ក្រោយមានការរិះគន់ព្រោងព្រាត ករណីភាពយន្តចិនដែលបង្ហាញទិដ្ឋភាពក្រិដ្ឋកម្មជួញដូរមនុស្សនៅកម្ពុជា អ្នកនាំពាក្យក្រសួងវប្បធម៌ និងវិចិត្រសិល្បៈ បានឱ្យដឹងថា ដោយពិនិត្យឃើញថា ភាពយន្តចិន ដែលមានចំណងជើងថា «No more bets» កំពុងធ្វើឱ្យប៉ះពាល់ដល់កម្ពុជាធ្ងន់ធ្ងរនោះ កម្ពុជាបានសម្រេចចាត់វិធានការណ៍ ដោយបានដាក់លិខិតទៅប្រទេសចិន តាមរយៈស្ថានទូតចិនប្រចាំ កម្ពុជា ស្នើសុំកុំឱ្យ ចាក់បញ្ចាំងភាពយន្តចិនមួយនេះ។ លោក គីម ចាន់ចាវ រាយការណ៍
លោក ស៊ុំ ម៉ាប់ រដ្ឋលេខាធិការក្រសួងវប្បធម៌ និងវិចិត្រសិល្បៈ បានឱ្យដឹងថា ក្រោយពីក្រសួងបានឃើញវីដេអូ Trailer តាមបណ្តាញសង្គមរបស់ភាពយន្តចិន«No more bets» ដែលនិយាយអំពីឧក្រិដ្ឋកម្ម និងការជួញដូរមនុស្ស កម្ពុជាបានចាត់វិធានការភ្លាមៗ។
ប្រតិកម្មរបស់ស្ថាប័នរដ្ឋាភិបាលនេះធ្វើឡើងស្របពេលដែលពលរដ្ឋអ្នកលេងបណ្ដាញសង្គមដែលជាជនជាតិខ្មែរ ទាំងក្នុងនិងក្រៅប្រទេសរិះគន់ចំពោះភាពយន្តនេះ ជាមួយនឹងទិដ្ឋភាពសិទ្ធិមនុស្សនៅកកម្ពុជា។ ការបង្ហោះសាររបស់ម្ចាស់គណនីឈ្មោះ Oudom Tat អំពីរឿងនេះមានអ្នកចែកចាយ ជាង១រយនាក់។ ក្នុងសារនោះបានសរសេរថា រឿង “No More bets” រកចំណូលបានខ្ទង់ពានលានដុល្លាអាមេរិក ដោយមានអ្នកទស្សនារាប់រយលានអ្នកជុំវិញពិភពលោក តែហាក់កំពុងធ្វើឲ្យកិត្តិនាម ប្រទេសកម្ពុជាធ្លាក់ចុះទៅវិញ។ គ្រាន់តែចំណូលពីអ្នកទស្សនានៅក្នុងស្រុកចិន បានជាង៣០០លានដុល្លា និង៥០០លានជាងដុល្លាបានពីខាងអឺរ៉ុប។ រឿងនេះគេបាននិពន្ធឡើងមកផ្អែកទៅលើការពិត ដែលបានធ្វើការស្រាវជ្រាវពីពាក្យបណ្តឹងប្រមាណជាង១០ម៉ឺនករណី
ដោយបានបញ្ចេញឈ្មោះប្រទេសកម្ពុជា និងប្រទេសមីយ៉ាន់ម៉ា ដោយនិយាយអំពី ល្បែងស៊ីសងតាមប្រព័ន្ធអនឡាញ ការចាប់ជំរិត ការជួញដូរមនុស្សតាមអនឡាញ ការបង្ខាំងមនុស្សបង្ខំឲ្យធ្វើការ ។
បើតាមគណនីដដែល មានការធ្វើការស្រង់មតិពីអ្នកទស្សនារឿងនេះ លើប្រព័ន្ធអ៊ីនធឺណេតបានឲ្យដឹងថា ៨៥%នៃប្រជាជនចិន និងអឺរ៉ុប បានបដិសេដ ក្នុងការមកលេងប្រទេសកម្ពុជា ដោយបារម្ភពីសុវត្តិភាព តាមរយៈខ្សែភាពយន្តមួយនេះ។
ករណីនេះលោក ស៊ុំ ម៉ាប់ មានប្រសាសន៍ថា ការលើកឡើងរបស់មតិសាធារណៈ ដែលបានបង្ហាញកង្វល់ថា ភាពយន្តចិននេះ ធ្វើឱ្យវិស័យទេសចរណ៍កម្ពុជារងផលប៉ះពាល់ធ្ងន់ធ្ងរ គឺជារឿងត្រឹមត្រូវ។
