អ្នកស្រី ផាវ ញ៉ើង និងអ្នកស្រី សេង លីន ដែលជាប់ពន្ធនាគារ ជិត១០០ថ្ងៃមកហើយ ដោយសារតែជម្លោះដីធ្លីជាមួយក្រុមហ៊ុនឯកជននៅខេត្តកោះកុង ពេលនេះ អ្នកទាំងពីរត្រូវបានសាលាឧទ្ធរណ៍ខេត្តព្រះសីហនុ សម្រេចដោះលែងឱ្យនៅក្រៅឃុំបណ្ដោះអាសន្ន។ មន្ត្រីសិទ្ធិមនុស្សស្នើអាជ្ញាធរ អាជ្ញាធរងាកមកជំរុញដើម្បីរកដំណោះស្រាយជូនសកម្មជនដីធ្លីខាងលើ ជាជាងការរុញរឿងនេះដោះស្រាយនៅតុលាការ។លោក គីម ចាន់ចាវ រាយការណ៍
ការសម្រេចដោះលែងនេះ ធ្វើឡើងក្នុងសវនាការ នៅព្រឹកថ្ងៃទី០៥ ខែតុលានេះ។ ជាសវនាការដែលមានអ្នកតាមដានជាច្រើន និងមានការតវ៉ាទាមទារឱ្យដោះលែង សកម្មជនដីធ្លីទាំងពីរ ពីសំណាក់ពលរដ្ឋដែលមានជម្លោះដីធ្លីជាមួយក្រុមហ៊ុនដែលមានទំនាក់ទំនងជាមួយឧកញ៉ា លី យ៉ុងផាត់ និងលោក ហេង ហ៊ុយ ដែលបានវិនិយោគដំណាំស្ករអំពៅលើដីសហគមន៍។ លោក ហង់ វាសនា កូនប្រុសអ្នកស្រី ផាវ ញ៉ើង បានប្រាប់វិទ្យស្ត្រីនៅរសៀលថ្ងៃទី០៥ ខែកញ្ញានេះថា មេធាវីកំពុងធ្វើអន្តរាគមន៍លើករណីនេះ។
«តុលាការ និងមេធាវី កំពុងសហការគ្នាធ្វើឯកសារហ្នឹង ដើម្បីយកឯកសារហ្នឹង ដើម្បីដោះលែង..»
លោក ហង់ វាសនា កូនប្រុសអ្នកស្រី ផាវ ញ៉ើង នៅមុខសាលាឧទ្ធរណ៍ព្រះសីហានុ ថ្ងៃទី០៥ ខែតុលា ឆ្នាំ២០២៣
អ្នកស្រី ផាវ ញ៉ើង និងអ្នកស្រី សេង លីន រួមជាមួយសកម្មជនដីធ្លីមួយចំនួនទៀតដែលមានគ្នាប្រមាណជាង១០នាក់ ត្រូវបានសមត្ថកិច្ចខេត្តកោះកុង ចាប់ខ្លួន ក្នុងពេលឃាត់រថយន្តតំណាងសហគមន៍ភូមិព្រលាន នៅថ្ងៃទី២៩ ខែមិថុនា ដែលគ្រោងធ្វើដំណើរពីសហគមន៍របស់ពួកគេនៅខេត្តកោះកុង ឡើងមកដាក់ញត្តិស្នើសុំក្រសួងយុត្តិធម៌រកយុត្តិធម៌នៅភ្នំពេញ។
អ្នកស្រី ផាង ញ៉ើង (រូបភាពឯកសារ)
ក្នុងនោះតំណាងសហគមន៍ចំនួន៩នាក់ ដែលមានសកម្មជនទាំងពីរខាងលើផងនោះ ត្រូវបានតុលាការចោទប្រកាន់ពាក់ព័ន្ធនឹងករណីញុះញង់។ ក៏ប៉ុន្តែអ្នកទាំងនោះបានប្ដឹងទាស់ទៅសាលឧទ្ធរណ៍ខេត្តព្រះសីហនុ ហើយសកម្មជនដីធ្លីខេត្តកោះកុងទាំង៩នាក់ ត្រូវបានសាលាឧទ្ធរណ៍ព្រះសីហនុ អនុញ្ញាតឱ្យនៅក្រៅឃុំបណ្ដោះអាសន្ន ក្រោយការឃុំខ្លួនអស់រយៈពេល២ខែ ប៉ុន្តែពួកគេ នឹងត្រូវដាក់ឱ្យស្ថិតក្រោមលក្ខខណ្ឌមួយចំនួននៃការត្រួតពិនិត្យតាមផ្លូវតុលាការ ។
