សកម្មភាពម្ចាស់ទីតាំងចុះមករុះរើរូបថតដែលកំពុងដាក់តាំងបង្ហាញនៅក្នុងភោជនីយដ្ឋានសួនចំបុីស ក្រោយអាជ្ញាធរគំរាម © អង្គការសមាគមធាងត្នោត
ក្រុមអង្គការសង្គមស៊ីវិលជាង៦០ស្ថាប័ន បានរិះគន់អាជ្ញាធរសង្កាត់និរោធ និងខណ្ឌច្បារអំពៅ ដែលបានបញ្ឈប់និងរុះរើពិព័រណ៍រូបថតរបស់អង្គការសមាគមធាងត្នោតអំពីបញ្ហាប្រឈមរបស់ជនក្រីក្រនៅរាជធានីភ្នំពេញ កាលពី២សប្តាហ៍មុន។ ការនៅតែបន្តរិះគន់នេះ ខណៈដែលអាជ្ញាធរខណ្ឌច្បារអំពៅនៅមិនទាន់បញ្ជាក់ពីមូលហេតុនៃការរុះរើនេះនៅឡើយ។ លោក គីម ចាន់ចាវ រាយការណ៍
សមាគមការពារសិទ្ធិមនុស្ស និងអភិវឌ្ឍន៏នៅកម្ពុជា (អាដហុក) មជ្ឈមណ្ឌលសិទ្ធិមនុស្សកម្ពុជា (CCHR) អង្គការតម្លាភាព (TI) និងអង្គការសង្គមស៊ីវិល សហគមន៍ ផ្សេងទៀត សរុបចំនួន៦២ស្ថាប័ន នៅថ្ងៃទី១២ ខែមីនា លើកឡើងតាមរយៈសេចក្ដីថ្លែងការណ៍រួមបង្ហាញការសោកស្ដាយ និងខកចិត្តចំពោះអាជ្ញាធរខណ្ឌច្បារអំពៅ ដែលបានបញ្ជារុះរើពិព័រណ៍រូបថតក្រោមប្រធានបទ «ផ្ទះ និងជីវិត» របស់សមាគមធាងត្នោត កាលពីថ្ងៃទី២៥ ខែកុម្ភៈ ឆ្នាំ២០២៤ ដោយគ្មានមូលហេតុ និងមិនបានជូនដំណឹងជាមុន។
ពួកគេអះអាងថា ការតាំងពិព័រណ៍រូបថតនេះ ធ្វើឡើងក្នុងគោលបំណងនាំយកទុក្ខកង្វល់ និងបញ្ហារបស់សហគមន៍ក្រីក្រនៅរាជធានីភ្នំពេញ ឱ្យភាគីពាក់ព័ន្ធបានដឹង និងចូលរួមគ្នាក្នុងការផ្ដល់នូវដំណោះស្រាយ។ អង្គការសង្គមស៊ីវិលយល់ថា ការបញ្ឈប់ និងរុះរើពិព័រណ៍រូបថតរបស់សមាគមធាងត្នោតដោយមិនបានជូនដំណឹង និងប្រាប់ពីមូលហេតុជាក់លាក់នេះ គឺជាការរំលោភយ៉ាងច្បាស់ មកលើសិទ្ធិសេរីភាពក្នុងការបញ្ចេញមតិ និងជាសកម្មភាព ដែលមិនផ្ដល់តម្លៃចំពោះសិល្បៈ។ ពិព័រណ៍រូបថតនេះ គឺជាសិល្បៈដ៏សំខាន់មួយ ដែលបង្ហាញអំពីរឿងរ៉ាវរបស់សហគមន៍ក្រីក្រនៅរាជធានី និងភាពងាយរងគ្រោះរបស់ពួកគេ ។
សកម្មភាពម្ចាស់ទីតាំងចុះមករុះរើរូបថតដែលកំពុងដាក់តាំងបង្ហាញនៅក្នុងភោជនីយដ្ឋានសួនចំបុីស ក្រោយអាជ្ញាធរគំរាម © អង្គការសមាគមធាងត្នោត
កាលពីថ្ងៃទី២៣ ខែកុម្ភៈ អង្គការសមាគមធាងត្នោតបានតាំងពិព័រណ៍រូបថតក្រោមប្រធានបទ«ផ្ទះនិងជីវិត» ដែលមានគោលបំណងចង់បង្ហាញពីទុក្ខកង្វល់និងបញ្ហារបស់សហគមន៍ក្រីក្រនៅរាជធានីភ្នំពេញ ដើម្បីឱ្យភាគីពាក់ព័ន្ធបានដឹងនិងចូលរួមផ្តល់ដំណោះស្រាយ ប៉ុន្តែទើបដាក់តាំងបង្ហាញបាន៣ថ្ងៃ បែរជាត្រូវបានអាជ្ញាធរបញ្ជាឱ្យម្ចាស់ភោជនីយដ្ឋានបញ្ឈប់ និងរុះរើទៅវិញដោយមិនបានបញ្ជាក់មូលហេតុឡើយ។
