ភ្នំពេញ៖ សម្ព័នកំណែទម្រង់ការបោះឆ្នោត (ERA) និងបក្សនយោបាយ បានទទូចឲ្យគណៈកម្មាធិការជាតិរៀបចំការបោះឆ្នោត (គ.ជ.ប.) កែប្រែចំនុចមួយចំនួនគឺដើម្បីជំរុញឲ្យដំណើរការបោះឆ្នោតនៅក្នុងប្រទេសកម្ពុជាមានសុក្រឹត្យភាព។ អង្គការ និងបក្សនយោបាយនោះយល់ថាក្រមសីលធម៌ របស់(គ.ជ.ប.) មានចរឹករឹតត្បិតសេរីភាព ជាខ្លាំង។ ចំណែកឯមន្ត្រី (គ.ជ.ប.) ថានឹងមានការពិចារណានូវចំនុចដែលបានស្នើរនេះ។ រាយការណ៍ដោយកញ្ញា ច្រឹក ស្រីអូន៖
នៅក្នុងពិធីនៃកិច្ចពិភាក្សាតុមូលស្ដីពីការផ្តល់អនុសាសន៍ ទៅលើសេចក្តីព្រាងក្រមសីលធម៍របស់គណៈកម្មាធិការជាតិរៀបចំការបោះឆ្នោត (គ.ជ.ប.)នៅថ្ងៃទី២៧ កក្កដាឆ្នាំ២០១៦ ក្រុមអង្គការសង្គមស៊ីវិល ធ្វើការងារកិច្ចការបោះឆ្នោត និងបក្សនយោបាយបានលើកឡើងប្រហាក់ប្រហែលគ្នាពីការព្រួយបារម្ភ ក្រមសីលធម៌(គ.ជ.ប.) ដែលមានចរឹករឹតត្បិត
ក្នុងចំណោមនោះ គឺលោក ព្រាប កុល ជាសមាជិកម្នាក់នៃសម្ព័នកំណែទម្រង់ការបោះឆ្នោត (ERA) បានបង្ហាញ ថាការហាមថតរូបនៅកន្លែងគូសសន្លឹកឆ្នោតពេលដែលកំពុងបោះឆ្នោត ជាការសមស្របគឺលោកគាំទ្រ។
ប៉ុន្តែលោកទទូចថា ករណីអ្នកសង្កេតការណ៍គួរត្រូវបានអនុញ្ញាតិឲ្យថតរូបនៅក្នុងដំណាក់កាលផ្សេងៗទៀតជាពិសេសនៅពេលរាប់សន្លឹកឆ្នោត។
ដូចគ្នានេះលោកស្រី ម៉េង សុភាវី ប្រធាននាយកដ្ឋានកិច្ចការបោះឆ្នោតនីតិកម្មនៃគណបក្សសង្គ្រោះជាតិបានគាំទ្រចំពោះគំនិត លោក ព្រាប កុល។ តែអ្នកស្រី ក៏ចង់ឱ្យមានការបន្ថែមចំនុចមួយចំនួននៅក្នុងក្រមសីលធម៍បក្សនយោបាយ បេក្ខជន និងភា្នក់ងារបក្សនយោបាយត្រង់មាត្រា៩ កថាខណ្ឌ២ដែលបានចែងពីការហាមមិនឲ្យ មានការលើកស្លាកនយោបាយ បិទស្លាកនយោបាយលើសម្ភារៈរបស់រដ្ឋជាដើមគឺគួរតែកែប្រែ។
ចំនែក លោក គល់ បញ្ញា នាយកប្រតិបត្តិនៃគណៈកម្មាធិការ ដើម្បីការបោះឆ្នោតដោយសេរី និងយុត្តិធម៌នៅកម្ពុជាហៅថា(ខុមហ្វ្រែល)បានលើកឡើងថា ក្រមសីលធម៍មួយចំនួនមានការល្អប្រសើរ។ តែមានផ្នែកមួយចំនួនគួរតែមានការប្រែ និងបន្ថែមគឺដូចជា ករណីថារំលោភក្រមសិលធម៍មានទោស។ លោកបន្តថា កត្តានេះមិនគួរមានទោសទេ។
ជាមួយគ្នានេះ លោកក៏ចង់ឱ្យមានការរក្សាក្រមសីលធម៍ចាស់ដែល ហាមមិនឲ្យប្រើសម្ភារៈរដ្ឋក្នុងការឃោសនាបោះឆ្នោតឲ្យបក្សណាមួយផងដែរ។
ចំណែកលោក កែវ ផល្លា តំណាងឲ្យមន្ត្រី (គ.ជ.ប.) ដែលបានចូលរួមក្នុងកម្មវិធីនេះ មានប្រសាសន៍ថាសេចក្តីព្រាងក្រមសីលធម៍របស់ គណៈកម្មាធិការជាតិរៀបចំការបោះឆ្នោត (គ.ជ.ប.) មិនមែនព្រាងហើយឲ្យអនុវត្តន៍ភា្លមនោះទេគឺត្រូវការឆ្លងយោបល់ពីអ្នកពាក់ព័ន្ធដែលជាអ្នកអនុវត្តន៍។
លោកថាចំពោះអនុសាសន៍របស់ ERA (គ.ជ.ប.) នឹងពិភាក្សាគ្នាបន្តទៀត។
អនុសាសន៍របស់ ERA ចំពោះសេចក្តីព្រាងក្រមសីលធម៍របស់ គណៈកម្មាធិការជាតិរៀបចំការបោះឆ្នោត (គ.ជ.ប) មានចំនួន៥ចំនុចនេះ ភាគច្រើនមានការរឹតបន្តឹង សេរីភាពអ្នកសង្កេតការណ៍ និងករណីចែងមិនច្បាស់អំពីការយករថយន្តរបស់រដ្ឋ ទៅឃោសនា នៅថ្ងៃឈប់សម្រាកពីការងារ។
ប្រទេសកម្ពុជា នឹងមានការបោះឆ្នោតសំខាន់ចំនួន ២គឺការបោះឆ្នោតក្រុម ប្រឹក្សាឃុំសង្កាត់ ខែមិថុនា ឆ្នាំ២០១៧ និងការបោះឆ្នោត សភា ឆ្នាំ២០១៨ ដែលអ្នកសង្កេតការណ៍យល់ឃើញមាន សារសំខាន់ព្រោះការបោះឆ្នោតលើកនេះ ក្រោមការកែទម្រង់ប្រព័ន្ធបោះឆ្នោត ដោយមានសហភាពអឺរ៉ុប និងប្រទេសជប៉ុន ជួយសហការការងារ បច្ចេកទេស៕
