ភ្នំពេញ៖ នាយករដ្ឋមន្ត្រី ហ៊ុន សែន គ្រោងប្តឹងសមាជិកព្រឹទ្ធសភាមកពីគណបក្សសម រង្ស៊ី ដែលបានបង្ខូចកេរ្តីឈ្មោះសម្តេចភា្ជប់ទៅនឹងករណីឃាតកម្មអ្នកវិភាគឯករាជ្យកាលពីដើមខែកក្កដាកន្លងមក។
បើតាមសារព័ត៌មាន Fresh News បានឲ្យដឹងថា លោកនាយករដ្ឋមន្ត្រី ហ៊ុន សែន សម្រេចប្តឹងលោកស្រី ថាក់ ឡានី ជាសមាជិកព្រឹទ្ធសភាមកគណបក្សសម រង្ស៊ី ថាបានចោទប្រកាន់សម្តេចមានជាប់ពាក់ព័ន្ធករណីឃាតកម្ម លោក បណ្ឌិត កែម ឡី អ្នកវិភាគឯករាជ្យដ៏ល្បីឈ្មោះមួយរូប ត្រូវបានឃាតករបាញ់សម្លាប់កាលពីថ្ងៃទី ១០ កក្កដា ឆ្នាំ ២០១៦កន្លងមក។
បើតាមអ្នកនាំពាក្យគណបក្សប្រជាជនកម្ពុជា លោក សុខ ឥសាន្ត មានប្រសាសន៍ជាមួយវិទ្យុស្ត្រីថា សម្តេចនាយករដ្ឋមន្ត្រីនឹងប្តឹង លោកស្រី ថាក់ ឡានី ជាសមាជិកព្រឹទ្ធសភាមកគណបក្សសម រង្ស៊ីនៅ ពេលឆាប់ៗនេះ។ អ្នកនាំពាក្យរូបនេះ បញ្ជាក់ថា ការលើកឡើងរបស់សមាជិកព្រឹទ្ធសភារូបនេះ គឺជា ការចោទប្រកាន់ដោយគ្មានមូលដ្ឋានច្បាប់ច្បាស់លាស់។
ជុំវិញបញ្ហាននេះ វិទ្យុស្ត្រី មិនទាន់អាចសុំការអត្ថាធិប្បាយបានភ្លាមៗនៅឡើយទេ ពីលោក ស្រី ថាក់ ឡានី សមាជិកព្រឹទ្ធសភា គណបក្ស សម រង្ស៊ី ។ ចំណែកមន្ត្រីជាន់ខ្ពស់គណបក្សសង្គ្រោះជាតិ លោក ប៉ុល ហំម សុំមិនធ្វើការអត្ថាធិប្បាយជុំវិញបញ្ហានេះទេ ព្រោះលោកមិនទាន់ទទួលបានព័ត៌មាននេះនៅឡើយ។