលាឧទ្ធរណ៍) ក៏ដូចជាតុលាការកំពូល បញ្ជាក់ថា ខ្លួនអត់មានសមត្ថកិច្ចពិចារណា សិទ្ធិតំណាងរាស្ដ្រនោះ ខ្ញុំគិតថាជារឿងមិនត្រឹមត្រូវទេ ពីព្រោះទាំងតុលាការកំពូល ទាំងសភាស៊ើបសួរឧទ្ធរណ៍ គឺខ្លួនមានសិទ្ធិពិនិត្យរាល់និយតកម្មផ្នែកនីតិវិធីទាំងអស់ពី ព្រោះតុលាការថ្នាក់លើ គឺសម្រាប់ត្រួតពិនិត្យការអនុវត្ត ភាពមិនត្រឹមត្រូវ ពីតុលាការថ្នាក់ក្រោម»។
កាលពីសប្ដាហ៍មុន នៅពេលសមត្ថកិច្ចនាំខ្លួនលោកមកកាន់តុលាការ លោក អ៊ុំ សំអាន អ្នកតំណាងរាស្ដ្រគណបក្សសង្គ្រោះជាតិមណ្ឌលសៀមរាប បានស្រែកប្រាប់អ្នកសារព័ត៌មានថា ការចាប់ខ្លួនលោក គឺទង្វើរបស់គណបក្សប្រជាជនកម្ពុជា ធ្វើរដ្ឋប្រហាររដ្ឋធម្មនុញ្ញត្រង់មាត្រា ៨០ ដែលបានចែងយ៉ាងច្បាស់អំពីអភ័យឯកសិទ្ធិសមាជិកសភា។
ប៉ុន្ដែការលើកឡើងរបស់លោក អ៊ុំ សំអាន ក៏ត្រូវបានរដ្ឋាភិបាលទាត់ចោលភ្លាមៗ ថា ការលើកឡើង របស់លោក អ៊ុំ សំអាន គ្រាន់តែជាសម្ដីផ្ដេសផ្ដាស់ និងមានបញ្ហាសតិអារម្មណ៍ មិនអាចយកជាការបាន។
លោក សួស យ៉ារា ថា៖«អាហ្នឹងគាត់និយាយតែខ្លួនគាត់ ធម្មតាមនុស្សជាប់ទោស មនុស្សទណ្ឌិត គាត់មានកំហឹង គាត់ចេះតែ ជេរស្រេចចិត្តគាត់ទៅ គាត់មានការទទួលខុសត្រូវឯណា គាត់អត់មានទេ គាត់ និយាយតែផ្ដេសផ្ដាស់ទៅ»។
តាមមេធាវី លោក ហែម សុជាតិ រឿងក្ដីរបស់លោក អ៊ុំ សំអាន ត្រូវបានតុលាការសាលាដំបូងរាជធានីភ្នំពេញ បានសម្រេចបិទការស៊ើបសួរ ប៉ុន្ដែទោះជាយ៉ាងណា មេធាវីរូបនេះ នៅតែបន្ដធ្វើការតស៊ូមតិ ទៅតាមផ្លូវច្បាប់បន្ដទៅទៀតដើម្បីរកយុត្ដិធម៌ជូនលោក អ៊ុំ សំអាន។
លោក ហែម សុជាតិ ៖«រឿងឯកឧត្ដម អ៊ុំ សំអាន នោះ គឺតុលាការក្រុងបានបិទការស៊ើបសួរហើយ ចឹងបានសេចក្ដីថា រឿងនេះគេបានបញ្ជូនទៅជម្រះហើយ ចឹងខ្ញុំធ្វើការតស៊ូតមតិតាមផ្លូវច្បាប់តទៅទៀត ដើម្បី យុត្ដិធម៌របស់កូនក្ដី»។
សូមបញ្ជាក់ផងដែរថា រឿងរបស់លោក អ៊ុំ សំអាន ត្រូវបានអ្នកសង្កេតការណ៍មួយចំនួន ក៏ដូចជាសហគមនអន្តរជាតិចាត់ទុកថា ជារឿងនយោបាយ។ ពួកគេ បានហៅលោក អ៊ុំ សំអាន រួមទាំងរឿងរបស់លោក ហុង សុខហួរ សមាជិកព្រឹទ្ធសភា បក្សប្រឆាំងថាជាអ្នកទោសនយោបាយ៕