ប៉ុន្តែរយៈពេលជាង២សប្តាហ៍ក្រោយការរុះរើ និងបញ្ឈប់នេះ លោក ចេង មុនីរ៉ា អភិបាលខណ្ឌច្បារអំពៅនៅមិនទាន់ពន្យល់ពីមូលហេតុណាមួយជាសាធារណៈនៅឡើយ។ ចំណែក លោក ទូច សុខៈ អ្នកនាំពាក្យក្រសួងមហាផ្ទៃ បានប្រាប់វិទ្យុស្ត្រីថា ក្រសួងមហាផ្ទៃមិនដែលមានគោលការណ៍ណាមួយដាក់កំណត់ឱ្យអាជ្ញាធររារាំង ឬផ្អាកសកម្មភាព ដែលស្របទៅតាមនីតិវិធីរដ្ឋបាល ឬច្បាប់របស់សង្គមនោះទេ។ លើបញ្ហាដែលសង្គមស៊ីវិលអះអាងខាងលើ លោក សុខៈ យល់ថា សមគមធាងត្នោតគួរតែជួបជាមួយអាជ្ញាធរដែនដី ថាតើខាងអាជ្ញាធរដែនដីពិតជាបានផ្អាកសកម្មភាពពិព័រនោះមែនឬទេ? ត្បិតលោកជឿជាក់ថា បើបានជួបពិភាក្សាគ្នាមែន នោះភាគី នឹងអាចស្វែងយល់គ្នាថា មានមូលហេតុអ្វី និងត្រូវធ្វើដូចម្ដេច ដើម្បីធ្វើកិច្ចការងារបែបនេះលើកក្រោយមានការឯកភាពគ្នា។
«ពេលខ្លះវាកើតចេញពីការដែលមិនសហការគ្នា យើងធ្វើអ្វីគឺទៅតាមការដែលយើងចង់ធ្វើ ហើយខាងអាជ្ញាធរ លោកអត់បានទទួលនូវព័ត៌មាន។ ជាទូទៅហើយច្បាប់កំណត់អាជ្ញាធរ ឬសមត្ថកិច្ចមានតួនាទី គ្រប់គ្រងសន្តិសុខ សុវត្ថិភាព និងសណ្ដាប់ធ្នាប់សាធារណៈ ដែលតម្រូវឱ្យអាជ្ញាធរ ឬសមត្ថកិច្ចលោកតាមមើលរាល់សកម្មភាពផ្សេងៗ ដែលវាមិនមែនជាការបិទសិទ្ធិសេរីភាពទេ វាជាការគ្រប់គ្រងសន្តិសុខ សណ្ដាប់ធ្នាប់សង្គមទូទៅ។ ហើយជាពិសេសរាល់សកម្មភាពទាំងឡាយណាដែលធ្វើស្របនឹងព្រឹត្តិការពិសេសណាមួយ ជាមួយពិសេសព្រឹត្តិការណ៍បោះឆ្នោតជ្រើសតាំងសមាជិកព្រឺទ្ធសភា…»។
លោក ទូច សុខៈ អ្នកនាំពាក្យក្រសួងមហាផ្ទៃ
ក្រុមសង្គមស៊ីវិលខាងលើអះអាងថា រដ្ឋធម្មនុញ្ញាបានធានានូវ សិទ្ធិ និងសេរីភាពក្នុងការបញ្ចេញមតិរបស់ប្រជាពលរដ្ឋ និងគោលការណ៍នីតិរដ្ឋ។ ផ្ទុយទៅវិញអាជ្ញាធរមួយចំនួន បែរជាបំបិទសំឡេងរបស់ប្រជាពលរដ្ឋ សង្គមស៊ីវិល ដែលអ្នកទាំងនោះគ្រាន់តែបង្ហាញអំពីការព្រួយបារម្ភ ទៅលើជីវភាពរស់នៅរបស់ពលរដ្ឋក្រីក្រមួយចំនួន ក្នុងរាជធានីភ្នំពេញ។ពួកគេ អំពាវនាវ ដល់អាជ្ញាធរអនុញ្ញាតឱ្យបន្តពិព័រណ៍រូបថតឡើងវិញដោយគ្មានការរំខាន និងស្នើ ឱ្យអាជ្ញាធរពាក់ព័ន្ធបញ្ជាក់អំពីមូលហេតុឱ្យបានច្បាស់លាស់នៃការផ្អាកការតាំងពិព័រណ៍រូបថត៕
