ក្រុមគ្រួសារសពលោក ឈាង រ័ត្ន នៅថ្ងៃទី១២ ខែតុលា ឆ្នាំ២០២៣នេះ បានចេញសេចក្ដីជូនដំណឹង ទទូចស្នើសុំដល់អ្នកសារព័ត៌មាន និងសាធារណជនទាំងអស់ ដែលបានបង្ហោះរូបភាព ឬវីដេអូទាំងឡាយណា ដែលមិនគួរគប្បីពាក់ព័ន្ធនឹងលោក ឈាង រ័ត្ន ឱ្យបញ្ឈប់ការបង្ហោះ ចែករំលែក និងលុបចេញពីគ្រប់បណ្ដាញសង្គម រួមានជាអាទិ៍៖ បណ្ដាញសង្គមហ្វេសប៊ុក(Facebook) និងធីកថក់(TikTok)ជាបន្ទាន់។
ការប្រកាសស្នើសុំយ៉ាងទទូចបែបនេះពី ក្រុមគ្រួសារសពរបស់លោក ឈាង រ័ត្ន ខណៈដែលពួកគេកំពុងកាន់ទុក្ខ និងមមាញឹកក្នុងការរៀបចំពិធីបុណ្យសពនេះ ក្រោយពីមានអ្នកសារព័ត៌មាន និងសាធារណជនមួយចំនួន បានបង្ហោះ និងចែករំលែករូបភាព និងវីដេអូមិនសមរម្យលើបណ្ដាញសង្គម ពាក់ព័ន្ធនឹងសពរបស់លោក ឈាង រ័ត្ន ជាហូរហែ ដោយគ្មានការអនុញ្ញាត។ ក្រុមគ្រួសារសពរបស់លោក ឈាង រ័ត្ន ចាត់ទុកទង្វើទាំងនេះថា ហាក់មិនបានផ្ដល់ការគោរពសិទ្ធិបុគ្គល និងឱ្យតម្លៃ ហើយធ្វើឱ្យប៉ះពាល់យ៉ាងខ្លាំងដល់សេចក្ដីថ្លៃថ្នូរ និងកិត្តិយសនៃសព និងប៉ះពាល់ដល់អារម្មណ៍ផ្លូវចិត្តរបស់ក្រុមគ្រួសារទាំងមូល។
លោក ឈាង រ័ត្ន ដែលជាអតីតប្រធានក្រុមហ៊ុនសម្រស់ធម្មជាតិ និងត្រូវជាស្វាមីរបស់លោកស្រី សុន្ទររី ហៅស្រីអូន បានទទួលមរណភាព ដោយការសន្និដ្ឋានបឋមថាជាការធ្វើអត្តឃាត(មិនទាន់ដឹងមូលហេតុពិតប្រាកដនៅឡើយ) កាលពីថ្ងៃទី១១ ខែតុលា ឆ្នាំ២០២៣។ មរណភាពរបស់លោកបានធ្វើឱ្យមានការភ្ញាក់ផ្អើលលើបណ្ដាញសង្គមជាខ្លាំង ដ្បិតថាលោកគឺជាបុគ្គលសាធារណៈមានអ្នកស្គាល់ច្រើន និងធ្លាប់ធ្វើកិច្ចការសង្គម និងមនុស្សធម៌ជាច្រើនផងដែរ។
ក្រុមគ្រួសាររបស់លោក ចាត់ទុកការបង្ហោះរូបភាព ឬវីដេអូ អំពីទិដ្ឋភាពករណីលោក ឈាង រ័ត្ន ពេលមរណភាពនេះ គឺមិនបានបង្ហាញពីសេចក្ដីថ្លៃថ្នូរ និងគុណធម៌ក្នុងនាមជាមនុស្ស និងធ្វើឱ្យសីលធម៌សង្គមជាតិទាំងមូលមានការធ្លាក់ចុះផងដែរ៕
