យុទ្ធនាការ ដើម្បីសួរសុខទុក្ខពលរដ្ឋនិងចុះត្រួតពិនិត្យសមិទ្ធិផល ពាក់កណ្ដាលអាណត្តិដែលធ្វើដោយ ប្រមុខរដ្ឋាភិបាល សម្ដេច ហ៊ុន សែន បានចាប់ផ្ដើមទៀតហើយនៅថ្ងៃនេះ ដោយសម្ដេចបានចុះ ទៅជួប សិស្សានុសិស្ស នៅវិទ្យាល័យ ជាស៊ីមតាកែវ និង វិទ្យាល័យ ប៊ុន រ៉ានី ហ៊ុន សែន បាទីនៅ ក្នុងទឹកដីនៃ ខេត្តតាកែវ។
ក្នុងឱកាសនេះ សម្ដេចបានថតរូបអនុស្សាវរីយ៍ជាច្រើន ជាមួយយុវជន ប៉ុន្តែនៅពេលជាមួយគ្នានេះ សម្ដេចបាន សន្យាផ្ដល់អាគារសិក្សា ដល់វិទ្យាល័យ ទាំងនេះទៀត គឺដូចសម្ដេចបានសន្យានេះដែរ នៅពេលចុះទៅជួបសិស្សានុសិស្សនៅ វិទ្យាល័យ ក្រុងកំពង់ឆ្នាំង។
ស្ថិតក្នុងសភាពញញឹម ស្រស់ស្រាយ ខណៈសិស្ស សប្បាយរីករាយទទួលបាន ការជួយសា្ថបនា សាលារៀន ឱ្យសិស្សទៀតនោះ សម្ដេចប្រមុខរដ្ឋាភិបាល ក៏មានប្រសាសន៍ប្រាប់យុវជនសិស្សសាលានេះថា រៀនសាលារៀនរបស់សម្ដេចគួរបោះឆ្នោតឱ្យអ្នកសាងសង់ឬទេ។
នៅក្នុងជំនួបនៅក្នុងខេត្តតាកែវក្នុងវិទ្យាល័យ ជា ស៊ីម តាកែវ សម្តេច ហ៊ុន សែនក៏បានសន្យាសង់សាលាជូនប្រជាពលរដ្ឋផងដែរហើយក្រោយមកសិស្សានុសិស្សក៏ជូនពរសម្តេចផងដែរ។
ទាក់ទិនប្រសាសន៍របស់សម្ដេច ហ៊ុន សែន ថា រៀនសាលាសម្ដេចបោះឆ្នោតឱ្យនរណា នោះលោក សំ គុន្ធាមី នាយកប្រតិបត្តិនៃអង្គការឃ្លាំមើលការបោះឆ្នោតមួយហៅថា និហ្វិច មានប្រសាសន៍ថា ជាការឃោសនាមួយ ដ៍ចំលែក។
រយៈពេល២ខែកន្លងមកនេះសម្តេច ហ៊ុន សែន នាយករដ្ឋមន្ត្រី បានធ្វើដំណើរស្ទើរតែគ្រប់ខេត្តក្រុងប្រទេស។ សម្ដេចបានចេញយុទ្ធនាការចុះសួរសុខទុក្ខប្រជាពលរដ្ឋ និង ត្រួតពិនិត្យមើលសមិទ្ឋិផលជាតិពាក់កណ្តាលអាណត្តិទី៥នេះ។ មិនខុស នឹងខេត្តតាកែវ គឺនៅខេត្ត ដទៃទៀត ក៏សម្ដេចសន្យាធ្វើនេះ ធ្វើនោះឱ្យពលរដ្ឋដែរ ។
ការចុះជួបពលរដ្ឋរបស់ប្រមុខរដ្ឋាភិបាលនៅតាមជនបទ នៅពេលនេះក៍ចំពេល មេបក្សប្រឆាំង លោកសម រង្ស៊ី និរទេសខ្លួន នៅក្រៅប្រទេស ខណៈលោកកឹមសុខា អនុប្រធានរបស់លោកសមរង្ស៊ី មិនអាចចេញទៅតាមខេត្តវបានដូចមុន ព្រោះលោកកំពុងជួបបញ្ហាផ្លូវច្បាប់ ៕
