ក្រោយពីទទួលបានលិខិតយល់ព្រមពីក្រសួងមហាផ្ទៃ គណបក្សខ្មែររួបរួមជាតិ បានធ្វើសមាជសកលលើកដំបូងនៅទីស្នាក់ការបក្ស សង្កាត់ជ្រោយចង្វារ រាជធានីភ្នំពេញនាព្រឹកថ្ងៃសុក្រនេះ ។ នៅក្នុងសមាជបក្សនេះ បានជ្រើសរើសមេដឹកនាំគណបក្សមាន លោក ញឹក ប៊ុនឆៃ ជាប្រធាន លោក ទា ចំរ៉ាត់ ជាប្រធានកិត្តិយស និងលោក ខាន់ សាវឿន ជាអនុប្រធាន។
លោក ធូ វិរៈ រាយការណ៍ព័ត៌មាននេះ ៖
សមាជជាលើកដំបូងរបស់គណបក្សខ្មែររួបរួមជាតិ បានសម្រេចអនុម័ត បោះឆ្នោតឱ្យលោក ញឹក ប៊ុនឆៃ ជាប់ជាប្រធានគណបក្សរួបរួមជាតិ ចំណែកលោក ទា ចំរ៉ាត់ ជាប់ជាប្រធានកិត្តិយស និងលោក ខាន់ សាវឿន បានទទួលតំណែងជាអនុប្រធាន រួមទាំងគណបក្សប្រកាសទទួលស្គាល់សមាជិកប្រមាណ ១៦០០ នាក់ នៅទូទាំងរាជធានី-ខេត្តផងដែរ។
ថ្លែងនៅក្នុងពិធីសមាជគណបក្សនេះ លោក ញឹក ប៊ុន ឆៃ ប្រធានគណបក្សខ្មែររួបរួមជាតិ បានប្រកាស នឹងទាមទារទីស្នាក់ការនៅទូទាំងប្រទេសមកវិញពីសម្តេចក្រុមព្រះ ប្រធាន គណបក្សហ្វ៊ុនស៊ិនប៉ិច និងបានប្រកាសទៀតថា ការធ្វើសមាជបក្សរបស់សម្តេចក្រុមព្រះ នរោត្តម រណឫទ្ធិ កាលពីថ្ងៃទី ១៩ ខែមករា ឆ្នាំ ២០១៥ ខុសទៅនឹងលក្ខន្តិកៈគណបក្សហ្វ៊ុនស៊ិនប៉ិច ព្រោះសម្អាងថា ក្រសួងមហាផ្ទៃបានឆ្លើយតបថា យល់ព្រមការ ស្នើសុំរបស់លោកពីសមាជរបស់គណបក្សសម្តេចក្រុមព្រះ នរោត្តម រណឫទ្ធិនាពេល កន្លងមក។
លោក ញឹក ប៊ុនឆៃមានប្រសាសន៍ថា៖ «ខ្ញុំទើបបានទទួលបានលិខិតពីក្រសួងមហាផ្ទៃដែលយើងទាំងអស់គ្នាបានស្នើសុំធ្វើសមោឃភាពសមាជបក្សរបស់សម្តេចក្រុមព្រះ កាលពីថ្ងៃទី១៩ ខែមករា ឆ្នាំ២០១៥ កន្លងទៅ ថាខុសទៅនឹងលក្ខន្តិកៈរបស់គណបក្សហ្វ៊ុនស៊ិនប៉ិច »។
ឆ្លើយតបនឹងការលើកឡើងខាងលើនេះ អ្នកនាំពាក្យគណបក្សហ្វ៊ុនស៊ិនប៉ិច លោក ញ៉េប ប៊ុនជិន បានបដិសេធទាំងស្រុងទៅនឹងការលើកឡើង របស់លោក ញឹក ប៊ុនឆៃថា ក្រសួងមហាផ្ទៃទទួលស្គាល់ធ្វើមោឃភាពសមាជគណបក្សហ្វ៊ុនស៊ិនប៉ិចកាលពីឆ្នាំ២០១៥ កន្លងទៅ។