ទោះយ៉ាងណា ក្រោយការសម្រេចនេះ អ្នកស្រី ផាវ ញ៉ើង និងអ្នកស្រី សេង លីន មិនអាចត្រូវបានដោះលែងនោះទេ ដោយអ្នកទាំងពីរ រងការផ្ដន្ទាទោសដាក់ពន្ធនាគារ១ឆ្នាំ ក្នុងករណីផ្សេងមួយទៀត ដែលពួកគេត្រូវបានផ្ដន្ទាទោសពីបទបរិហាកេរ្តិ៍ និងបទញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម ពាក់ព័ន្ធនឹងភាពសកម្មនិយមរបស់ពួកគេ។
លោក អំ សំអាត នាយកកិច្ចការទូទៅអង្គការលីកាដូ យល់ថាជាដំណើរការល្អមួយក្នុងដំណើការនីតិវិធី មុនអង្គសេចក្ដី ដ្បិតអង្គសេចក្ដីមិនទាន់បានជំនុំជម្រះប៉ុន្តែតាមការស្នើសុំរបស់មេធាវីតុលាការអាចសម្រចឱ្យអ្នកទាំងពីរអាចនៅក្រៅឃុំចំរដូវកាលបុណ្យទាន។
«ជារឿងល្អដែលពួកគាត់ ហើយរដូវនេះជារដូវភ្ជុំផង ពួកគាត់អាចជួបជុំគ្រួសារវិញ ហើយបានធ្វើបុណ្យធ្វើទាននៅរដូវបុណ្យភ្ជុំនេះជាមួយនឹងក្រុមគ្រួសារណា៎»
លោក អំ សំអាត នាយកកិច្ចការទូទៅអង្គការលីកាដូ
ប៉ុន្តែ អ្នកជំនាញសិទ្ធិមនុស្សរូបនេះ អះអាងថា ទោះជាត្រូវបានដោះលែងបណ្ដោះអាសន្នក្ដី ពួកគេបានរងនូវភាពអយុត្តិធម៌រួចទៅហើយ។ លើករណីនេះលោកស្នើឱ្យអាជ្ញាធរងាកមកជំរុញដើម្បីរកដំណោះស្រាយជូនសកម្មជនដីធ្លីខាងលើ ជាជាងការរុញរឿងនេះដោះស្រាយនៅតុលាការ។
«ដោយសារពួកគាត់ជាសកម្មជនដីធ្លី ជាតំណាងសកម្មជនដីធ្លី ហើយធ្វើការសកម្មនៅក្នុងការទាមទារ ធ្វើការតស៊ូមតិដើម្បីរកដំណោះស្រាយដីធ្លី ប៉ុន្តែពួកគាត់ត្រូវបានជាប់ បណ្តឹងជាច្រើននៅតុលាការ ហើយមានការកាត់ក្តីរហូតដល់មានការចាប់ឃុំខ្លួនគាត់ជាបន្តបន្ទាប់ នេះជារឿងដែលអយុត្តិធម៌ចំពោះគាត់ ដែលបញ្ហាដីធ្លីវាគួរណាស់តែអាជ្ញាធរហ្នឹង ជួយសម្របសម្រួលនិងជំរុញផ្តល់ដំណោះស្រាយដីធ្លីនេះឱ្យបានឆាប់ និងជារឿងមួយដែលល្អ ហើយការមួយដែលជួយដល់ពលរដ្ឋ។ មិនមែនយកមធ្យោបាយនៃការប្តឹង ការចាប់ខ្លួន ការគំរាមគំហែង ការបំផិតបំភ័យទាំងក្នុងសហគមន៍ ឬតំណាងសហគមន៍ជាដោះស្រាយ វាអត់ល្អទេ»។
ក្រុមសកម្មជននៃសហគមន៍ព្រលានខេត្តកោះកុង បានតស៊ូនឹងជម្លោះដីធ្លីនេះជាច្រើនចាប់តាំងពីឆ្នាំ២០០៦ បន្ទាប់ពីក្រុមហ៊ុនដែលមាន ទំនាក់ទំនងជាមួយឧកញ៉ា លី យ៉ុងផាត់ និងលោក ហេង ហ៊ុយ បានវិនិយោគដំណាំស្ករអំពៅលើដីសហគមន៍។ ទោះបីជាយ៉ាងណាក៏ដោយ ការខិតខំប្រឹងប្រែងរបស់សកម្មជន ក្នុងការការពារដីធ្លីរបស់ពួកគេ តែមានការរកាំរកូសជាមួយអាជ្ញាធរ ខណៈដែលក្រុមរបស់ពួកគេជារឿយៗតែងធ្វើសកម្មភាពតវ៉ា និងដាក់ញត្តិស្នើសុំក្រសួងស្ថាប័នរដ្ឋដែលពាក់ព័ន្ធជួយអន្តរាគមន៍លើវិវាទរ៉ាំរ៉ៃនេះ៕
