ភ្នំពេញ៖ ថ្លែងក្រោយបញ្ចប់ការប្រារព្ធទិវាអន្ដរជាតិជនជាតិដើមភាគតិចពិភពលោក លើកទី២២ ឆ្នាំ២០១៦ នៅថ្ងៃអង្គារ ទី៩សីហា លោក តឹក វណ្ណារ៉ា ប្រធានវេទិការនៃអង្គការមិនមែនរដ្ឋាភិបាល ហៅកាត់ថា NGO Forum បានឱ្យដឹងថា បច្ចុប្បន្ននេះ ជនជាតិដើមភាគតិចមានបញ្ហាប្រឈមជាច្រើនទាក់ទងនិងវិស័យអប់រំ ការងារ បរិស្ថាន និងវប្បធម៌។
បើតាមលោក តឹក វណ្ណារ៉ា ដដែលជនជាតិដើមភាគតិចនៅកម្ពុជាដែលមានប្រមាណជា២០ម៉ឺននាក់ នៅប្រទេសកម្ពុជា ពួកគាត់កំពុង តែត្រូវការអ្នកពាក់ព័ន្ធ ចូលរួមជួយដោះស្រាយបញ្ហារបស់ពួកគាត់។
ដើម្បីជ្រាបព័ត៌មានបន្ថែម សូមអញ្ជើញ ស្ដាប់កិច្ចសម្ភាសន៍រវាង កញ្ញា ជុំ ជោគជាតា អ្នកសារព័ត៌មានរបស់វិទ្យុស្ដ្រី FM102 ជាមួយលោក តឹក វណ្ណារ៉ា ប្រធានវេទិកានៃអង្គការមិនមែនរដ្ឋាភិបាលស្ដីពីកម្ពុជាហៅកាត់ថា NGO Forum ដូចតទៅ៖
បញ្ហាសំខាន់ៗទាំងនោះ រួមមាន៖
១.ទាក់ទងនិងវិស័យអប់រំ និងការងារ៖
ស្នើសុំយកចិត្តទុកដាក់ដោះស្រាយបន្ដ លើការអប់រំ ផ្នែកភាសា គឺ ភាសាដើម និងភាសាជាតិ ។
ស្នើសុំឱ្យមានគ្រូបង្រៀន បានទៅបង្រៀននៅគ្រប់មូលដ្ឋានជនជាតិដើមភាគតិចអោយបានគ្រប់គ្រាន់ និងជាប់លាប់។
សើ្នសុំឱ្យការសាងសង់សាលារៀនបន្ថែម មានបណ្ណាល័យ និងមានសៀវភៅសិក្សាគ្រប់គ្រាន់សំរាប់ជនជាតិដើមភាគតិចនៅទូទាំងប្រទេស។
សើ្នសុំឱ្យមាន ការផ្ដល់អាហារូបករណ៍រដ្ឋពេញលេញ ។
ស្នើសុំឱ្យក្រសួងការងារជួយផ្ដល់ជំនាញវិជ្ជាជីវៈផ្សេងៗ។
ស្នើសុំ មានការកសាង កន្លែងស្នាក់នៅ ដល់យុវជន និងសិស្សិជនជាតិដើមភាគតិច កម្រិតស្រុកខេត្ត និងរាជធានី។
២.ក្រសួងអភិវឌ្ឍន៍ជនបទ បន្ដការខិតខំប្រឹងប្រែងក្នុងការដឹកនាំ ឬមួយពង្រឹងដំណើរការប្រព្រឹត្តទៅ នៃកិច្ចប្រជុំគណៈកម្មាការអន្ដរក្រសួងទៀងទាត់ ដើម្បីពង្រីកបន្ថែមលើការអនុវត្តគោលនយោបាយជាតិ សម្រាប់ជនជាតិដើមភាគតិច។
៣. ស្នើឲ្យបញ្ឈប់ការរើសអើងគ្រប់ទម្រង់លើជនជាតិដើមភាគតិច នៅក្នុងវិស័យអប់រំ សុខាភិបាល សេដ្ឋកិច្ច សង្គមកិច្ច សិល្បះ វប្បធម៌ និងព័ត៌មានវិទ្យា ។ ជាពិសេស ស្នើឲ្យមានការដាក់បញ្ចូល មេរៀន ស្ដីពី វប្បធម៌ និងការរស់នៅរបស់ជនជាតិដើមភាគតិចកម្ពុជា ទៅក្នុងសៀវភៅសិក្សា នៃកម្មវិធីអប់រំជាតិ នៅក្នុងមុខវិជ្ជា ប្រវត្តិវិទ្យា ពលរដ្ឋវិទ្យា ភូមិវិទ្យា និងភាខ្មែរ ជាដើម។