«វាអាចមែនប្អូនបើប្អូន បើវីដេអូហ្នឹងវាចរាចរណ៍ផ្លូវការវាអាចមែនប្អូន ព្រោះប្រទេសយើងមិនមែនប្រទេសចឹងផងដល់គេឃើញអាហ្នឹងគេខ្លាចគ្រប់គ្នាបាត់ហើយ»។
ចំណែកលោក តុប សុភក្រ អ្នកនាំពាក្យក្រសួងទេសចរណ៍ បានឱ្យដឹងថាក្រសួងពាក់ព័ន្ធកំពុងធ្វើការអន្តរាគមន៍លើករណីនេះ ដោយការប្ដេជ្ញាចិត្ត។
«យើងនឹងខិតខំធ្វើនូវអ្វីដែលជាកបន្យាបនូវឥទ្ធិពលដែលគេនិយាយមិនល្អពីកម្ពុជារបស់យើង ហើយយើងនឹងប្រែក្លាយពីចំណុចអវិជ្ជមានឱ្យជាអ្វីដែលអាចទាក់ទាញវិញ»។
លោក តុប សុភក្រ អ្នកនាំពាក្យក្រសួងទេសចរណ៍
ពាក់ព័ន្ធភាពយន្តឧក្រិដ្ឋកម្មជួញដូរមនុស្សនេះ លោក អ៊ុំ តារា អ្នកលេងបញ្ហាសង្គមម្នាក់ បានសរសរថា បងប្អូនយើងខ្លះឆ្ងល់ថា ហេតុអីយើងគ្មានប្រតិកម្មជាផ្លូវការជាមួយរឿងចិនដែលទើបនិងដាក់បញ្ចាំងឈ្មោះ No more Bets ដែលនិយាយពីឧក្រឹដ្ឋកម្មចាប៎ជំរឹតនៅកម្ពុជា។ លោកបន្តចោទសួរថា តើក្នុងរឿងវាដូចការពិតទេ ? វាមិនខុសអីពីក្រុមហ៊ុនអាមេរិកថតរឿង The Killing Field ទេ តើអ្នករស់សម័យខ្មែរក្រហមទទួលស្គាល់ថារឿងហ្នឹងពិតទេ ?
លោកតារា បន្តថា រឿងចាប់ជំរឹតនៅខ្មែរវាល្បីតាំងពីរដ្ឋាភិបាលអាណត្តិមុនម្លេះ យើងម្ចាស់ស្រុកក៏ដឹងដែរថាពួកម៉ាហ្វីយ៉ាចិនក្រឡុកយ៉ាងម៉េច ។ រឿងអស់នេះពួកវាក្រឡុកទៅកើតវាទាល់តែមានខ្មោចស្រុកកាងពួកវា មិនមែនវាឆ្អឹងដែកស្បែកស្ពាន់មកកូរតាមចិត្តកើតទេ តើពួកចិនអស់នោះបានកាំភ្លើងពីណាមកប្រើ កាន់គ្រប់ដៃ ? ជិះឡានស្លាក ខម ?។
ចង់ស្តារមុខមាត់ឡើងវិញកុំទៅឈ្លោះជាមួយកុន ត្រូវសំអាតផ្ទៃក្នុងជាមុនរកឱ្យឃើញខ្មោចក្នុងដែលចូលដៃជាមួយខ្មោចក្រៅ។
ទោះយ៉ាងណា អ្នកនាំពាក្យក្រសួងវប្បធម៌ និងវិចិត្រសិល្បៈ បដិសេដថា ភាពយន្តឧក្រិដ្ឋកម្មជួញដូរមនុស្សនេះមិនបានឆ្លុះបញ្ចាំងពីការពិតនៅកម្ពុជាឡើយ។
«គឺមិនមែនជាទីកន្លែងដែលមានអំពើចឹងៗទេ ហើយអ្វីដែលគាត់ចេញមកហ្នឹងតិច-ច្រើនគ្រាន់តែ អក្សរខ្មែរដែលប្រើផ្ដេសផ្ដាសនៅលើអាវហ្នឹងវាប៉ះពាល់រួចទៅហើយ»។
លោក ស៊ុំ ម៉ាប់ រដ្ឋលេខាធិការក្រសួងវប្បធម៌ និងវិចិត្រសិល្បៈ
យ៉ាងណាចំពោះករណីនេះកម្ពុជាមិនទាន់បានសហការជាមួយភាគីថៃ និងមីយ៉ាន់ម៉ា ដើម្បីឆ្លើយតបចំពោះភាពយន្តចិននេះឡើយ ប៉ុន្តែក្រសួងកំពុងព្យាយាមហាមឃាត់ក្នុងការផ្សព្វផ្សាយភាពយន្តនេះនៅតាមបណ្ដាញសង្គមក្នុងប្រទេសកម្ពុជា ខណៈកម្ពុជាបានដាក់សំណើរដល់ស្ថានទូតចិនឱ្យជួយដោះស្រាយផងដែរ។ នេះបើតាមការបញ្ជាក់ពីលោក ស៊ុំ ម៉ាប់ រដ្ឋលេខាធិការក្រសួងវប្បធម៌៕