ចំណែកបញ្ហាទីស្នាក់ការចំនួន ២១ រាជធានី-ខេត្តវិញ អ្នកនាំពាក្យរូបនេះបញ្ជាក់យ៉ាងដូច្នេះថា៖ «ទីស្នាក់ការចំនួន ២១រាជធានី ខេត្ត គឺ គឺជាកម្មសិទ្ធរបស់គណបក្សហ្វ៊ុនស៊ិនប៉ិច ពោលគឺគ្មាននរណាម្នាក់ប្រគល់ទៅឱ្យលោក ញឹក ប៊ុនឆៃ ប្រធានគណបក្សខ្មែររួបរួមជាតិ ដែលទើបតែបង្កើតថ្មីនេះឡើយ»។
លោក ញ៉េប ប៊ុនជិន និយាយថា៖ «ឥឡូវហ្នឹងគាត់ប្រាប់ថា កុំភ័យសមាជហ្នឹងគេលុបចោលហើយ ទីស្នាក់ការ ២១ ខេត្តផ្សេងៗ គេប្រគល់មកឲ្យគណបក្សគាត់ហើយ គេអត់ធ្វើអញ្ចឹងកើតទេ ប្រទេសមានច្បាប់ នីតិរដ្ឋ អញ្ចឹងអ្វីដែលឯកត្តម ញឹក ប៊ុនឆៃ មានប្រសាសន៍ថា គាត់កំពុងប្រឈមនឹងបញ្ហាផ្លូវច្បាប់ជាមួយក្រសួងមហាផ្ទៃហើយ បញ្ហានិងខ្ញុំទុកឱ្យផ្លូវច្បាប់ក្រសួងមហាផ្ទៃគេមិនអាចទុកឱ្យមនុស្សទៅនិយាយផ្តេះផ្តាស់ទេ»។
ជុំវិញបញ្ហានេះ លោក សូ ចន្ថា សាស្ត្រាចារ្យវិទ្យាសាស្ត្រនយោបាយ បានលើកឡើងថា ជុំវិញការបែកបាក់គ្នារវាង លោក ញឹក ប៊ុនឆៃ និងសម្តេចក្រមព្រះនេះ គ្មានផលចំណេញអ្វីដល់អ្នកគាំទ្ររបស់គណបក្សបក្សហ្វ៊ុនស៊ិនប៉ិច និងគណបក្សខ្មែររួបរួមជាតិរបស់លោក ញឹក ប៊ុនឆៃ ឡើយ ដោយសារតែបក្សទាំងពីរនេះ គ្មានគោលនយោបាយអ្វីថ្មីខុសពីគណបក្សដទៃ។
សូមបញ្ជាក់ថា លោក ញឹក ប៊ុនឆៃ បានសម្រេចចាកចេញគណបក្សហ្វ៊ុនស៊ិនប៉ិច ដែលដឹកនាំដោយសម្ដេចក្រុមព្រះ នរោត្តម រណឫទ្ធិ កាលពីដើមខែកុម្ភៈ។ ការដើរចេញនេះ ក្រោមហេតុផលថា លោកមិនពេញចិត្តនឹងការដឹកនាំរបស់សម្ដេចក្រុមព្រះ នរោត្តម រណឫទ្ធិ ដែលបានគាបសង្កត់មកលើខ្លួន និងមន្ត្រីបក្សមួយចំនួនទៀត។
ទាក់ទងនឹងបញ្ហានេះ អ្នកវិភាគមួយចំនួនបានសន្និដ្ឋានថា ការឈ្លោះគ្នានៅពេលនេះ គឺជាការរុញច្រានឱ្យអនាគតនៃគណបក្សហ្វ៊ុនស៊ិនប៉ិច រំកិលទៅរកមាត់ជ្រោះមរណៈកាន់តែកៀកឡើងៗ មានន័យថា គណបក្សនេះ មិនត្រឹមតែបាត់បង់អស់អាសនៈប៉ុណ្ណោះទេ តែរូបភាព និងក្តីស្រឡាញ់ចំពោះគណបក្សរាជានិយម កាន់តែរសាត់ឆ្ងាយបន្តិចម្តងៗពីបេះដូងនៃពលរដ្ឋខ្មែរ៕