ភ្នំពេញ៖ កម្មការរីនីរោងចក្រប្រមាណជា ១០០នាក់ បានស្រែកទាមទារឱ្យតុលាការសាលាដំបូងរាជធានីភ្នំពេញចេញដីកា ការពារទ្រព្យសម្បត្តិរោងចក្រមួយដែលមានឈ្មោះថា ជុងហ្វៃ នីតវៀរអេហ្វធីវ៉ាយអិលធីឌី (CHUNG FAI KNITWEA FTY, LTD)។ ការទាមទារនេះបន្ទាប់ពីថៅកែរោងចក្ររបស់ពួកគេរត់ចោលកម្មករនិយោជិត ទាំងមិនបានបើកប្រាក់ខែជូនពួកគាត់។ ការស្រែកទាមទារនេះ ធ្វើទ្បើងនៅថ្ងៃសុក្រទី ២២ខែកក្កដា ឆ្នាំ២០១៦ នេះនៅខាងមុខសាលាដំបូងរាជធានីភ្នំពេញ។លោក ជួន សារ៉េត រាយការណ៍៖
សម្រែកទាមទារមួយបានឮចេញពីខាងមុខសាលាដំបូងរាជធានីភ្នំពេញ គឺជាសម្រែករបស់ក្រុមកម្មការរីនីរោងចក្រ ជុង ហ្វៃ នីតវៀរអេហ្វធីវ៉ាយអិលធីឌី ទាមទារឱ្យតុលាការសាលាដំបូងរាជធានីភ្នំពេញឆាប់ចេញដីកា ការការពារទ្រព្យសម្បត្តិរោងចក្រដែលថៅកែរបស់ពួកគេបានរត់ចោលដោយមិនបានទូទាត់ប្រាក់ខែជូនពួកគេ។
តំណាងកម្មការរីនីមួយរូបក្នុងចំណោមកម្មការរីនីប្រមាណ ១០០នាក់ ដែលទ្បើងមកសាលាដំបូងរាជធានីភ្នំពេញ គឺកញ្ញា អ៊ុក សម្បត្តិ បានផ្តល់បទសម្ភាសន៍ជាមួយវិទ្យុស្ត្រីនៅថ្ងៃនេះថា គោលបំណងសំខាន់ដែលក្រុមកម្មការរីនី ទ្បើងមកតុលាការនេះ ដើម្បីស្នើឱ្យសាលាដំបូងរាជធានីភ្នំពេញពន្លឿន ការចេញដីកា ការការពាររោងចក្រ ជុង ហ្វៃ។កញ្ញាអះអាងថា ថៅកែរោងចក្រមួយនេះ បានរត់ចោលកម្មការរីនីរោងចក្រដោយមិនបានប្រាប់ពីមូលហេតុនោះទេ។
កញ្ញាបន្ថែមថា ការទាមទារឱ្យតុលាការភ្នំពេញចេញដីកា ការការពាររោងចក្រនោះព្រោះកម្មការរីនីមានការព្រួយបារម្ភខ្លាចថៅកែរោងចក្រលួចដឹកសម្ភារៈ ក្នុងរោងចក្រចេញអស់ទាំងមិនទាន់មានសំណងជូនក្រុមកម្មករនៅទ្បើយ។
កញ្ញា អ៊ុក សម្បត្តិ ៖«ឥលូវពួកខ្ញុំហ្នឹងមកកន្លែងតុលាការដើម្បីតឱ្យតុលាការចេញដីកា ការការពារព្រោះពួកខ្ញុំនៅក្នុងរោងចក្រទាំងយប់ទាំងថ្ងៃរហូត អត់មានបានទៅរកអីផ្សេងៗ ណាមួយថ្លៃផ្ទះជួលក៏អត់ទាន់ឱ្យគេទាំងអស់ ពិបាកខ្លាំងពេកទើបពួកខ្ញុំមកកន្លែងតុលាការឱ្យតុលាការចេញដីកាជួយហ្នឹង បើសិនតុលាការមិនចេញដីកាទៀតខ្ញុំនឹងមករហូត… »។
ចំណែកកម្មការរីនីមួយរូបទៀត គឺអ្នកស្រី ប៊ិន លាងហួត បាននិយាយថាអ្វីដែលសំខាន់ដែលក្រុមកម្មការរីនីមកសាលាដំបូងនៅថ្ងៃនេះគឺ ដើម្បីឱ្យតុលាការឆាប់ចេញដីកា ការការពាររោងចក្រទៅឱ្យពួកគេដោយអ្នកស្រីថា រាល់ថ្ងៃអ្នកដែលយាមនៅក្នុងរោងចក្រសុទ្ធតែជាស្ត្រី។
បើតាមអ្នកស្រី រោងចក្រនេះមានកម្មករ២០៨នាក់ ហើយមានបុរស តែ១០នាក់ប៉ុណ្ណោះ ដែលអ្នកស្រីមានការព្រួយបារម្ភពីសុវត្ថិភាពនៅពេលយាមពេលយប់ គឺខ្លាចក្រុមឆក់ឧកាសណាមួយមកលុកលុយនៅក្នុងរោងចក្រនោះ។ អ្នកស្រី លាងហួតថាក្រុមកម្មការរីនីរោងចក្រ ជុងហ្វៃ សុទ្ធតែមិនដឹងថាមានហេតុអ្វីបានជាថៅកែរោងចក្រនេះសម្រេចចិត្តរត់ចោលកម្មករនោះទេ ដូច្នេះកម្មការរីនីរោងចក្រនេះក៏ស្នើឱ្យថៅកែរោងចក្រនេះចេញមកទទួលខុសត្រូវផងដែរ។
