អាជីវកម្មរ៉ែមាសជាលក្ខណៈគ្រួសារ នៅភូមិសំពៅលូន ឃុំជាំតាម៉ៅ ស្រុកមេមត់ ខេត្តត្បូងឃ្មុំ។ រូបភាព៖ ក្រសួងរ៉ែ និងថាមពល។
ភ្នំពេញ៖ ក្រសួងរ៉ែ និងថាមពល បើកប្រតិបត្តិការបង្រ្កាបតំបន់អាជីវកម្មរ៉ែមាសជាលក្ខណៈគ្រួសារ នៅភូមិសំពៅលូន ឃុំជាំតាម៉ៅ ស្រុកមេមត់ ខេត្តត្បូងឃ្មុំ ដោយក្រសួងមើលឃើញថាទីតាំងនេះជាអជីវកម្មអនាធិបតេយ្យ ព្រោះថានៅប៉ុន្មានឆ្នាំចុងក្រោយនេះ ក្រសួងសង្កេតឃើញមានការប្រែប្រួលពីលក្ខណៈគ្រួសារដែលធ្វើដោយដៃ និងឧបករណ៍សាមញ្ញទៅជាប្រើគ្រឿងចក្រ រំសេវជាតិផ្ទុះ និងសារធាតុគីមី ដោយកន្លែងខ្លះមានជីករូងជាអណ្ដូងរ៉ែក្រោមដី។
ដោយមើលឃើញអំពីបញ្ហាប្រឈមធ្ងន់ធ្ងរដល់សុវត្ថិភាព សុខភាព និងបរិស្ថាន ក្រសួងរ៉ែនិងថាមពលដោយមានមន្ទីររ៉ែនិងថាមពលខេត្តត្បូងឃ្មុំ សហការជាមួយភាគីពាក់ព័ន្ធ ដោះស្រាយបញ្ហាពលរដ្ឋប្រកបអាជីវកម្មជីករ៉ែ តាមរយៈការចុះអប់រំផ្សព្វផ្សាយជាច្រើនដង និងចាត់វិធានការតាមផ្លូវច្បាប់ចំពោះសកម្មភាពជីកយករ៉ែអនាធិបតេយ្យរួចមកហើយ។ ក៏ប៉ុន្តែ ក្រសួងអះអាងថាការបង្ក្រាបទីតាំងអាជីវកម្មរ៉ែអនាធិបតេយ្យនៅតំបន់នេះនាពេលកន្លងមក នៅតែចម្រូងចម្រាស ហាក់ពិបាកនឹងដោះស្រាយ។
យ៉ាងណាមិញមកទល់នឹងបច្ចុប្បន្ននេះ សកម្មភាពអាជីវកម្មរ៉ែមាសអនាធិបតេយ្យនៅតំបន់នេះនៅតែកើតមាន ហើយមានការប្រើប្រាស់ឧបករណ៍ទំនើបៗ សារធាតុគីមី រំសេវជាតិផ្ទុះ បំបែកថ្ម និងជីកលុងអណ្ដូងរ៉ែក្រោមដីដែលក្រសួងមើលឃើញថាសុទ្ធសឹងតែជា គ្រោះថ្នាក់ដល់ពលរដ្ឋដែលបង្កជាហានិភ័យខ្ពស់ដល់សុខភាព និងសុវត្ថិភាពរបស់អ្នកធ្វើអាជីវកម្មរ៉ែអនាធិបតេយ្យខ្លួនឯងព្រមទាំងប្រជាពលរដ្ឋនៅក្នុងនិងក្រៅមូលដ្ឋាន។ លើសពីនេះសកម្មភាពនេះនឹងបង្កឱ្យមានការបាត់បង់ទ្រព្យសម្បត្តិ និងចំណូលជាតិ ប៉ះពាល់យ៉ាងធ្ងន់ធ្ងរដល់បរិស្ថានផងដែរ។
នៅឆ្នាំ២០២៣ មានរបាយការណ៍មួយ ចេញផ្សាយដោយអង្គការ សមធម៌កម្ពុជា (Equitable Cambodia) លាតត្រដាងពីការជាប់ពាក់ព័ន្ធរបស់ឧស្សាហកម្មជីករករ៉ែមាសជាលក្ខណៈពាណិជ្ជកម្មនៅក្នុងការកាប់បំផ្លាញព្រៃឈើ ការរំលោភសិទ្ធិមនុស្ស ការទន្ទ្រាននិងចាប់យកដីធ្លីនៃតំបន់ព្រៃប្រពៃណីរបស់ជនជាតិដើមភាគតិច ។ ខ្លឹមសារនៃរបាយការណ៍បញ្ចូលនូវក្តីសោកស្តាយ ព្រោះថាបន្ទាប់ពីមានការអនុញ្ញាតឱ្យធ្វើអាជីវកម្មរុករករ៉ែមាសអស់រយៈពេល ២០ឆ្នាំមក គេរកឃើញថាមានសញ្ញាតិចតួចបំផុតនៃការកែលម្អគោលនយោបាយនិងការអនុវត្ត ពាក់ព័ន្ធនឹងការគោរពសិទ្ធិមនុស្សនិងសិទ្ធិដីធ្លី និងការការពារបរិស្ថាន ហើយរបាយការណ៍ចាត់ទុកថាវិស័យរ៉ែទាំងមូលនៅតែជួបប្រទះបញ្ហាជាច្រើននៅក្នុងវិស័យទាំងនេះ។