បណ្ដឹងពាក់ព័ន្ធករណីហិង្សា និងដកហូតសម្ភារៈ របស់លោក កែវ សុវណ្ណឫទ្ធិ ទើបតែបានដល់ដៃការិយាល៏យដីកានៃអង្គស្នងការដ្ឋាននគរបាលជាតិ ខណៈលោកបានដាក់តាំងពី១ខែមុន។ សង្គមស៊ីវិលថា អាជ្ញាធរមានសមត្ថកិច្ចគួរតែដុតដៃជើងក្នុងរឿងនេះ ជាជាងអូសបន្លាយពេលនាំឱ្យមានការរិះគន់។ លោក ឡាក់ ច័ន្ទតារា ជូននូវសេចក្ដីរាយការណ៍៖
គិតត្រឹមថ្ងៃទី១៣ ខែវិច្ឆិកា ឆ្នាំ២០២៣នេះ គឺមានរយៈពេល១ខែ ដែលបណ្ដឹងរបស់អតីតគរុនិស្សិតឯកទេសអប់រំកាយកែវ សុវណ្ណឫទ្ធិ បានដាក់នៅអគ្គស្នងការដ្ឋាននគរបាលជាតិ។ លោក កែវ សុវណ្ណឫទ្ធិបញ្ជាក់នៅថ្ងៃនេះថា បណ្ដឹងរបស់លោកទើបត្រូវបានការិយាល័យដីការនៃអគ្គស្នងការដ្ឋាននគរបាលជាតិទទួលបានតែប៉ុណ្ណោះ មិនដឹងពេលណាដោះស្រាយបាននោះទេ។
លោកអះអាងថា បើរយៈពេលប៉ុន្មានថ្ងៃបន្ទាប់ពីទទួលបានបណ្ដឹងរបស់លោក តែបែរជាស្ងប់ស្ងាត់ដដែលលោកនឹងបន្ដទៅកានតុលាការ។ តែយ៉ាងណាលោកសង្ឃឹមថា ករណីបណ្ដឹងរបស់លោកនឹងដោះស្រាយនៅក្រៅប្រព័ន្ធតុលាការ។
គួរជម្រាបថា លោកកែវ សុវណ្ណឫទ្ធិបានដាក់ពាក្យបណ្ដឹងទៅកាន់អគ្គស្នងការដ្ឋាននគរបាលជាតិកាលពីថ្ងៃទី១២ ខែតុលា បន្ទាប់ពីមន្ដ្រីនៃសាលាខណ្ឌដូនពេញបានប្រើហិង្សាលើរូបលោក និងបណ្ដាលឱ្យលោកដួលសន្លប់នៅមុខក្រសួងអប់រំ ព្រមទាំងដកហូតសម្ភារៈប្រើប្រាស់ដូចជា ទូរសព្ទ និងកាមេរ៉ា របស់លោកនៅមុខសាលាខណ្ឌផងដែរ ពេលលោកទៅដាក់ពាក្យសុំអន្ដរាគមន៍ករណីហិង្សា។
សមត្ថកិច្ចគួរតែដុតដៃជើងនៅក្នុងរឿងនេះ ជាជាងអូសបន្លាយពេល ដែលនាំឱ្យ អ្នករងគ្រោះ និងអ្នកតាមដានក្នុងរឿងនេះរិះគន់ដល់អាជ្ញាធរ។ នេះជាសម្ដីលោក សឹង សែនករុណា មន្ដ្រីនាំពាក្យនៃអង្គការសមាគមអាដហុកក្នុងរឿងនេះ។
រយៈពេល៩ខែ ឆ្នាំ២០២៣ ក្រសួងមហាផ្ទៃបានដោះស្រាយ ឆ្លើយតបមតិ-យោបល់ និងសំណូមពរពលរដ្ឋជាង២០០សំណើ តាមរយៈហ្វេសប៊ុកក្រសួងមហាផ្ទៃ និងផ្ញើសារទៅកាន់ទំព័រហ្វេសប៊ុករបស់រដ្ឋមន្ត្រីក្រសួងមហាផ្ទៃលោក ស សុខា និងអតីតរដ្ឋមន្ត្រីក្រសួងមហាផ្ទៃសម្ដេច ស ខេង។
ថ្លែកាលពីថ្ងៃទី៣១ ខែតុលា រដ្ឋមន្ដ្រីក្រសួងមហាផ្ទៃបញ្ជាក់ថា រយៈពេល៩ខែនេះ មានសំណូមពរពីពលរដ្ឋជិត៦០០ករណី។ ក្នុងនោះ អគ្គស្នងការដ្ឋាននគរបាលជាតិទទួលបានបណ្ដឹង២២៩ករណី អគ្គនាយកដ្ឋានរដ្ឋបាលទទួលបានបណ្ដឹង១៤១ និងអធិការដ្ឋានទទួលបាន៤៣ បណ្ដឹង និងអគ្គនាយកដ្ឋានផ្សេងៗមួយចំនួនទៀត៕
