ភ្នំពេញ ៖ នាយកខុទ្ទកាល័យ ព្រះបរមរាជវាំង របស់ព្រះមហាក្សត មានប្រសាសន៍ថា លិខិតគណបក្សសង្គ្រោះជាតិ CNRPដាក់ទៅការិយាល័យសម្ដេច គង់ សំអុល រដ្ឋមន្ត្រីព្រះបរមរាជវាំង ដែលចំពោះលោក មិនបានឃើញ លិខិតនេះទេ ។
លោក អ៊ុំ ដារាវុធ បានបញ្ជាក់ដូចនេះ ជាមួយ វិទ្យុស្ត្រី FM102 ដែលបានសាកសួរលោក អំពី លិខិតចំនួន២ របស់គណបក្សសង្គ្រោះជាតិ ថ្វាយព្រះមហាក្សត្រ សុំឱ្យព្រះអង្គ អន្តរាគមន៍ ជួយបន្ថយកំដៅនយោបាយ ។ លោក អ៊ុំ ដារាវុធ បានបន្តថាតាមទំលាបលិខិតដូចនេះ ត្រូវដាក់ទៅកាន់ ការិយាល័យ ក្រសួងព្រះបរមរាជវាំង របស់សម្ដេច គង់ សំអុល គឺមិនបានឆ្លងកាត់ការិយាល័យ លោកទេ ។
វិទ្យុស្ត្រី មិនអាចសុំ ការទាក់ទងទៅសម្ដេច គង់ សំអុល ដើម្បីបំភ្លឺបញ្ហានេះបានទេ ដោយ សារគ្មានប្រភពទាក់ទង ។
តំណាងរាស្ត្រគណបក្សសង្គ្រោះជាតិចំនួន ៥៣ រូបបាន ថ្វាយលិខិតជាបន្តបន្ទាប់ចំនួន២ ទៅ ព្រះមហាក្សត្រ ដើម្បីសុំព្រះអង្គ អន្តរាគមន៍ ជួយបញ្ចប់ កំដៅនយោបាយ ដោយគណបក្សប្រឆាំងនេះ ថាឡើងកំដៅយ៉ាងខ្លាំង ធ្វើឱ្យប៉ះពាល់ ការគោរពសិទ្ធិមនុស្ស និងដំណើរការលទ្ធិប្រជាធិបតេយ្យ ធ្លាក់ចុះ ។
លិខិតរបស់ តំណាងរាស្ត្រគណបក្សសង្គ្រោះជាតិធ្វើឡើង បន្ទាប់ពីតំណាងម្នាក់របស់ខ្លួន ត្រូវបានចាប់ខ្លួន និងមន្ត្រី សិទ្ធិមនុស្ស៤នាក់ មន្ត្រី គជប ម្នាក់ ត្រូវបានចាប់ខ្លួន ករណីស្រីមុំ ដែល មជ្ឈដ្ឋានខ្លះថាជារឿងនយោបាយ ។
ទោះជាយ៉ាងណា តំណាងរាស្ត្រគណបក្សសង្គ្រោះជាតិ ទាំង៥៥រូប បានដាក់លិខិតសុំ អន្តរាគមន៍ ទៅអគ្គលេខាធិការ អង្គការសហប្រជាជាតិ រួចហើយដើម្បីឱ្យបើកកិច្ចប្រជុំ ជាបន្ទាន់ សន្និសីទ សន្តិភាពក្រុងប៉ារីស ឡើងវិញ ។ ក្នុងលិខិតនេះ គណបក្សសង្គ្រោះជាតិ បាន ទទូចថាគណបក្សកាន់អំណាចកំពុង រកយុទ្ធវិធីរំលាយ គណបក្សសង្គ្រោះជាតិមុន ការបោះឆ្នោត ឆ្នាំ២០១៧ និង ២០១៨ ។ ប៉ុន្តែ បក្សកាន់អំណាច បដិសេធការ ចោទប្រកាន់នេះ ៕