អ្នកស្រី លាង ហួត ៖«ពួកខ្ញុំរាល់ថ្ងៃហ្នឹងដេកយាមនៅរោងចក្រ វាមានផលលំបាកវាអត់ទឹក អត់ភ្លើង អ្វីដែលខ្ញុំចង់បានហ្នឹងគឺចង់ឱ្យខាងតុលាការហ្នឹង គាត់ជួយចេញដីកាពារហ្នឹងឱ្យលឿនបំផុត…»។
ជុំវិញបញ្ហានេះដែរវិទ្យុស្ត្រីមិនទាន់អាចសុំការឆ្លើយតប ពីខាងតំណាងរោងចក្របាននៅទ្បើយនោះទេ។
ទាក់ទងនឹងបញ្ហានេះដែរ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករបានផ្តល់សម្ភាសន៍ជាមួយអ្នកសារព័ត៌មានថា ក្នុងនាមលោកជាសហជីពមួយតែងតែសង្កេតឃើញថាករណីថៅកែរោងចក្ររត់ចោលកម្មករនេះ មានច្រើនមកហើយ ហើយលោកសង្កេតឃើញថាស្ថាប័នពាក់ព័ន្ធហាក់បីដូចជាមិនសូវយកចិត្តទុកដាក់ក្នុងការដោះស្រាយនោះទេ។
លោក ប៉ាវ ស៊ីណា ស្នើឱ្យរដ្ឋាភិបាល និងអ្នកវិនិយោគត្រូវបង្ហាញតួរលេខឱ្យបានច្បាស់ពីចំនួនថវិកាដែលតម្កល់នៅក្នុងធនាគារជាតិកម្ពុជា ដើម្បីឱ្យកម្មករបានដឹង ក្រែងពេលណាមួយថៅកែរត់ចោលកម្មករអាចទាមទារសំណងនៃប្រាក់ដែលបានតម្កល់នោះ។
លោក ប៉ាវ ស៊ីណា៖«សូមឱ្យអ្នកវិនិយោគទាំងអស់ដែលមករកស៊ីនៅស្រុកខ្មែរហ្នឹង គាត់បង្ហាញអំពីការតម្កល់លុយរបស់គាត់នៅក្នុងធនាគារជាតិ ហើយរដ្ឋត្រូវបង្ហាញថា នៅពេលដែលនិយោជកបិទទ្វាររោងចក្រ ត្រូវតែបង្ហាញពីតួរលេខនៃលុយតម្កល់នោះឱ្យកម្មករបានដឹង… »។
ជុំវិញសំណុំរឿងនេះដែរ មេធាវីតំណាងឱ្យក្រុមកម្មការរីនីរោងចក្រ ជុងហ្វៃ នីតវៀរអេហ្វ ធីវ៉ាយអិលធីឌី គឺលោក ហុង សម្បត្តិ បានផ្តល់បទសម្ភាសន៍ជាមួយវិទ្យុស្ត្រីតាមរយៈខ្សែទូរស័ព្ទថា ចៅក្រមដែលកាន់សំណុំរឿងនេះ គឺលោកស្រី ស៊ លីណា កំពុងចាត់ការពីរឿងនេះ។ លោក ហុង សម្បត្តិ បន្ថែមថាក្រុមកម្មការរីនីដែលសុំដីកា ការការពារនេះគឺដើម្បីការពារកុំឱ្យមានការដឹកទំនិញចេញ ព្រោះដើម្បីទុកទំនិញទាំងនោះដើម្បីទូទាត់សំណងឱ្យពួកគេ។
លោក ហុង សម្បត្តិ ៖«ការសុំរក្សាការពារគឺជាក់ស្តែងបានន័យថាគោលដៅ ដើម្បីសំរក្សាសំបករាង្គកាយម៉ាស៊ីនកាត់ដេរ នឹងទ្រព្យសម្បត្តិដូចជាម៉ាស៊ីនផ្សេងនៅក្នុងរោងចក្រហ្នឹងកុំឱ្យមានការដឹកជញ្ជូនចេញ ព្រោះអីជាក់ស្តែងទំនិញឥវ៉ាន់ដែលផលិតបានគាត់ដឹកចេញអស់ហើយ ដើម្បីទុករបស់ទាំងអស់ហ្នឹងទុកទូទាត់បំណុល ទូរទាត់ប្រាក់ឈ្នួលរបស់កម្មករដែលថៅកែមិនទូទាត់ឱ្យ…»។
យោងតាមលិខិតរបស់ក្រុមកម្មការរីនី ដែលបានដាក់ជូនសាលាដំបូងរាជធានីភ្នំពេញ ចុះថ្ងៃទី ១៨ខែកក្កដា ឆ្នាំ២០១៦ បានដាក់ពាក្យសុំឱ្យតុលាការសាលាដំបូងរាជធានីភ្នំពេញចេញដីកាការការពារ ហាមឃាត់ជាបណ្តោះអាសន្ន ការលក់ ការផ្ទេរ ការដឹកជញ្ជូន ការជួល ការបញ្ចាំ ឬការធ្វើអំណោយ នូវសំភារៈជាចលនវត្ថុ អចលនទ្រព្យទាំងអស់របស់ក្រុមហ៊ុន ជុងហ្វៃ នីតវៀរអេហ្វធីវ៉ាយអិលធីឌី ដើម្បីទុកទូទាត់សំណងប្រាក់បំណាច់ផ្សេងៗដល់កម្មករនិយោជិតតាមច្បាប់៕
