អាល្លឺម៉ង់៖ ខ្មាន់កាំភ្លើងម្នាក់បានបើកការបាញ់ប្រហារមួយ នៅចំកណ្តាលផ្សារទំនើបមួយកន្លែងនៅឯទីក្រុង Munich ប្រទេសអាល្លឺម៉ង់។ ការបាញ់ប្រហារនេះ បានបណ្តាលឱ្យមនុស្ស ៩ នាក់ស្លាប់ ហើយបន្ទាប់មកខ្មាន់កាំ ភ្លើងរូបនោះ ក៏បានធ្វើអត្តឃាតខ្លួនឯងតែម្តង។ នេះបើយោងតាមសេចក្តីរាយការណ៍ពីមន្ត្រីប៉ូលិសអាល្លឺម៉ង់បាន។
មន្ត្រីប៉ូលីសអាល្លឺម៉ង់បានប្រាប់នៅក្នុងសន្និសីទកាសែតមួយថា ជនសង្ស័យមានអាយុ ១៨ ឆ្នាំរូបនេះ ជាជនជាតិអាឡឺម៉ង់កាត់អ៊ីរ៉ង់ រស់នៅក្នុងទីក្រុង Munich។ តែយ៉ាងមន្ត្រីប៉ូលីសបញ្ជាក់ថា សមត្ថកិច្ចនៅមិនទាន់កំណត់ពីមូលហេតុ ដែលនាំឱ្យយុវជនរូបនោះធ្វើសកម្មភាពនេះបាននៅឡើយនោះទេ។
ប៉ូលីសបានបន្ថែមថា យ៉ាងតិចណាស់ក៏មានមនុស្សជាង ២០ ផ្សេងទៀតដែលបានរងរបួសក្នុងការបាញ់ប្រហារនេះ។
មានសេចក្តីរាយការណ៍មកថា ការបាញ់ប្រហារនេះអាចមានការចូលរួមពីក្រុមខ្មាន់កាំភ្លើងរហូតដល់ទៅបីនាក់ផ្សេងទៀតផងដែរ។ត
សាកសពជនសង្ស័យត្រូវបានគេរកឃើញនៅចំងាយប្រហែល ១ គីឡូម៉ែត្រ ពីមជ្ឈមណ្ឌលផ្សារទំនើប Olympia ស្ថិតនៅភាគខាងលិចជាយក្រុង Moosach ៕ ប្រភព៖BBC
